Le Tailleur. Chap. 9.
DIeu gard Cousturier. Bien venu mons.
Combien d'aulnes de satin me faut il achepter pour me faire vn pourpoint?
Quatre aulnes & vn quarteron, mons.
Et combien de velours pour mes chausses?
Si les voulez faire faire à l'Espagnolle, il vous y faudra trois aulnes & demye.
Combien de drap large m'en faudra il pour me faire vne cappe à la Romanesque ou vne ferrarolle à la mode d'Alle∣maigne?
Il vous en faut auoir guere moins de cinq aulnes & demye, pour y faire vne assez large pour vous auec vn coqueluchon du mesme drap.
Sus, sus prenez la mesure donc.
Dressez vous & n'en bougez pas.
Comment vous aggrée la chaussure Italienne?
La guise Venicienne me plaist tresbien.
Que dites vous à la mode de France?
Ie suyvray la façon d'Angleterre.
Chacun se deguise à sa guise.
Faites la brayette à la Courtisane ou à l'antique.
Ho, laissez faire à Marcantoyne.
Pour quand seront ces habits faits?
Entre-cy & dimanche. Pour Noël, pour Pasques, pour Pentecoste.
Adieu donc. Attendez mons. Ie n'ay pas prins la mesure de vostre bourse encore.
Voylà vn escu pour achepter du passement, de la soye & des boutons. Desrobbez la moitíe: Ie vous en prie.
Monsieur ie suis Cousturier, ie ne suis pas larron.