Prolicionycion [sic]

¶ Capitulum quartum

IN the fyftyest yere of kynge edwardes regne on Trynyte sondaye that yere the eyghte daye of Iuyn deyde the noble Prynce edward at kenyngton / and brought to westmestre wher he had his obsequye / and fro thens caryed to caunterburye / and there worshipfully beryed besyde saynt thomas shryne / Aboute this tyme bartholus & baldus greete doctours of lawe were in her floures / After the deth of pope gregory the / xj began the worst scysme that euer was in the chirche whiche dured xl / yere / For at rome was vrban the syxthe chosen by force & strength of the

Romaynes / And this dyde the Cardynals for drede / ageynste theyr entente and wyll / therfore they fledde to the cyte fundorum saynge hym not to be pope / And chose in his place Robertum de gebennis / the same yere whiche was named the seuenth clement And thus beganne the scysme / In the fyfthe yere the mayre of london Adam stable was dyscharged the / xxj day of marche / And nicholas brembre chosen by vertu of a lettre that cam from the kyng / The same yere was a grete parlemente at westmynstre / in whiche the kynge axyd a grete subsydye / but the Commynes answerd that they myght no lenger bere suche charges / and sa∣yde they knewe wel that the kynge had good ynowgh for hym self and for sauyng of his Royame / yf the Royamme were well gouerned / but it hadde be longe euyl ruled by euyl offycers that the londe myght not be plentiuous of chaffare marchaūdyse ne Ryches / & shewyd many complayntes of dyusers officers of the Royamme / And namely on the lord latemer the kynges chā¦berlayn / and on dame Alyce pyers / for grete wronges that mysgouernaunce that were done by theyr counseylle / desyrynge that they sholde be remeuyd and other putte in theyr stede / suche as were wyse true / wel proued and of good gouernaunce / And soo amonge all other they chees Syre Pyers delamare a wyse knyght and eloquent for to be speker for the commynes / And by cause the same Syre Pyers tolde and publysshed the trouthe / rehersynge the wronges don by dyuerse personnes of the kynges hous / Anone after the deth of the good prynce Edward he was putte in to p••rpetuel prysonne / ¶ The same yere anone after Candelmasse durynge the sayd parlement a subsy∣dye was graunted to the kynge bothe of the Clergye / and of the temporalyt•• / that is to saye of the temporalyte of euery per∣sone passynge fourten yere of age / he shold haue four pens / except p••ure beggers / And of euery man of hooly Chirche benefyced or promoted twelue pens / and vnpromoted foure pens / excepte the four ordres of Freres / ¶ The same Rychard Prynce Edwardys sonne was made prynce of wales / And to hym the kynge gafe the Ducherye of Cornewayle / and the Erldome of chestre / ¶In the / lij / yere of kynge Edwardes regne the / xj / kalendys of Iuyn the sayd kynge Edward deyde in his maner at Shene / and from thens brought to westmynstre / and there buryed worshipfully atte southe syde of saynt edwardes Shryne On whoos soule god haue mercy / Amen /