¶ Þo comen þare ase hit knyȝhtes weren : redie for-to fiȝhte,
Al-blodie, for-to defendi ore louerd : and holie churche riȝhte—
Þat weren Marty[r]s þat for god : and holie churche al-so
Ȝeuen heore lif ase godes knyȝhtes : and to deþe weren ido.
Line 72
¶ Þo cam þare a gret compaygnie : preostes ase þei it were—
Þat weren þe confessours : þat hadden holie churche to lere,
Ase bischopes and Abbodes : and oþur guode men al-so.
Ore louerd huy honoureden alle : ase heore riȝhte was to do;
Line 76
Of feste þat Men on vrþe maden : huy þonkeden him and bade
For alle þat a-riȝht heore day heolden : and feste of heom made.
¶ Þo gonne [MS. goune] huy singue heore Matines : swyþ[e] murie with-alle,
For alle þat honouriez heore day here : ase heo in þe ȝere doth falle.—
wel ouȝhte we þane day honouren : ȝwane huy þat ilke day
Swuch Ioye for us in heouene maden : ase þe guode Man i-say.
Line 82
Nou bidde alle halewene : þat we heore feste holden so
Þat huy us bringuen to þe heyȝe Ioye : þare huy buth inne i-do.
62 [Alle soulene day]
Alle soulene-day on vrþe : riȝht is to holde heiȝe:
For alle we schullen habben neode þar-to : for alle we schullen deiȝe.
A fair siȝht þare-of al-so : þe Aungel þo gan bringue
Þene Manne of Rome ase he ladde him : ase he lay in metingue.
Line 4
him þouȝte, he saiȝh manie men : liggen in beddes of golde,
And manie sitte at heyȝe borde : and habbe al þat huy wolde;
And manie gon nakede : and bidde þat sum man heom scholde bi|weue,
And manie of-hongrede, and beden also : þat men sum guod heom eue.
Line 8
¶ Þe Aungel him seide ȝwat it was : al þat he saiȝh þere,
And þat it was purgatorie : and þe Men soulene were;
Þulke þat weren at so noble bord : and in þe riche beddes also,
Þat weren men for ȝwam þare was : muche guod on vrþe ido,
Line 12
Þat bi-lefden freond bi-hynde heom : þat Massene leten singue
And duden guod for godes loue : heore soulene out of pine to bringue.
Þulke þat weren a-cale and of-hongred : þat no guod ne miȝhten finde,
