Here endith a compendiouse treetise dyalogue. of Diues [and] paup[er]. that is to say. the riche [and] the pore fructuously tretyng vpon the x. co[m]man̄mentes ...

The v. chapter

DIues.

Why bad god that we shulde thynke to ha∣lowe wele the holiday and the sa¦bot.

Pauper.

Ther is thre ma∣ner of sabottes / that is to say. of reste or of halowynge. Scilicet. pectoris temporis et eternitatis That is to say of reste of hert / of tyme / and of endelesse restynge. By reste of hert and of thought. men come to reste of tyme. And by reste of thought and of tyme. men come to endlesse reste. Soo withouten reste. of herte and of thoughte / may no man come to endelesse reste that the sabot and the holiday betokneth And ther¦fore god bad vs that we shulde principaly trauayle to haue sa∣bot & reste of herte and of thouʒt withoutē whiche rest & sabot we may nat wele halowe any holy∣day And therfore Cryste sayd in the gospel. y^t out of the hert whā it is oute of reste / come wycked thoughtes māslaughters / auou¦tryes / lechery / theftes / false wyt¦nesses / dispyte of god. M^t xv.c. whiche synnes distroye charitie. & peas / and been causes of moch vnreste in this worlde / and lette reste of tyme / so that vnnethes. may any tyme be reste And ther∣fore god saith. thynke that thou halowe wele thyne holiday. Be thynke the if thou be in charitie and reste of herte with god & mā And if thou be stired ayēst thyn euyn cristen by wrath hate or en¦uye. or haue any heuy hert ayēst thy brother / go as god biddeth ī the gospel and be firste reconsey¦led to thy brother / & than come & make thyn offryng of holy pray¦er of thankynge of prisyng / and of thy giftes to god And butt thou do so and putte away alle rancour and heuy hert / elles thy halowynge and thy sabot is nat plesaunte to god Also bithenke

the if thou be ī dedly synne / and repente the & be shreuen assoone as thou might in gode maner / & so offre vp thy self to god by cha¦rite / and by sorowe of hert & ma¦ke thy self holy / and thāne arte thou able to halowe wele the ho¦liday For as longe as thou arte ī dedly synne by wyl or by dede. so longe thou halowest nat thy haliday For thou doste seruyle werke of synne / and doist dispy¦te to the haliday. Which is ordey¦ned that men shulde thāne amē¦de them / and serue god more spe¦cially thanne in the woke daye. And as longe as man or womā is in dedly synne / he serueth the deuyl and nat god to plesaunce Also god biddeth that mē shuld bethynke theim to halowe wele the haliday For in the halidaye namely on the sūday men shuld drawe their wittes to giddre frō the worlde and bethynke theym if they hadde oughte trespassed / that woke by recheleshede or by couetise / or by lechery / or any o∣ther wyse / and axe god foryeue¦nesse. Also thynke on the spede & benefices that god hathe sente theym that woke. or euyr bifore / and thanke hym therof. Thank him of his endeles mer∣cy / and his endelesse charite that he shewyd to mākynde Thynk hou he made mā to his owne lik¦nesse to be ayre and citezen of he¦uene. Thynke howe he made alle thynge for man. Thinke what blisse he hath ordeyned to man and woman if they do wel. What peyne if they doo euyl.