Prolicionycion [sic]

¶ Capitulum 19

ABoute this tyme Pope martyn deyde / And after hym Eu∣genye the fourth was pope / This was pesybly chosen in Ro¦me by the Cardynals and was very and Indubytate pope / But shortly after he was putte and expulsed oute of Rome / in suche wyse that he was fayne to flee naked / ¶ In this tyme was the counseylle of basyle / to whiche counseylle he was cyted to come / and bycause he cam not they deposed hym / but he rought not ne sette not therby / but gate the Cyte of Rome. and abode stil pope seuentene yere / ¶ This yere aboute whitsontyde the He∣retyks of praghe were destroyed / For at two iourneyes were des¦troyed of them moo than twoo and twenty thousande with her Capytayns / that is to wete Procapius / Saplico / and lupus pres¦biter / ¶ Also ther was taken a lyue mayster Pyers clerk an Englysshman and heretyke / Also this same yere was a grete froste and a stronge duryng enleuen wekes / For it beganne on saynt katheryns euen / and lasted vnto saynt Scolasticais day in Feuerer in which tyme the vyntage that cam from bordeux cam ouer shoters hylle / This yere was the counseyl of Aras and a greete traytye bytwene the kyng of Englonde and the Frensshe kynge / where was assemblyd grete many of lordes of bothe par¦tyes / At whiche counseylle was offryd to the kyng of Englond many grete thynges by the moyen of a legate that cam from ro∣me / whiche was Cardynal of saynt Crosse / whiche offres were refused by the Cardynal of Englond and other lordes that we∣re there for the kyng / wherfor the duke of burgoyne whiche had ben longe Englysshe sworne forsoke oure partye / and retourned Frensshe by the meene of the same legate / and made a pees with the Frenssh kyng receyuynge of the kynge for recompensynge of his faders deth the counte of pontieu / the lordship of macon with moche other as is specyfyed in the sayd trayttye / And soo oure ambassadours cam hoome ageyne in wers•• caas than they wente / For they lost there the duc of Burgoyne / whiche hadde

ben with his bourgonyons and pycardes a synguler helpe in all the conquest of normandy and of Fraunce / This same yere was a grete batayll on the see bytwene the Ieneweys and the kyng of Aragon / of whiche bataylle the Ieneweys had the vyctorye / For they toke the kynge of Aragon / the kyng of nauern / and the greete mayster of saynt Iames in galyse with thre honderd knyghtes and squyers and moche other peple / And this was on saynt domynyks day· This yere were seen thre sonnes attones And anone folowyd the threfolde rule and gouernaunce in the chirche / that is to wete / of Eugenye / of the counseyle / and of the neutralyte / Also this same yere 1434 was a passyng grete wyn¦de by whiche steples howses and trees were ouerthrowen / Aboute this tyme was an hooly mayde in holond callyd lydwith whiche lyued longe only by myracle not etyng ony mete / This yere the duc of burgoyne byganne his ordre at lyle of the golden flyes· and ordeygned certayne knyghtes of thordre / and made statutes and ordenaunces· moche acordynge vnto thordre of the garter. Also this yere the Frensshmen hadde enterprysed to haue stolen Calays in the fysshyng tyme / For many bootys of Fraunce had sauf conduytes to come to Calays for to take bee∣ryng / And the soudyours of the toune hadde a customme to come to the chirche and leue theyr stauys stondynge at the chirche dore whiche stauys the Frensshmen which̄ were arayd lyke Fysshers hadde purposed to haue taken soo theyr wepen / and wynne the toune / but one of them laye with a comyn woman the nyght by¦fore / and tolde to her theyr counseylle / And she on the morne told the lyeutenaunt / whiche forthwith commanded that euery man shold kepe his wepen in his hond sacryng tyme and other / And whanne they apperceyued this that they were myspoyn∣ted / they sayled strayte to depe and stale and toke that Toune / And on newyers euen after they toke harflete /

And thus Englysshmen byganne to lose a lytel and a lytel in Normandye /