Hier begynneth the book callid the myrrour of the worlde ...

Here after foloweth of the heuen crystalyn and of the he∣uene imperyall capitulo ¶xxij^o

ABoue this heuen that we may see blew as sayd is / after that thauncyent clerkes saye / ther is another heuene alle rounde aboute that aboue and bynethe / lyke as it were of the colour of whyte crystall. clere. pure. and moche noble / And is called the heuen crystalyn / And aboue this heuen crystalyn / alle rounde aboute that / is an other heuen of the colour of purple / lyke as the deuynes saye / And that is called the heuen Imperyal / This he∣uene is garnysshid and ful of alle beaultees / more than ony of the other that we haue named / and there is thayer seuen tymes more fayr and more clere than is the sonne / ffro this heuen Imperyal fylle the euyl angeles by their pryde / the whiche were disgarnysshid of alle glorye and of alle goodes / And ther ben the blessyd Angeles of our lord /