To the extent possible under law, the Text Creation Partnership has waived all copyright and related or neighboring rights to this keyboarded and encoded edition of the work described above, according to the terms of the CC0 1.0 Public Domain Dedication (http://creativecommons.org/publicdomain/zero/1.0/). This waiver does not extend to any page images or other supplementary files associated with this work, which may be protected by copyright or other license restrictions. Please go to http://www.textcreationpartnership.org/ for more information.
ABoue saturne whiche is the last planest / & hyest from vs of alle the vij planetes is the heuen that men see so full of sterres as it were sowen / whan it is clere tyme and weder / This heuen that is so sterred is the fir∣mament / whiche meueth and goth round / of whiche me∣uyng is so grete Ioye / so grete melodye and so swete / that
ther is noman that yf he myght here it / that neuer after shold haue talente ne wylle to do thynge that were con∣trarye vnto our lord in ony thynge that myght be / so moche shold he desyre to come theder / where he myght alle∣way here so swete melodyes & be alway wyth them / wherof somme were somtyme that sayde that lytil yonge chyl∣dren herde this melodye whan they lawghed in their slepe / ffor it is sayde that thenne they here the Angels of our lord in heuen synge wherof they haue suche Ioye in their slepe / But herof knoweth noman the trouthe sauf god that knoweth all / whiche setted the sterres on the heuen and made them to haue suche power / ffor ther is nothynge withyn the erthe ne withyn the see. how dyuerse it be / but it is on the heuen fygured and compassed by the sterres / of whiche none knoweth the nombre sauf god only /
but it is a moche maistryse / ffor ther ne is sterreso lytil / but that it hath in hym hole his vertue / in herbe / in flour / or in fruyt be it in facion / in colour or otherwyse / Ther is nothing in erthe that ought to be / ne therin hath growyng but somme sterre hath strengthe and puissaunce by na∣ture / is it good or otherwyse suche as god hath gyuen to it / And for the firmamēt and for the planetes take this fygure to fore an that other syde / and ye shal see therin the sytuacion of them /
BVt syth we haue descriued and spoken of the fir∣mament in this second partye of this volume / we shal speke of somme caases that come and happen on hye and also lowe / And shal speke of the mesure of the fir∣mament / ffor to vnderstande the better the facion and how it is made and proporcioned / and of that whiche is aboue And also we shal speke of heuen /