Les Perses adoroyent ceux qui avoyent le nez aquilin, à cause de Cyrus, lequel ilz disent auoir eu le sien de forme d'un chausse-pied.
Il a les mains fort crochuës & gluëuses.
Il n'est pas toutes-fois larron.
Que sçait-il faire?
Il sçait taire & tenir son secret.
Il est donc plus sage que plusieurs sots.
De quoy a cest homasse la face si rouge & enflambée?
Honte le saisit auec horreur des meschancetez, abomi∣nations & vilainies commises par le monde, ou plu∣stost de veoir les aueugles iuger de couleurs.
Partez vous d'icy, car vous n'achepterez rien, ie voy bien. Allons, allons: vertu Dieu! quels merchants?
Mais nous en voulons achepter, moyennant que tu nous laisses faire le prix à nostre fantasie.
Voy là vn beau marché. Il y a long temps que ie suis embrouïllé de vous.
Ostez vous d'icy, ie vous en prie.
Nous ne faisons point de mal.
Quelle image est cela?
C'est l'image de la vierge MARIE.
Abbaissez moy ce Tableau.
Est-ce pas nostre Seigneur IESV CHRIST?
Qui est icy pourtrait & tiré si vifuement?
C'est Tyberius Caesar Romain de tres-haute memoi••.
L'Image est d'vne extremement belle taille.
Lon trouue par escrit Tyberius Caesar auoir eu les noeuds des doigts si fermes que d'vn doigt il perçoit tout outre vne pomme fraische.
Aussi feray-ie bien moy.
Voire d'vne pomme pourríe donc.
Il a la palme de sa main bien large.
As-tu apprins la chiromancie?
Ie l'ay bien ouy nommer. Pourquoy donc?
Tu nous eusses deuiné icy quelque chose