in ambitu serrata, sapore oleraceo: ex pediculis satis longis flosculi luteoli, tetrapetali ori∣untur: quorum singulis singulae succedunt capsulae, cordatae, tumidae, seu turgidulae, multo reliquis praedictis siliculosis quoad capsulas majores, & aliquando cum quatuor angulis quae semina à latere septi medii à dextris & sinistris continent oblonga, triangularia, Nasturtii seminibus minora, coloris subruffi, saporis itidem Nasturtii, sed remissioris; quae in ore re∣tenta contrahunt muscilaginem quandam: radix fibrosa, inutilis seminibus ad maturitatem perductis. Monspelii abundat in agris. Circa Montbelgardum Myagro consitos agros habent ad oleum conficiendum. Vidit Joh. Bauhinus prope Granges, quod quotannis semine de∣ciduo sese renovat: semen maturum Junii principio. Maxima est hujus copia culta▪ apud Gallos; etiam suae spontis inter segetes conspicitur. Provenit satum item in Alsatia & tractu Rheni, teste Trago.
2. Myagrum minoribus capitulis seu silvestre, nobis. Myagrum silvestre, C. B. P. Myagrum Turcicum, J. B. Chabr. Hoc longe tenuioribus ac tenerioribus constat virgulis quam prae∣cedens, sed cultura fruticosior fit, teste Camerario; semen minus in vasculis seu capsulis ob∣longis, tumidis, minoribus, cordis sigurâ; estque herba ejusdem naturae cum superiore.
TEMPERAMENTUM & VIRES, EJUSQUE USUS.
Calidum est uti Sesamum verum, sitimque etiam excitat; seminis oleosà pinguedine corporis asperitates laevigari atque expoliri, ut Dioscorides ait, creditur; oleo ejus utuntur pauperes in epulis, divites in lucernis uti Ruellius author est. Rusticis nostris Gallis (inquit Ruellius) Chamelina aut Camamina optime cognita, oleo conficiendo ejus semen in areis pavitis mire flagris decutiunt, & vannis in auram vento silentem jactant, dum siliquularum recrementa vanescant: tum trusatilibus molis subjiciunt, & versando oleum exprimunt, quo non ad lumina tantum lucernarum, sed & ad ciborum condimenta utuntur, magno hujus olei proventu. Vix quicquam aliud ab aviculis invaditur, quod advertentes quidam hoc semen colligere & alendis aviculis reservare student. Oleum ex hujus semine conficitur longe praestantissimum, estque oleo Olivae Tragi judicio gratius & jucundius; sed cum bona veniâ Tragi, quicunque oleo Olivae non sit contentus, utatur oleo Myagri aut Rapi donec oleum Olivae proveniat in Germania. Longe claudicat comparatio haec: forte Tragus sibi persuadet oleum ex Myagri semine extrusum, esse veri Sesami oleum, & proinde My∣agro Sesami veri vires item attribuit. Hoc oleum frigore non concrescere perhibetur à quibusdam. Plerisque Galliae locis, ut apud Suessiones, provenit; seritur in agro Leodiensi, apud Zelandos etiam, & in aliis Belgii locis. In Germania sua sponte nusquam non exire fertur, ita & una cum Lino nasci fertur, cujus vitium existit.
HALLUCINATIONES CASP. BAUHINI Aliorumque Authorum.
MYagrum siliqua longa, C. B. P. Pag. 109. col. 1. pl. i. Myagrum alterum Thlaspeos effigie, Lob. Lugd. Est planta siliquosa seu longa siliqua praedita; ergo non debuit a Casparo Bauhino collocari inter Myagra, siliculosas plantas: aman∣detur ad Erucam cujus est species. Vide pag. 229. hujus Historiae, plantam 7. quo nos retulimus. Ibi∣dem col. 2. pl. v. Myagrum monospermum latifo∣lium, C. B. P. Myagrum hortense monospermum, Eyst. Item pl. vii. Myagro similis siliqua rotunda, C. B. P. cum hae duae plantae non sint siliquosae bival∣ves, nec bicapsulares ut Myagrum, non debent Myagra dici, sed cum silicula fungosa constent, uni∣cum semen continente, aptius relegabuntur ad Ra∣phanistrum monospermum, quemadmodum nos feci∣mus.