Prolicionycion [sic]

¶ Capitulum 40

AFter the fyfth Celestinus the eyght bonefas was Pope enleuen yere / This popes fyrst yere was a yere of grace / that yere he graūted large & grete pardō to pilgrims that

wolde come to Rome and vysyte the Apostles Peter and paule / He made the syxth boke of decretales therin he determyned many grete doutes / he encorpored many grete constitucions extrauagāt / as the Constitucion of honorius of adrian / of innocencius of cle∣ment and of other popes / and dyde awey al that was wrongful A constitucion that is not put / in the cours of lawe is cleped a cō¦stitucion extrauagant / This begyled his predecessour Celestinus & made hym to resygne vp the poperyche and torne eft to ankers lyf / men seyn that therfor celestin{us} prophecyed of hym in this ma¦ner / thou come vp as a fox / thou shalt regne as a lyon / and dye as an hound / for he made pope Celestinus make a cōstituciō that he & euery pope myghte frely resygne vp the poperyche / & whan he was pope he reuoked the same constitucion / ¶ than he ruled strongly & sette doune somme Cardynals & som gentilmen de co∣lumpna / and withstode the kyng of Fraunce in many poyntes & not only that but h•• founded with all his myghte to set doune the kyng of Fraunce / therfor the stuward of fraunce william de lon¦garet a wyse man and f••r castynge / and the forsayd bretheren de columpna conspyred to geders· And toke pope bonefas and se••t hym vpon a wylde hors withoute brydel and torned his face to∣ward the tayl and made hym prycke so aboute to the last brethe & slewe hym so with pryckynge & with honger / Iohn de baylloll that was made kyng of Scotland aroos ageynst the kyng of en¦glond & ageynst his owne othe / and that by counseyll of somme men of Scotl••nd & namely of the abbot of menros / But Iohan was take and dissheryted / ¶ Thenne the yere after williā waleys of the nacion of Scottes arrayd werre ageynst kyng ed∣ward / but he was chaced the second yere after ¶ kyng edward slew / lx / M / Scottes at fouchirch on a mary maudelyn day but the Scottes wexed stronger & stronger / xxx / yere to geders vnto kyng edwardes tyme / the thyrd after the conquest / & beete doune englysshemen oft and englysshe places that were nygh to her mar¦ches / Somme sayde that that myshappe fylle for softenesse of englyssh men / and somme sayde that it was goddes owne wrech as the Prophecye sayde that englysshe men shold be destroyed by danes / by Frensshe men & by scottes / as it is touched in the ende of the fyrst book / The kyng made seyse in to his hond al the tempo¦ralyte of clerkes & put hem oute of his protection for they wold not reward him of her catail the yere before aiēst the scottes for by assēt of the clergy robert tharchebisshop had purchaced an inhibiciō

of the pope that no clerke shold rewarde the kyng of holy chirche goodes / but many clerkes purchaced for drede the kynges protec¦tion withoute the counseyl of the lordes / kyng edward with ly∣tel serengthe of englysshe men / and walsshmen sayled in to flaū∣dres as it were ageynst the kyng of Fraunce / It was a co∣myn sawe that kyng edward loued so blaūche the kynges dough¦ter of Fraunce / that he wold gladly yelde vp gascoyn to the kyn¦ge of Fraunce for his doughter blaunche / but for Edward was olde and blaunche wās a yonge wenche / kyng edward wedded margaret the kynges syster of Fraunce / and gate on hir twey sonnes thomas and Edmonde / kynge edward dampned sodanly fals money that was slyghtly brought vp / Men clepin that mo¦neye pollardes / Crokardes / and Rosoryes and were putte forthe lytel and lytel & pryuely in stede of shyllynges / Fyrst he made one of hem worth an halfpeny / and than he forbad hem aboute / Also this yere edmond erle of Cornewayle deyd without chil¦dren / This edmond was the sonne of Rychard Erle of Corne∣wayle / and kyng of almayne and soo that erldome fyll ageyne to the crowne / This yere was a yere of grace / in the whiche wēt many pylgryms to Rome / kyng edward yaf his sonne edward the pryncypate of wales and the Erldome of Chestre / At london william waleys leeder of scottes was honged and dra¦wen / his heede was smyten of and sette vpon the brydge of lon∣don al men to beholde that there wolde passe· His body was quar∣tred and sente in to dyuerse places of englond / this yere kyng ed¦warde sente to pope bonefas lettres to declare the ryght and the lordship that Englonde hath ouer the Royamme and kynges of Scotlande / For Robert le bruys had pleyned to the Pope that kynge edward greued wrongfully the Royamme of Scotland Therfor the pope wrote to the kyng of englond that he sholde le∣ue of suche greuynge / but he myght shewe clerly his ryght / After the eyght bonefas the enleuenth benette of the ordre of pre¦chours was pope not fully one yere / Of hym one sayde in this maner / A re nomen habe benedic benefac benedicite / Aut rem per¦uerte maledic / malefac maledicite / that is / haue thy name of thy dede / say wel / doo wel y blessyd. Other torne the dede / say euyl / do euyl acursyd / he sayth thus for benet is benedictus in latyn bles¦syd in englysshe / After benet the fyfte Clement was Pope as it were twelue yere / he trauayled aboute byldynge of Castels and gaderyng of tresour / he dampned thordre of Templers / & ordeyned

the seuenthe booke of decretales that hyghte Clementynes / And soone therafter in a counseyl that he made at vyen / he reuoked the same booke / but his successour the two and twentyest pope Io¦hn renewed efte that boke / and publysshed it and putte it to the cours of lawe canon / ¶ This Clement was the fyrst that chaungyd the popes see from Rome to Auinion / Men wondren of that dede whether it were done by goddes ordenaunce / other by mannes foule hardynesse ¶ Also that yere kyng edward made hard inquisicion ageynst euy•• doers and ageynst hem that trespassed ageynst the crowne / that maner inquisicion hight tra∣ylbaston / Robert de bruys toke wronfully the kyngdome of scot∣lande / and aboute Eester he slowe Iohan le comyn at dunfre in the chirche of frere menours / for he wold not assēt to hym in that trayson / but the kyng of Englond cam and chasid this Robert and benge the sleers of this Iohan ¶ That yere kyng Ed¦warde deyd at Carleel and made piers of ganeston that was pryuy with his sonne forswere the londe of Englond