The English register of Oseney abbey / by Oxford, written about 1460. Ed., with an introduction and indexes, by Andrew Clark.

[48.]

1239, Aug. I. Sale to Oseney, by Humphrey de Monte, of 16 acres in Bulstake mead, subject to quit-rents of 1d. to the mesne lord, and 5s. to the chief lord, with 8d. 'to the mower.' Purchase|money, £4.

Know þey that been present and to be that I, vmfrey of þe mounte þ^e Soone of Gylberte of þe mounte, for my sowle helth and of þe sowles of my aunceturs, ȝafe and grauntid, and with my charter confermed, for me and myne heyres for euer, to god and to þe church of Seynte Mary of Oseney and to þe chanons þere seruyng god, all my mede with þe pertinences that I had in the mede þat is callid þe mede of Bolestake [Marginal note: 'bolestake Mede.'] , withoute oony agayne-holdyng to me or to my heyres for euer, þat is to say, xvj. acris, were-of x. acris lyen bytwene the mede [of [Added from the Latin.] Henry son of Henry and the mead of William de gardino of Botelee, and vi. acres lie between the mead] þat Roger of

Boteley helde and þe mede that Robert Mercer sumtyme helde: to be had and to be holde, to þe saide church and chanons for euer, in-to ffre and perpetuell almes, with all þe ryȝght that longeth to þe same mede (with þ^e pertinences) [that] I haue or I had or Euer myȝght haue, well and in peece, ffrely and quietly, yeldyng þerof yerly to me and my heyres j. d. at Estur at Oseney for all seculer seruice exaccion custom Sevtes and Demaundes in all thynges þ^e which of my lond or for my londe may be axid, Savyng to þe chefe lorde of þe ffee the rent of v. s. in tyme of heying and to þe mower viij. d., þe which þe same chanons shall quyte. And I vmfrey and my heyres all þe forsaide thynges to þe forsaide church and Chanons for Euer shall warantize agaynste all men and women, that, if, for Defaute of my warantyzing or my heyres, harmys or Expensis þey renne in, whe shall satisfye them by the syȝht of lawfull men of our oþer londis. And for þys yevyng grauntyng and warantizyng þe saide chanons yafe to me vj. marke of siluer. This charter was i-maade at Oseney att þe feste Seynte petur Ad uincula, The ȝere of þe reyne of Kyng Henry [Marginal note: 'Henricus 3, Rex Anglie.'] þ^e sone of Kyng John xxiij. And that this my ȝevyng grauntyng and warantiȝyng abide sure and stable for Euer, with this present wrytyng and puttyng to of my seele I haue i-strengthit hit. The witnyssis, et cetera.