¶Coment Raison vient a Lamant.
THus as I made my passage
In complaint, and in cruell rage,
And I not where to finde a leche,
That couth vnto mine helping eche
Suddainely againe comen doun,
Out of her toure I saw Reasoun,
Discreet and wise, and full pleasaunt,
And of her port full auenaunt,
The right way she tooke to me,
Which stood in great perplexite
That was poshed in euery side,
That I nist where I might abide,
Till she demurely sad of chere
Saied to me as she came nere.
Mine owne friend, art thou greued,
How is this quarrell yet atcheued
Of loves side? Anone me tell,
Hast thou not yet of Love thy fill?
Art thou nat wearie of thy seruice?
That thee hath in such wise.
What joy hast thou in thy louing?
Is it sweet or bitter thing,
Canst thou yet chese, let me see
What best thy succour might bee.
Thou seruest a full noble Lord,
That maketh thee thrall for thy reward,
Which aye reneweth thy tourment,
With folly so he hath thee blent,
Thou fell in mischeefe thilke day,
When thou diddest the sooth to say
Obeisaunce and eke homage
Thou wroughtest nothing as the sage,
When thou became his liege man,
Thou diddest a great follie than,
Thou wistest nat what fell thereto,
With what Lord thou haddest to do,
If thou haddest him well know
Thou haddest nought be brought so low,
For if thou wist what it were,
Thou noldest serue him halfe a yere,
Nat a weeke, nor halfe a day,
Ne yet an houre without delay,
Ne neuer iloved paramours,
His Lordship is so full of shours,
Knowest him ought?
Lamaunt. Ye dame parde.
Raisoun. Nay, nay. Lamaunt. Yes I.
Raisoun. Wherefore let see.
Lamaunt. Of that he saied I should be
Glad to haue such Lord as (he)
And maister of such seignorie.
Raisoun. Knowest him no more?
Lamaunt. Nay certes, I
Saue that he yafe me rules there,
And went his way I nist where,
And I abode bound in ballaunce,
Lo there a noble cognisaunce.