Hier begynneth the book callid the myrrour of the worlde ...

Here speketh of ynde & of thynges that be found therin / capitulo ¶iiij^o

Affter comen the contrees of yndes whiche take their name of a water that is called ynde / whiche sourdeth in the north / The yndes ben closed with the grete see that enuyronneth them roūd aboute In ynde is an yle named Probane wherin ben founded ten cytees and plente of other townes / where as euery yere ben two somers & two wynters / And ben so attemprid that there is alway ver∣dure / and vpon the trees ben contynuelly flowres. leeuis and fruyt / And it is moche plenteuous of gold and syluer and moche fertyle of other thynges / There be the

grete montaynes of gold and of precyous stones and of other richesses plente / But noman dar approche it for the dragons and for the gryffons wylde whiche haue bodyes of lyouns / fleyng whiche easily bere a man away armed and syttyng vpon his hors / whan he may sease hym with his clawes and vngles Ther ben yet plente of other pla∣ces so delectable so swete and so spyrytuel that yf a man were therin / he shold saye / that it were a very paradys /