Which caused him in herte he was nat merye
But ay remembred vpon his fell banysshinge
Gadred his people within the londe of surrye
And in the felde while he lay hostynge
Cast hi•• fully to make no tarynge
But in all hast of knightly fell corage
Maugre his ennemyes resort vnto cartage
Gauenge his exil his herte was set afire
And his entent more to fortefie
He sent in haft his letters doun to Tyre
To Tartalus that he shulde him hye
And bringe with him al the cheualrye
Of his cite in stele armyd clene
His faders party to holde vp and sustene
But whan this bysshop knewe hooly the manre
Of this purpos which ye haue herde deuise
He considred howe that tyme of the yere
Ordeyned was to doo socrifise
Afetr the rites of their paynym wise
To hercules which in that cite
Aboue all goddys had the souereynte
Whoos feest was holde space of certeyne dayes
Which for to halowe he nedis must entende
And by the custum make no delayes
But that he must therto condescende
And leuer he had his fader toffende
As in such caas than thrugh negligence
Vnto his goddys for to do offence
Wherof his fader had indignacion
The caas arectinge to vnkindnesse
And therof caught a greate occasion
Ageyne his sonne of frowarde wylfulnes
For princys oft of furious hastynes
Wyl pike a quarell causeles in sentence
Ageyne folke absent though there be none offence
And sūme tunges venemous of nature
Whan they {per}ceyue that a prince is meuyd
Tagregge his Ire doo their besy cure
With fals langage to make him more greuyd
But there is no poyson so wel expert nor preuyd
As is of tunges the hatefull violence
Namely whan princis list yeue theym audience
The feest accomplisshed of mighty hercules
Al Innocent of double or fals menynge
This seide bisshop of wyll nat recheles
Cam to his fader withoute more taryinge
Chaungyd nouther habyte nor clothinge
With all thensignes and in the same wise
As he tofore had done sacrifise
Anone his fader made no delay
Without excuse it wolde be no be••
Of hasty rancoure the silf same daye
Made him be hanged vpon an hye gybet
Lawe and iustise were both aside set
And tyrannye moost furious and wode
To do vengeaunce in trouthes place stode
Who can or may tyrauntys well descryue
Whoos marciall swerdis been whet ay for vengeaūce
Their blody thurst doth through their hertis ryue
Ther erys ay opyn to here of him myschaunce
Their furious merth their mortal wode plesaunce
Their pale smylinge their laughter of fals hatrede
Concludeth euer vpon sūme cruell dede
They be mynistres to parcas sustren thre
To vntwyne the thredys of folkes here mortall
And very cosyns through hasty cruelte
Vnto the wode furies infernal
Children to pluto of vengeaunce marciall
Which for their vices but they bere theym wele
Shall turne in helle on Ixions whele
Thus malleus fader moost vnkinde
Lyke such a tyraunt shed oute his cruelte
As ye haue herde and after as I fynde
Of furious herte and of olde enmyte
By force is entred cartage the cite
And slough all tho in his hatefull yre
That him afore had exyled into Tyre
Wrought after wyll and no thinge after right
Gan robbe and spoile that noble famous toun
Which made him hatyd in the people sight
For his outrage and greate extorcion
Hauynge no ioye nor consolacion
Within his herte pleynly nor gladnesse
Saue lyke a tyraunte the people to oppresse
The people of cartage sore gan to compleyne
Vpon their missheef and desolacion
As bochas writeth rehersinge in certeyne
Wyl is a stepmoder of wyt and of reson
And where that princis haue domynacion
And by fals pillage to riches clymbe vp fast
Trust right well their lordship may nat last