Poems, &c. upon several occasions both English and Latin, &c. / composed at several times by Mr. John Milton ; with a small tractate of education to Mr. Hartlib.

Ad Salfillum poetam Romanum aegrotantem.

SCAZONTES.

OMusa gressum quae volens trahis claudum, Vulcanioque tarda gaudes incessu, Nec sentis illud in loco minus gratum, Quàm cùm decentes flava Dëiope suras Alternat aureum ante Junonis lectum, Adesdum & haec s'is verba pauca Salsillo

Ref••r, camoena nostra cui tantum est cordi, Quamque ille magnis praetulit immeritò divis. Haec ergo alumnus ille Londini Milto, Diebus hisce qui suum linquens nidum Polique tractum, (pessimus ubi ventorum, Insanientis impotensque pulmonis Pernix anhela sub Jove exercet flabra) Venit feraces Itali soli ad glebas, Visum superbâ cognitas urbes famâ Virosque doctaeque indolem juventutis, Tibi optat idem hic fausta multa Salsill••, Habitumque fesso corpori penitùs sanum; Cui nunc profunda bilis infestat renes, Praecordiisque fixa damnosùm spirat. Nec id pepercit impia quòd tu Romano Tam cultus ore Lesbium condis melos. O dulce divûm munus, O salus Hebes Germana! Tuque Phoebe morborum terror Pythone caeso, sive tu magis Paean Libenter audis, hic tuus sacerdos est. Querceta Fauni, vosque rore vinoso Colles benigni, mitis Evandri sedes, Siquid salubre vallibus frondet vestris, Levamen aegro ferte certatim vati.

Sic ille charis redditus rursùm Musis Vicina dulci prata mulcebit cantu. Ipse inter atros emirabitur lucos Numa, ubi beatum degit otium aeternum, Suam reclivis semper Aegeriam spectans. Tumidusque & ipse Tibris hinc delinitus Spei favebit annuae colonorum: Nec in sepulchris ibit obsessum reges Nimiùm sinistro laxus irruens loro: Sed fraena melius temperabit undarum, Adusque curvi salsa regna Portumni.