Prolicionycion [sic]

¶ Capitulum 39

AFter the deth of alysaunder kynge of Scotlānd that dyed withoute children grete stryf was y moeued who shold be kyng of Scotland after hym / & for many chalengyd that kyng∣dome by cause of nygh kynred & of bloode and that myght not be determyned al full withoute the presence of the cheef lord / Than it was founde by wrytyng autentyk and old that the kyng of englond is cheef lorde of scotland / and that he shuld knowe and deme in suche a maner caas / and for that it shuld be knowen af∣ter his tyme / This yere kyng edward made serche all thabbayes of Englond of Scotland and of wales for to wytte and kno∣we what ryght he had in that maner dede / Than in the cronykes of maryan the scotte / of william of malmesbury / of Rogyer of huntyngdon & of raph le bruys hit was founde that in the yere of oure lord nyne honderd and ten kyng edward the elder made subgette the kynges of scotland and of Cumbres / Also in the sa¦me cronykes it was founde that in the yere of our lord nyne / C / and one and twenty these forsayd men scottes and Cumbres che¦se the forsayd edward the elder to be her lord and her patrone / Also there it was founde that the yere of our lord nyne honderd and syx and twenty Adelstan kyng of englond ouercome Con∣stantyn kyng of scotland and suffryd hym eft to regne vnder him Also Adelstans broder Edredus kyng of englond ouercome the scottes & the northumbres / & they submytted hem self to hem and swore hym feute / Also there it was found that edward kyng of englond ou{er}come alpin{us} sone kynadius kyng of scottes that swore hym feute / Also there it was foūd that canutus kyng of englōd & of denmarche the yere of his kyngdom xvj ouercome malcolin kyng of scotland & therafter he was kyng of four kyngdoms of englond of scotland of denmarche and of norwey / Also there it was founde that saynt edward yaf the kyngdom of scotland to malcolyn that was the kynges sone of cumbres to holde of him Also williā bastard the syxt yere of his kyngdom ouercome mal¦colyn kyng of scotland & toke of hym an oth of homage & feu∣te / also williā the rede did in the same wise as his fader had don

to m••lcolyn kyng•• of Sco••land and to mal••olyns twey sonnes that regned on•• after other / Also Alysander was his brothers successor edgar in the royam of scotland by assente of kyng henry the fyrst / Also dauyd kyng of scotland dyd homage to kyng ste∣uen / Also william kyng of scotland dyd homage to the thyrdde henry / the second henryes sone in his coronacion / And also to hen¦ry the fader in his twentyest yere of his kyngdome / as it is wry∣ten in a couenaunte that was wryten bytwene hem tweyne / Also rogyer of hūtyngdon sayth / that william kyng of scoland cam to his lord kyng henry in normandy / & dyd homage also to kyng rychard / & to kyng Iohn at lyncolne / Also on saynt albōs cronykes it is foūde that alisander kyng of scotland wedded mar¦garet kyng henryes doughter at york & dyd hym homage the ye∣re of kyng henry xxxv / the same is foūde in the kynges chartr••s of scotlād / also in the popes bulles that were sent in to scotlād it is foūd that the kinges of scotlād were acursid for they wold not be buxom & be obedient to her lordes kinges of englond / than cam to geders at norham in thendes of englond toward scotlande the kyng of englond with his wise men / & the kyng of scotland with the redyest men & worthyest that he had / there the kyng of englōd axed fyrst that the scottes shold pesybly assente 〈◊〉〈◊〉 is ordenaū¦ce / touchyng the kyng of scotlād / namely for it longed to him by cause by his cheef lordship / the scottes sayde that they knewe none suche soueraynte that longed to the kyng of englond / & saide that they myght not answer to such thinges without an hede & a king to whom it longeth to here such tretynges / & y^t they shold yeue no¦ne other answer at that tyme for her oth that they had made eche to other after kyng alysanders deth / the whiche oth they must bol¦de vpon peyn of cursynge / than kyng edward toke aduisement & made his lettres patēt to the scottes & knowleched that the coming of the scottes in to englond a this half the water twede shold not eftsones be to him preiudice of comyng eft in to englond ••eraft••r the grettest of scotlond & of englond that chalengid right of the succession in the kyngdome of scotland knowleched / & graūted by theyr lettres patent that they wold with good wyll receyue right byfore this kyng / as before the cheef lord / & they wold holde fer∣me & stable al that he wold ordeyne in this forsaid dede / but for it semed wise men at that tyme that king edward myght yeue no right of succession in the kyngdom to no man but yf he had erst right and possession in the kyngdome of scotlande / Therfore in

the kynges syde of englond surete was made to the scottes that the kyngdome sholde be restored within twey monethes to hym that had ryght therto vpon peyn of an honderd thousand pound sterlyngis that shold be payd at Rome in helpe of the hooly lond And also vpon peyne of cursyng and enterdytyng of the kynge and of the Royamme of englond yf he wold not restore the kyn∣gedom as it is sayd / And so the scottes with her chartres yafe & bytoke to kyng edward the kyngdome of Scotlond / with Cas∣tels with ryght with custommes and vsages / & sette wardeynes that sholde saue to hym that had ryght al the auaūtage & profite of the land in the mene tyme / whan this was don after long ple and disputacion in eyther syde of hem that chalengyd that kyng∣dom the kyng of englond toke heede of the strength of the resons and euydences in eyther syde and yaf the dome for Iohan de bail¦lol / & Iohn knowleched that the king of englond is cheef lorde of Scotland· and dyde hym hommage and swore hym fewte / This yere deyd Frere Iohan pecham archebisshop of Caunterbu¦ry / ¶ Mayster Robert of wynchestre was Archebysshop after hym / a••so that yere madoc a walshman rered warre in wales on a mychelmesse day / therfor kynge edward cam to Chestre aboute saynt nycolās feste / and toke the yle of mon that is callyd Angle¦sia in latyn and bylded newe the cyte and castel de beel marys / That tyme the wodes in wales were hewen doune that were gre¦te socour to men of the contray to hyde hem self in warre tyme / & strong castels were made in dyuers places by the see syde / And sone herafter this madoc was taken and brought to london / After that tyme werre cessed in wales and walsshmen lyued as englysshe men and gadred tresour and dredde lost of catayl / that tyme kynge edward made serche alle the abbayes of Englond & bryng to london all̄ the money that was y founde / Also he made arrest all the wulles and felles / & therafter fyll a grete derthe of Corne and of wyn