Page [unnumbered]
¶What thyng helpith moost a man̄is knowyng & getith to hym that he lackith and moost destroyeth synne in hym / Caplm lxxxxi.
ANd that maye thou doo the better & the more redily yf y• be besye for to sette thyn herte moost vpon one thynge and that thyng is nought elles but a ghostly desire to god for to please hym / for to loue hym. for to knowe hym. for to see hym / and for to haue hym by grace here in a lityll felynge. & in the blysse of heuen in a full beyng / This desyre yf thou ke¦pe it shall wel telle the whiche is synne & whiche is not / & whi¦che is good & whiche is better good / And yf thou wolt festen thy thoughte therto it shall teche the all that the nedeth / and it shall gete the all that the wanteth / And therfore whan yu shal¦te ryse ayenst the grounde of synne in generall or elles in ony speciall synne. hange fast vpon this desyre. and sette the poyn¦te of thy thoughte more vpon god whom thou desyrest than vpon the synne whyche thou repreuest / For yf thou doo soo then̄e fyʒteth god for the / & he shal destroye syn̄e in the. Thou shall moche soner come to thy pourpoos yf thou doo soo thā yf thou leue thy meke desyre to god pryncypally. & wyll sette thyn herte oonly ayenst the stirynge of synne / as though thou woldest destroye it by maystry of thyself / thou shalt neuer soo brynge it abowte /