Lenuoye.
THis tragedye of arthur here folowynge
Byd princes all beware of fals treson
For in all erth is none so {per}ilous thinge
As trust of feyth where is decepcion
Hyd vndre curteyn of fals collusion
For which men shulde I holde the counsayle gode
Beware aforne euer of vnkynde blode
The worlde diuers fortune ay chaungeable
In euery cuntre and euery region
In a strayte nede fewe frendes abydynge
Longe abstynence causeth dissencion
And if princes by fals dyuysion
Nigh of allye shewe two faces in an hode
Late men beware euer of vnkynde blode
Who was more hardy of princes here regnynge
Or more famous of marcyall renoun
Than whilom was his enmyes outraynge
Arthur cheef sonne of brutus albyon
But for all that the disposycion
Of fate and fortune moost furious and wode
Causyd his destruction by vnkinde blode
What more contrarious to nature in shewynge
Than fayre pretence double of entencion
Great allyaunces frowardly werkinge
Hid vndre floures a serpent cast poison
Bright siluer scalyd damageth the dragon
Ech worme some partye tar••ageth of his brode
And what more {per}ilous ••han vnkynde blode
Noble princys on arthur remembrynge
Deme the day of phebus goynge doun
All is nat golde that is clere shynynge
Afore prouyded of youre inwarde reson
Fals vndermynynge and supplantacion
Remembrynge aye with arthur howe it stode
By conspyracion of vnkynde blode