¶ How kynge Edwarde dyd all maner thynge that syr Hugh Spenser wolde.
ANd whan kyng Edward herde these tydynges / he remeued his syege from Barwik & came agayn in to Englonde. But syr Hugh Spenser the sone that was ye kynges chamberlayne kepte so the kynges chambre / yt no man myght speke with ye kynge. But he had made with hym a f••ette for to do all his nede / & yt ouer mesure. And this Hugh bare hym so stoute / that all men had of hym scorne and despyte. And the kynge hymselfe wold not be gouerned ne ruled by no maner man but onely by his fader and by hym. And yf ony knyght of Eng∣londe had wodes / maners or lōdes / that they wolde coueyte / anone ye kyng must gyue it them / or els the man that ought it sholde be falsly endyted of forfayte or felouy. And through suche doynge they disheryted many a bacheler / & so moche loude he gate that it was grete wonder. And whan ye lordes of Englonde sawe ye grete couetyse & the falsnes of syr Hugh Spenser the fader & syr Hugh the sone / they came to ye gentyll erle of Lancastre and asked hym of coūseyle of the dysease that was in ye realme through syr Hugh Spenser and his sone. And in haste by one assent they made a preuy assemble at Shyrburne in Elmede / and they made there an othe for to breke & dystrouble ye doynge bytwene ye king & syr Hugh spen ser & his sone vpō theyr power. And they wēt in to ye marche of wales & destroyed the londe of the foresayd syr Hughes.