ffirst of paradys terrestre / and of the foure grete fflodes that departe fro thens capitulo ¶iijo
THe first regyon of Asia the grete is paradys ter∣restre / This is a place whiche is ful of solace. of playsances and of delices / so that none that is therin may be greuyd ne haue none euyll in no maner of the world / In this paradys is the tree of lyf / and who that had eten of the fruyt / he shold not deye as longe as the world en∣dureth / But noman liuyng may come theder / but yf our lord god or his angele conduyted & brought hym theder / ffor alle round aboute / it is enclosed wyth fyre brennyng the whiche goth flāmyng vnto the clowdes / Ther within∣ne fourdeth and spryngeth a fontayne or welle whiche is deuyded in to four flodes / of whom that one is called vn∣gages / that renneth a longe thurgh the Royame of ynde / And departeth in to many armes or braces / it sourdeth of the mon̄t that is called Ortobares / the whiche is toward thorient / and falleth in to the see Occian / The second of the four flodes is named gyon / or nylus / whiche entreth in to therthe by an hool / And renneth vnder the erthe so ferre that it resourdeth in to the longe see whiche enuyron∣neth