Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
About this Item
Title
Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang
Author
Malory, Thomas, Sir, 15th cent.
Editor
Caxton, William, ca. 1422-1491, Sommer, H. Oskar (Heinrich Oskar), b. 1861
Publication
London: David Nutt
1889
Rights/Permissions
The University of Michigan Library provides access to these materials for educational and research purposes. These materials are in the public domain. If you have questions about the collection, please contact mec-info@umich.edu. If you have concerns about the inclusion of an item in this collection, please contact libraryit-info@umich.edu.
"Le Morte Darthur / by Syr Thomas Malory ; the original edition of William Caxton now reprinted and edited with an introduction and glossary by H. Oskar Sommer ; with an essay on Malory's prose style by Andrew Lang." In the digital collection Corpus of Middle English Prose and Verse. https://name.umdl.umich.edu/MaloryWks2. University of Michigan Library Digital Collections. Accessed May 27, 2024.
Pages
¶ Capitulum liij
SOo on a daye la beale Isoud sayd vnto sir Tristram
I merueyle me moche said she / that ye remembre not
your self how ye be here in a straunge countrey and here be
many peryllous knyghtes / and wel ye wote that kyng Marke
is ful of treason / and that ye wylle ryde thus to chace and to
to hunte vnarmed ye myghte be destroyed /
¶ My fayr
lady and my loue I crye you mercy I wille no more doo soo
Soo thenne sire Tristram rode dayly on huntynge armed and
his men berynge his shelde and his spere / Soo on a day a
lytyl afore the monethe of may syre Tristram chaced an hert
passynge egerly / and soo the herte passed by a fayr welle / And
thenne sir Tristram alyghte and putte of his helme to drynke
of that burbley water / Ryght soo he herd and sawe the
questynge beest come to the welle / whan syre Tristram sawe that
beste / he putte on his helme for he demed he shold here of sir
Palomydes / for that beste was his quest /
¶ Ryght so sir Tristram
sawe where came a knyghte armed vpon a noble courser / and
he salewed hym / and they spake of many thynges / and thys
knyghtes name was Breuse saunce pyte / and ryght so with
alle there came vnto them the noble knyghte sire Palomydes /
and eyther salewed other / and spake fair to other
descriptionPage 501
[leaf 251r]
Fair knyghtes said sir Palomydes I canne telle yow
tydynges / what is that said tho knyghtes / Syrs wete ye wel that
Kynge Marke is put in pryson by his owne knyghtes / and
alle was for loue of sire Tristram / for kynge Marke hadde put
syre Tristram twyes in pryson / And ones sire Percyuale
delyuerd the noble knyghte sire Tristram oute of pryson
¶ And at the laste tyme Quene La beale Isoud delyuerd
hym / and wente cleryly aweye with hym in to this reame / &
alle this whyle kynge Marke the fals traytour is in pryson /
Is this trouthe said Palomydes / Thenne shall we hastely
here of sire Tristram / And as for to say that I loue la Beale
Isoud peramours I dare make good that I doo / and that
she hath my seruyse aboue alle other ladyes / and shalle haue
the terme of my lyf / And ryght soo as they stood talkynge /
they sawe afore them where came a Knyghte alle armed on a
grete hors / and one of his men bare his sheld / and the other
his speres / And anone as that Knyght aspyed them he gatte
his shelde and his spere / and dressid hym to Iuste
¶ Fair felawes said sire Tristram yonder is a Knyghte wil
Iuste with vs / lete see whiche of vs shalle encountre with hym
for I see wel he is of the courte of Kynge Arthur
¶ It shalle not be longe or he be mette with alle said sire
Palomydes / for I fonde neuer noo knyght in my queste of this
Glastynge beest / but and he wold Iuste I neuer refused hym
¶ As wel may I said Breuse saunce pyte folowe that beest
as ye / Thenne shalle ye doo bataille with me said Palomydes /
Soo syre Palomydes dressid hym vnto that other Knyghte
syre Bleoberys that was a ful noble Knyghte nyghe kynne
vnto sire Launcelot / And soo they mette soo hard / that syre
Palomydes felle to the erthe hors and alle /
Thenne sir Bleoberis cryed a lowde and said thus / make the
redy thou fals traytour knyghte Breuse saunce pyte / for wete
thow certaynly I wille haue adoo with the to the vtteraunce
for the noble knyghtes and ladyes that thou hast falsly
bitraid
¶ Whanne this false knyght and traitour
Breuse saunce pyte herde hym saye soo / he took his hors by the
brydel and fledde his waye as faste as euer his hors myghte
renne / for sore he was of hym aferd /
¶ Whan syr Bleoberys
descriptionPage 502
[leaf 251v]
sawe hym flee he folowed faste after thorugh thycke and
thorugh thynne / And by fortune as sir Breuse fledde / he sawe
euen afore hym thre knyghtes of the table round / of the
whiche tho one hyghte sire Ector de marys / the other hyghte syre
Percyuale de galys / the thyrdde hyghte sir Harre de fyse lake
a good knyght and an hardy / And as for syr Percyuale he
was called that tyme of his tyme one of the best knyghtes of
the world and the best assured / when Breuse sawe these
knyghtes he rode streyghte vnto them and cryed vnto them &
prayd them of rescowes / what nede haue ye said sire Ector / A
fayr knyghtes saide syre Breuse here foloweth me the moost
traytour knyght and moost coward and moost of vylony / his
name is Breuse saunce pyte / and yf he may gete me he wylle
slee me withoute mercy and pyte / Abyde with vs said sir
percyuale and we shalle waraunt yow / Thenne were they ware
of syre Bleoberys that came rydynge alle that he myghte /
Thenne sir Ector put hym self forth to Iuste afore them alle /
When sire Bleoberis sawe that they were four knyghtes / and
he but hym self / he stode in a doubte / whether he wold torne or
hold his waye / Thenne he said to hym self I am a knyght of the
table round / and rather than I shold shame myn othe & my
blood I wille hold my way what soo euer falle therof / And
thenne sire Ector dressid his spere and smote either other
passynge sore / but sire Ector felle to the erthe / That sawe sir
Percyuale and he dressid his hors toward hym all that he myghte
dryue / but sir Percyuale had suche a stroke that hors and man
felle to the erth /
¶ Whanne sir Harre sawe that they
were bothe to the erthe / thenne he said to hym self / neuer was
Breuse of suche prowesse / Soo sire Harre dressid his hors / &
they mette to gyders soo strongly that bothe the horses and
knyghtes felle to the erthe / but sire Bleoberis hors beganne to
recouer ageyne / That sawe sire Breuse and he came hurtlyng / &
smote hym ouer and ouer and wolde haue slayne hym as he
lay on the ground / Thenne syr Harre le fyse lake arose
lyghtely and toke the brydel of sir Breuse hors and said /
¶ Fy for
shame stryke neuer a Knyght when he is at the erthe / for this
Knyght may be called no shameful knyghte of his dedes / for
yet as men may see there as he lyeth on the groūd he hath done
descriptionPage 503
[leaf 252r]
worshipfully / and putte to the werse passynge good knyghtes
Therfore wylle I not lete saide sire Breuse / thow shalte not
chese said syr Harre as at this tyme / Thenne whanne sir
Bruse sawe that he myghte not chese nor haue his wylle / he spak
fayre / Thenne syre Harre lete hym goo / And thenne anone he
made his hors to renne ouer syre Bleoberys / and rasshed hym
to the erthe lyke yf he wold haue slayne hym / Whanne syre
Harre sawe hym doo so vyloynsly / he cryed traytour knyȝt
leue of for shame / and as sir Harre wold haue taken his hors
to fyghte with sir breuse / thenne sir Breuse ranne vpon hym
as he was half vpon his hors and smote hym doune hors &
man to the erthe / and had nere slayne syr Harre the good
knyght / That sawe sir Percyuale / and thenne he cryed traitour
knyghte what dost thou / And whan sire Percyuale was vpon
his hors / syr Breuse tooke his hors and fledde all that euer
he myght / and syre Percyuale and syre Harre folowed after
hym fast / but euer the lenger they chaced the ferther were they
behynde / Thenne they torned ageyne and came to syr Ector de
marys and to syre Bleoberys / A fayr knyghtes said
Bleoberys why haue ye socoured that fals knyght & traitour / why
said sire Harre what knyght is he / for wel I wote hit is a
fals knyght said sir Harre and a coward and a felonous
knyght / Syr sayd Bleoberys he is the moost coward knyghte /
and a deuourer of ladyes and a destroyer of good Knyghtes
and specyally of Arthurs / what is your name saide sir Ector
my name is Syr bleoberys de ganys / Allas fair cosyn sayde
Ector / forgyue it me / for I am sir Ector de marys / thenne syre
Percyuale and sire Harre made grete ioye that they met with
bleoberys / but alle they were heuy that syr breuse was
escaped them wherof they made grete dole
email
Do you have questions about this content? Need to report a problem?
Please contact us.