The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
DPLA Rights Statement: No Copyright - United States
We rede in 'Vitis Patrum,' how on̛ a tyme as Saynt Anton̛ lay in a den in wildernes, a grete multitude of fendis come vnto hym̛ and rafe hym̛, & toylid̛ hym̛, to so mekle he was nerehand̛ dead̛.
And his brether went & soght hym̛, & fand̛ hym̛ nere dede; & þai wepud & made grete sorow, and fechid̛ hym̛ home. So on̛ a nyght when̛ he was amendid̛, & aƚƚ his brethir was oslepe, he garte bere hym̛ agayn̛ vnto þe sayd den̛: and as he lay þer, & many wowndis vppon̛ hym̛, he lukid evur when̛ þir fendis suld̛ com̛ agayn̛. Than̛ þai come in liknes of wilde bestis, & with þer hornys & þer tethe þai rafe his flessℏ, & wowndid̛ hym̛ hugelie. Than̛ sodanlie þer apperid̛ a mervaylus light, & þies fendis fled̛; & sodanlie Saynt Anton̛ was hele of aƚƚ his wowndis. So att þe laste he vnderstude þat þer was almighti God Hym̛ selfe; & þan̛ he said̛; "A! gude Jesu! whar was þou? whar was þou? whi was þou not with me in þe begynyng, at þou mot hafe helpid̛ me, and helid my wowndis?" And our Lord ansswerrid hym̛ agayn̛ & said̛; "Anton̛, I was here, bod I abade to se þi bateƚƚ; and becauce now at þou has manlelie ouercommen̛ þine enmys, I saƚƚ make þi name to be knowen̛ þurgℏ aƚƚ þis werld̛, and þe for to be wurshuppid̛."