Here begynneth the kalendre of the newe legende of Englande

¶De sancto Godrico seruo dei & heremita.

THe fader and moder of seynt Godryke dwellid in Norfolke in a Towne callyd Walpole they were pore of worldlye substaunce / and Ryche in vertues deuoutly prayinge to our Lord y^t they myght haue a chylde apte to his seruyce / And so they had a sone whom they callyd Goderyke / And in his youthe he was a marchaūte vsynge / Feyrrys and Markettys / he went to seynt Andrewys in Scotlande / & soo to Rome & came whom with marchauntys by water / And went into Bry¦tayne / Flaunders / and Denmarke / & wan moche good And .xvi. yerys he expendyd in suche busynes / And after he went twyse to Rome oon tyme he went by seynt Gyle / And the other tyme he toke his moder with hym whiche went barefote / And when he came whome at the laste ty∣me he solde all that he had & gaue it to poore men & lyuyd at caerlyle vnknowyn / Wher many folkys began to wor¦shype

hym wherfore he went into a wood / & lyuyd there with herbys & frutys & had no house / after he founde an olde heremyte / and eyther of them callyd other by his na¦me & yet they neuer had herde of other before / & he taryed with hym tyll the other Heremyte dyed / And then seynt Cuthberte apperyd to hym & bad hym to go to Ierusalem and be crucyfyed with our Lord / & then to come agayne to a wood callyd fynkale a lytyll fro Duresme / And in y^t Iourney he toke no sustenaunce but drye barley breed & water / And he chaungyd not his clothynge nor wasshed theym / ne chaungyd his shone tyll he came there so y^t sto¦nys & grauell were growyn into his feet so greuouslye y^t the flesshe & bonys myght scarcely hange to gedyr / And at fleme Iordane he chauugyd hym & wyshe his Here / & fro that tyme he were no shone / Then he retournyd agey¦ne to fynkale / & by the ryuer of were he made a lytyll hou¦se where he dwelled vnknowen dyuerse yerys / & lyuyd w^t Leuys & Rotys / & after he began to Laboure to get hym mete by his laboure / he dyggyd the grownde & sewe it / & made a Gardeyne / he neuer lay in Bedde but on y^e groū¦de with a here vnder hym / & a stone vnder his Hedde / of all thyngys he eschewed Idelnes and wolde eyther be in Prayer / medytacyon or Laboure / He wolde stonde in y^e water thoughe it were Froste / & snowe sometyme a mo∣neth together in the nyghtys tyll the mornynge / & when his teth chakyid ī his heed / he wolde sey thys is greuous but y^e fyre of Hell is moche more greuous / & in the coulde wynter he wolde go barefote so y^t his feet sumtyme were cut so greuously y^t a man myght put ī his fynger / he cho∣se y^e pryor of Duresme to be his mayster / & wolde not spe¦ke w^t any man w^tout lycēse of hym .iiii. dayes in the weke

sonday / mōday / tuesday / & fryday & also in festys & in ad∣uēt & fro septuagesyme to Ester he kepte scylence / & after he began to enhabyt y^t place / He neuer went out of it but thryse / he had dyuerse tymes great fowle deseasys of By¦les / & of other fowle mater in all his Body w^t intollerable payne / & yet he wolde take no medycyne / for he fayde he was worthy to suffer payne for his offencys / & wolde ma¦ke oon to rubbe his sorys w^t salte / & when he had ben .xi. ye¦rys in wyldernes such a great swellynge toke hym in y^e fa¦ce & in all the Body y^t he coulde scarcelye he knowen / & he had great inwarde peyne as though wormys had consu¦myd hym which he alweyes toke in pacyēce / & when his tyme drewe nere he callyd y^e bretherne / & they leyde hym vppon a here with asshes & put on hym a stamyn & a cow¦le / for he was a lytell before made monke at Duresme / & so he went to our Lord y^e .xii. kalendas of Iune in y^e yere of our Lorde god .M.C.lxx. & many great myracles y^t our Lord hath shewyd for this blessyd man / & the great temp¦tacyons y^t he had of y^e goostlye enemye which ofte he ap∣peryd to hym to haue deceyuyd hym som tyme lyke a pyl¦gryme / sometyme lyke a woman & some tyme moche ter¦rybly in lykenes of dyuerse bestys / & howe w^t the sygne of the crosse he had euer the vyctory / And how our Lady & dyuerse other seyntys many tymys apperyd to hym and cōfortyd hym for shortnesse be here omyttyd.