Hier begynneth the book callid the myrrour of the worlde ...

Now foloweth of Europe and of his contrees / ca. ¶xj^o

SYth we haue deuysed to you of Asye and of his contrees and regyons / I shal saye to yow of Eu∣rope and his condicions shortly / ffor as moche as we may ofte here speke therof / The first partye of Europe is Ro∣manye and a parte of Constantynoble / Trapesonde. Ma∣cedone. Thesalye. Boheme. Sapronye. Pyrre. & a moche holsom contre named Archade / In this contre sourdeth & spryngeth a fontayne in whiche men may not quenche brennyng brondes / ne cooles on fire and brennyng / In Archade is a stone whiche in no wyse may be quenchyd after it is sette a fire tyl it be alle brent in to asshes / Af∣ter Archade is the Royame of denemarke / and thenne Hongrye / & sythe hosterich̄ / and thenne foloweth germa∣nye whiche we calle Almayne whiche conteyneth a grete pourprys toward thoccident / in whiche pourprys ben many grete & puissaunt Royames / In Allemayne sourdeth a grete flood & ryuere named dunoe / the whiche stratcheth vnto in Constantynople / and there entreth in to the see / but erst it trauscth vij grete floodes by his radour & ren∣nyng / & as I haue herd saye the hede of this dunoe begyn∣neth on one side of a montayne / & that other side of the sa∣me mōtayne sourdeth another grete ryuer / which is named the rijn & renneth thurgh̄ almayne by basyle / strawsburgh

Magounce / Couelence / Coleyn / & nemyng / where fast by it departeth in to iiij ryuers & renneth thurgh the londes of ghelres. Cleue and holande & so in to the see / And yet er this ryuer entre in to the see / he entreth in to another ry∣uer named the mase / & than loseth he his name / & is called the mase / & mase depe xl myle longe in the see / In europe is also swauen / basse Almayn / ffraunce / Englonde / scot∣land and Irlonde / And aboue thise many other contree•• whiche endure vnto the mount Ius / & thus moche space holdeth the partye of Europe / Now shal we deuyse to yow how moche Affryke conteyneth /