[Le morte darthur]

¶Capitulum xxij

THenne the quene departed / but the brachet wold not from hym / and there with alle came kynge Marke and the brachet sat vpon hym / and bayed at them all / There with al syr Andred spak and said syr this is sir Tristram I see by the brachet / Nay said the kyng I can not suppose that / Thenne the kyng asked hym vpon his feith what he was / and what was was his name / ¶So god me help said he / my name is sir Tristram de lyones / now do by me what ye lyst / A saide kyng Mark me repenteth of your recouer / & thenne he lete calle his barons to Iuge sir Tristram to the dethe / thēne many of his barons wold not assente therto / and in especyal syr Dynas the seneschal / & sir Fergus / And so by thaduyse of them al sir Tristram was banysshed out of the coūtrey for x yere / & therup¦on he took his oth vpon a book before the kyng & his barons /

And soo he was made to departe oute of the Countrey of Cor∣newaile / and there were many barons brought hym vnto hys shyp / of the whiche somme were his frendes / & somme his foes / And in the meane whyle there came a knyghte of kynge Ar∣thurs / his name was Dynadan / and his comyng was for to seke after sir Tristram / thenne they shewed hym where he was armed at alle poyntes goynge to the shyp / Now fayre knyʒte said sir Dynadan or ye passe this courte that ye will Iuste with me / I requyre the / with a good wille said sir Tristram / & the∣se lordes wille gyue me leue / Thenne the Barons graunted therto / and soo they ranne to gyders / and there sire Tristram gaf sire Dynadan a falle / And thenne he praid sir Tristram to gyue hym leue to goo in his felauship / ye shalle be ryght wel∣come said thenne sire Tristram / and soo they took theyr horses and rode to their shyppes to gyders / and whanne sire Tristram was in the see / he said / Grete wel kyng Marke and all myn enemyes / and saye hem I wille come ageyne whan I maye / And wel am I rewarded for the fyghtynge with sire Mar∣haus / and delyuerd all this countrey from seruage / and wel am I rewarded for the fetchyng and costes of Quene Isoud oute of Irland / and the daunger that I was in fyrst & last and by the way comynge home what daunger I had to bryn¦ge ageyne Quene Isoud from the castel Pluere / and well I am rewarded whanne I foughte with sir Bleoberys for syre Segwarydes wyf / and Well am I rewarded whan I fouʒt with syre Blamore de ganys for kynge Anguysshe / fader vn¦to la Beale Isoud / and well am I rewarded whan I smo∣te doune the good knyghte syre Lamorak de galys at Kyng Markes request / And wel am I rewarded whan I fought with the kynge with the honderd knyghtes / and the kynge of Northgalys / and bothe these wold haue put his land in serua¦ge / and by me they were put to a rebuke / and wel I am re∣warded for the sleynge of Tauleas the myghty gyaunte and many other dedes haue I done for hym / and now haue I my waryson / And telle Kynge Mark that many noble knyghtes of the table roūd haue spared the barons of this countrey for my sake / Also am I not wel rewarded whan I fought with the good knyght sir Palomydes and rescowed quene Isoud

from hym / And at that tyme kynge Marke said afore all his barons I shold haue ben better rewarded / nad forth with alle he took the see /