Prolicionycion [sic]

¶Capitulum xviij

IN the fourth yere the same nyght that the mayer of london iohan Couentre had taken his charge was a grete watche

in london for affraye that was bytwene the bisshop of wynches∣tre / and the duc of gloucestre protectour / For the mayer with the peple of the Cyte wold abyde by the duc of gloucetre as protec∣toure of the Royamme / but by labour of lordes that wente by∣twene / And in especial by the labour of the prynce of Portyn∣gale ther was appoyntement taken that ther was no harme don And after the bataylle of vernoyll in Perche the Duc of Bed∣forde cam ouer in to Englond / And on whitson••aye this yere at leyceter he dubbed kynge harry knyght / And forthwith the sayd harry dubbed alle these knyghtes / whoos names folowe / that is to wete Rychard duc of york / Also the sone and heyr of the duc of norfolk / therle af Oxenford / therle of westmerlond / the sone and heyr of therle of northumberlond / the sonne and heyr of ther∣le of vrmond / The lord Roes / Syr Iames buteler / the lord ma¦trauas / Syr harry gray of Tankeruyle / Syr william neuyl lor∣de Fauconbrydge / Syr george neuyl lord latymer / the lord wel¦lys the lord barkley / the sonne and heyr of the lord Talbot / Sir Rauf gray of werk / Syr Robert veer / Syr Rychard gray / Sir Edmond hongerford / Syr Robert Wynkefeld / Syre Iohan boteller / Syr Raynold Cobham / Syr Iohan passhely / Syre tho¦mas tunstal / Syr Iohan Chydyock / Syre Rauf Langford / Syre william drury / Syre william apthomas / Syre Rychard Carbonel / Syre Rychard wydeuyle / Sire Iohan shyrdelowe / Syr nychol blonket / Syre Rauf ratteclyf / Syre Edmond traf∣ford / Syre william cheyne / Syre william Babyngton· Syre Io∣han Iune / Syr gilbert beauchamp / ¶ Item / In the fyfthe yere the duc of Bedford with the duchesse his wyf wente ouer see to Calays / And a lytel tofore wente ouer harry Bisshop of wynchestre / And on our lady day Annunciacion in our lady chir¦che at Calays the Bisshop of wynchestre whanne he had songe masse was made Cardynal / And he knelyng to fore the hye au¦ter the duc of Bedford sette the hatte on his heede. and ther we∣re his bulles redde as wel of his charge as the reioysyng of his benefyces spirituel and temporel / Also this yere was greete habundaunce of Rayn / that the substance of heye and Corne was destroyed / For it rayned almoost euery other day / ¶This yere the goode erle of Salesbury Syre thomas montagu leyd syege vnto Orleaunce / At whiche syege he was slayne with a gonne / whiche cam oute of the toune / on whoos sowle god haue mercy Amen / For syth that he was slayne Englisshmen neuer gate ne

preuayled in Fraunce / but euer after beganne to lese lytel and lytel tyl all was loste / ¶ Also this same yere a breton murthred a good wydowe in her bedde withoute Algate / which wedowe fonde hym for almesse / And he bare awey al that she hadde / And after this he toke the gryth of hooly chirche at seynt Georges in southwerke / and there toke the Crosse and forswore this lond / And as he wente it happened that he cam by the place where he dyde this cursyd dede in the subarbys of london / And the women of the same paryssh cam oute with stones & ca∣nel dunge and slewe and made an ende of hym / Notwithstan∣dynge the Conestable s and many other men beyng there present to kepe hym / For ther were many women· and had noo pyte / Also this yere the duck of norfolke with many gentilmen and yomen toke his barge the eyght day of nouembre at saynt mary ouerayes for to haue goon thurgh london brydge / and thurgh mysguydyng of the barge / it ouerthrewe on the pyles / and many men drowned / but the duc hym self with twoo or thre leepe vpon the pyles / and soo were saued with helpe of men that were aboue the brydge / whiche cast doune Ropes / by whiche they saued hem self / ¶ This yere on saynt leonards daye kynge harry beynge seuen yere of age was crowned at westmynstre / at whos Coronacion were made syx and thyrtty knyghtes /

This yere on saynt georges day he passyd ouer see to Calays to∣ward Fraunce / Aboute this tyme and afore the Royamme be∣ynge in grete myserye and trybulacion· the dolphyn with his par¦tye beganne to make warre and gete certayne places / and make destrusses vpon Englysshmen / by the mene of his Capytaynes / that is to wete la heer and poton de sentraylles / And in especial a mayde / whiche they named la pucelle de dieu / this mayd roode lyke a man / and was a valyaunt Capytayne among them and toke vpon her many and grete enterpryses in soo moche that they had a byleue to haue recouerd al theyr losses by her / Notwithstā¦dyng at last after many grete feates by helpe and prowesse of sir Iohan luxemburgh whiche was a noble Capytayne of the du / kes of Burgoyne / and many Englysshmen pycardys and bour¦goygnons whiche were of oure partye / byfore the toune of Com¦pyne the thre and twentyest daye of maye the sayd pucelle was taken in the felde armed lyke a man and many other capytayns with her / And all broughte to Roan / and there she was putte in prysonne / and there she was Iuged by the lawe to be brente /

And thenne she sayd that she was with childe / wherby she was respyted a whyle / but in Conclusion it was founde that she was not with childe / And thenne she was brente in Roan / And the other Capytaynes were putte to raunsonne / and entreated as men of warre ben acustommed / ¶ This same yere aboute Candelmasse Rychard hounden a wolle packer was dampned for an heretyke / and brente atte tourhylle / And aboute midlente Syr thomas baggely preeste and vycary of mauenden in Estsex besydes walden was disgrated and▪ dampned for an heretyke / and brente in Smythfeld. ¶ Also in this yere while the kynge was in Fraunce / ther were many heretykes and lollars / that hadde purposed to haue made a rysyng / and caste bylles in many places· but blessyd be god the Capytayne of hem was ta¦ken· whoos name was william mandeuyle a weuar of Aben∣don and bayly of the same toune / whiche named hym self Iak sharp of wygmoryslonde in wales / And afterwarde he was byhe¦ded at Abendon in the whitsonweke / on the tewisdaye /

¶ This yere the seuenth day of december kynge harry the syxthe was crowned kyng of Fraunce at parys in the chirche of oure lady with grete solempnyte / There beyng presēt the Cardynal of englonde / the Duc of Bedforde / and many other lordes of fraū¦ce and of englonde / And after this Coronacion and grete feste holden at parys / the kyng retourned from thens to Roan and soo towārde Calays / And the nynthe daye of Feuerer londed at douer / whome alle the Comyns of kente mette at beramdoun / bytwene caunterbury and douer alle in reede hoodes / And soo cam forth till he cam to blackheth where he was mette with the mayer Iohan wellys with alle the craftys of london cladde alle in whyte / And soo they brought hym to london the one and twē¦tyest daye of the same moneth / This yere was a restraynt of the wollys at Calays made by the sowdyours / by cause they were not payed of their wages / wherfor the duc of Bedford regente of fraūce being thēne Capitayn cam to Cal̄eis the tewsday in the esterweke / & on the morne after many sowdiours of the toun we¦re arested / and putte in warde / And in the same weke he roode to terewyn / And by the mene of the bisshop of Terewyn he wed∣ded therles doughter of saint poul / and cam ageine to Caleis /

¶ And the enleuenst daye of Iuin on saint bernabes daye there were four•• soudyours of Calays that were chyef causers of the restraynt byheded / that is to wete Iohan maddeley / Iohan

lu••daye / thomas palmer / and thomas Talbot / And an Cx / banysshed the toune that same tyme / And byfore were banysshed ••ixe score soudyours / And on mydsomer euen after cam the lord Regent and his wyf to london /