This keyboarded and encoded edition of the work described above is co-owned by the institutions providing financial support to the Early English Books Online Text Creation Partnership. Searching, reading, printing, or downloading EEBO-TCP texts is reserved for the authorized users of these project partner institutions. Permission must be granted for subsequent distribution, in print or electronically, of this text, in whole or in part. Please contact project staff at eebotcp-info@umich.edu for further information or permissions.
IE crois auec tous les Chre∣stiens, que Dieu est vne es∣sence eternelle, spitituelle, inuisible & incomprehensible distinguée en trois personnes, Pere, Fils & S. Esprit: Le Pere source de la Diuinité, Crea∣teur & Conseruateur de toutes cho∣ses, visibles & inuisibles; Le Fils, sa Parole, sa Sagesse eternelle par le∣quel & pour lequel toutes choses ont esté creées; Le S. Esprit procedant
eternellement du Pere & du Fils, par lequel toutes choses sont conseruées: Mais ces trois ne sont qu'vn seul & mesme Dieu, tout-Puissant, tout-Sage, tout-Iuste, tout-Misericor∣dieux, la Verité & la Sainteté mesme, 1. Jean chap. 5. Vers. 7.
Si Dieu est vne Essence eter∣nelle, spirituelle, inuisible & incom∣prehensible, comme il n'en faut nul∣lement douter; Comment le pouuez vous connoistre, veu que vous estes finy, & que les Cieux des Cieux ne peuuent le comprendre, ou contenir, 2. Croniq. chap. 2. vers. 6. &. 6. vers. 18.
Ie n'entens pas que nous puis∣sions comprendre ou enueloper sous nos sens la Majesté infinie de Dieu, il faudroit estre hors du sens pour auoir
vne telle pensée. Mais je veux dire que Dieu estant comme il est tout-Puissant & tout Sage, se manifeste, se donne à connoistré aux hommes par ses oeuures; Car les choses inuisibles d'iceluy, à sçauoir sa Puissance eter∣nelle, & sa Diuinité se voyent comme à l'oeil par la creation du monde, estant considerées en ses ouurages. Rom. 1. vers. 20.
Il semble pourtant que les oeuures de la creation, quoy que grandes & admirables, ne peuuent pas donner aux-hommes vne vraye connoissance de Dieu, telle que nous la deuons auoir pour l'aymer, l'hono∣rer & seruir. Et de fait l'Apostre S. Paul nous apprend au mesme chapi∣tre que vous venez d'alleguer aux quatre versets suiuans, que combien que les hommes ayent connu Dieu par ses oeuures, ils ne l'ont pas glorifié
comme Dieu, & ne luy ont pas ren∣du l'honneur, le seruice & l'obeïs∣sance qui luy est deuë; ains sont de∣uenus vains en leurs discours, & leurs coeurs destituez d'intelligence ont esté remplis de tenebres: se disans estre sages sont deuenus fols, ont changé la gloire de Dieu incorrupti∣ble à la ressemblance & image de l'homme corruptible, & des oyseaux, des bestes à quatre pieds, & des repti∣les; A raison dequoy aussi Dieu les a liurez aux conuoitises de leurs coeurs: Il faut donc qu'il y ait quelque autre reuelation plus efficacieuse.
I'auouë que nous ne pouuons paruenir à la droite connoissance de de Dieu par les oeuures de la creation seulement: A cause de l'ignorance en laquelle nous sommes tombez par la reuolte de nostre premier Père. C'est pourquoy Dieu aussi s'est mani∣festé aux Peres qui ont vescu sous la Loy de nature par diuerses reuela∣tions,
& apparitions; Et du depuis il a ajousté sa Parole, par laquelle il nous fait connoistre, non seulement ce qu'il est en soy; mais aussi ce qu'il nous est, ce qu'il a fait pour nous, & ce qu'il veut que nous fassions pour luy estre agreables. Or cette Parole nous est absolument necessaire pour nous amener à la droite connoissance de Dieu. Et de fait le Prophete Roy l'a bien jugé ainsi; Car apres nous auoir proposé le liure de la nature au Pseaume dix-neuf, & particuliere∣ment les Cieux qui racontent la gloi∣re de Dieu, l'ordre continuel des jours & des nuits qui preschent sa Majesté, nous amene à la Parole de Dieu qu'il compare à vne lumiere, à vn guide: Et de vray la Parole de Dieu est vne lumiere qui nous conduit en nostre pelerinage terrien. Ta Parole dit le Prophete au Pseau. 119. vers. 5. sert de lampe à mon pié, & de lumie∣re pour mon sentier. Esclairez donc
par la Parole de Dieu, & conduits par le S. Esprit, qui est le guide appro∣priant les choses spirituelles à ceux qui sont spirituels, comme l'Apostre S. Paul nous l'apprend en sa premiere aux Corinth. chap. 2. vers. 13. les oeu∣ures de la creation nous seruent pour nous amener à la connoissance de cét excellent ouurier, & nous font voir comme à l'oeil sa Puissance eter∣nelle, sa Diuinité, sa Sagesse admira∣ble, & sa Bonté infinie.
Puis que les oeuures de la crea∣tion ne sont pas suffisantes pour nous amener à la droite connoissance de Dieu, & que sa Parole nous est neces∣saire; Voyons ce qu'elle nous ensei∣gne de Dieu?