Page 418
61 [Alle halewene day]
Alle halewene-day we holdez : one time in þe ȝere;
For manie enchesones holie churche : þare-to us gan lere.
On is, for þe grete noumbre : þat of alle halewe is,
Þat euerech ne mai nouȝt at is feste : ane day habbe, i-wis.
Line 4
An oþur is, þat we beoth feble : þat we ne mouwen nouȝht alle
Þe festene bi heom-sulf holde : ase huy in þe ȝere doth falle.
Þe þridde ancheson [al. om.] is, for þe ȝer is schort : ase ech ne may nouȝth allone
Þe [al. Ane] feste habbe in þe ȝere : þare huy habbez i-mone.
Line 8
Þe feorþe enchesun is, i-wis : for guod riȝht it is with-alle
Þat we of heom maken feste : ȝwane þe time doth falle,
For gret feste huy makiez in heouene : and in grete Ioye beoth [folio 174b]
Ȝwan huy any a-mendement : of us on vrþe i-seoth;
Line 12
For þe guod-spel seith of swich gret Ioye : þat a-mong heom in heouene is
Ȝwane ani of us a-mendi wole : of þat we doth a-mis. [vv. 13-14 al. om.]
¶ þe fifte enchesun is, for þare was : a forbuysne þar-of bi-gonne
Longue are þe strencþe of cristinedom : on vrþe were i-wonne:
Line 16
For þe heyȝe maystres of saresins : þat on vrþe weren þo her [MS. here]
Maden ech maumat bi heom-sulf : at rome on Auter;
Ac natheles of eche ne miȝhte he nouȝt : for here godes so fale were,
And huy nolden nouȝth þat ani god were : with-oute honour þere:
Line 20
Þare-fore huy maden on Auter : commuyn to ech-one,
For-to honouri alle heore godes þare : ase it were al i-mone.
And sethþe þo cristinedom cam : and swyþe wide spradde,
At rome and eke elles-ȝware : clanliche þe maystrie hadde,
Line 24
¶ Bonefas, þe guode pope : to þe false Auteres cam
And of þe Autere of alle godes : grete ȝeme he nam:
In forebuysne þar-of : ane churche he liet a-rere
Of ore lauedi and of alle haluwene : in þulke place þere—
Line 28
Ake six hundret ȝer and fiue : ore louerd [þer-]bi-fore
of marie, is suete moder : on vrþe was i-bore.
¶ Þe churche þat of ore lauedi was : and of alle halewene þo bi-founde,
Stant ȝeot at rome, and is i-cleped : "Marie la rounde."
Line 32
