Layamon's Brut (British Museum Ms. Cotton Caligula A.IX)

Lines 1901 through 2000

Þer-of we habbeð sceome; & at oure herte muche grame. Line 1901 þat þu dalest þis lond; þe sculde beon o þire hond. Line 1902 Þu eært a swa hende gome; and þere eældre suster sone. Line 1903 Delest þine lond wið þine mæi; þi monscipe is þa lasse. Line 1904 Þus speken þeos swiken; and spileden mid worde; Line 1905 swa long heo hine lærde. þat he heom ileuede; Line 1906 He gadere[de] ferde; þe wes feondliche stor. Line 1907 he ferde ouer þe Humbre; and hermes he worhte. Line 1908 he herȝede he brande; folc he amærde. Line 1909 Heo sloȝen heo nomen; al þat heo aneh comen. Line 1910 Þat word com sone suð; for hit ((wes)) widen cuð. Line 1911 þet Morgan ledde muchele here; & hærmes dude þas leoden. Line 1912 Þa ihurde Cunedagius; þat Morgan is mæi ferde þus. Line 1913 þa iwerð he swiþe wrað; & þas word seide. Line 1914 Ȝets[in]ge a wurþe þe wa; monie mon þu bi-cherrest. Line 1915

Line 1915 þurh þe haueð Morgan mi mæi; is monschipe afallet. Line 1916 ah he scall hit abuggen; ȝif ich mot libben. Line 1917 Þa nom Kunedagius; & send ȝeond his cuððe. Line 1918 & gadere[de] muchel folc; and ȝeærwede his ferde. Line 1919 He fusede mid monschipe; to-ward Margane his mæie. Line 1920 Þa heo sculden fehten; þa fleh Morgan awaie. Line 1921 fro[m] londe to londe; & he him after liðde; Line 1922 In-to Wales he flæh; he him after f[er]de. Line 1923 þer he of-toc Morgan; mid muchele strengðe. Line 1924 & sloh he him of þat hæued; his hap wes þa wurse. Line 1925 & al his men slowen; þat heo neh comen. Line 1926 buten wuhlc wræcche swa cwic; cuahte to holde. Line 1927 Heo nomen Morganus liche. & leide hit on vrþen Line 1928 wel heo hine buriden; þe wes þes Wales lauerd. Line 1929 Wes þet lond. þurh Morgan. Margan ihæten; Line 1930 Cunedagius heuede al þis lond; þer-of he wes lauerd. Line 1931 þro and þritti wintere; he welde þas riche. Line 1932 inne griðe & in friþe; his frenden to blisse. Line 1933 A Cunedagius dawe; þe king wes on leode Line 1934 Remus & Romulus; Rome iwrohten. Line 1935 beine iweren ibroðeren; ah þe an sloh þene oðren. Line 1936 After þritti wintere com þe dæi; þat Cunedagius deæd læi. Line 1937 He hefte anne sune ræhne; Riwald wes ihaten. Line 1938 he wes wis he wes fæir he welde þat riche hær. Line 1939 al hit hine luuede; þat liuede in londe. Line 1940 An þan ilke time; hær com a selkeð taken. Line 1941 sulche hare nere eær ne com; ne neuer seoð[ð]en hider-to. Line 1942 From heouene her com a sulcuð flod; þre dæȝes hit rinde blod. Line 1943 þreo dæies and þreo niȝt; þat wæs swuþe mochel pliht. Line 1944 Þa þe rein wes agan; her com hider taken a-[n]an. Line 1945 Her comen blake fleȝen; and fluȝen in mone eȝene. Line 1946 in here muð in heore neose; heore lif heom eode al to leose. Line 1947 swulc. fare of fleoȝen her was. þat heo freten þet corn & þat græs Line 1948 wo wes al þen folke þe wu((ne))den an folden. Line 1949 Þær-after com swulke mon-qualm; þat lute hær cwike læfden. Line 1950 Seoð[ð]((en)) her com a strong ræd; þat Riwald kinge iwerð dea[d]. Line 1951

Line 1951 Riwald king hafuede; anne sune. Gurgustius ihaten; Line 1952 his lond he huld half ȝer; and suððen he adun halde. Line 1953 Þer-efter com Sisillius; he wes sone her deæd. Line 1954 Suð[ð]en com Lago; þa æhte wike liuede. Line 1955 Suoðen. com king Marke. he wes þritti wiken king. Line 1956 Þeo com Gorbodiago; he wes fif ȝere god king. Line 1957 Þe king hauede tweie sunen; beiene vniselie. Line 1958 þe eldere heȝte F[e]reus; þe ȝengere hehte Poreus. Line 1959 Þas breþren weren swa wode; and swa wiþer-warde. Line 1960 þat al heo weren vn-sahte. & a[l] heo weren vn-some; Line 1961 & eiþer hateden oþer. swa ne sulde na-wiht breoþer; Line 1962 and beien mid onde. heo weoren in þisse londe. Line 1963 þat Gorbidiagus heore fader; of his sunen wes a-fered. Line 1964 for ofte bi-foren him-suluen; heo bi-gunnen to fuhten. Line 1965 Þe aldre seide þat al þis lond; he wolde halden on is aȝere hond. Line 1966 þe ȝengere him ȝef swuh enswere; Ær ich þe slæ mid mine spere. Line 1967 ar þu hit sule aȝen; þa while ich beon on liue. Line 1968 Poreus hauede þe heorte swa luþer; and swa loð him wes his broþer Line 1969 þat swiken he him wolde; a summes kinnes wisen. Line 1970 Fereus hit iherde suggen. þorh soðfaste worden; Line 1971 þat ((his)) br[o]ðer hine wolde slæn. þer-fore he wes ful sari. Line 1972 He ferde aw[æ]i ouer sæ; þat him þuhte selest. Line 1973 he funde inne Fr((a))ncene eærd; þene king þe hehte Sward. Line 1974 he bad him herd-sum-nesse; heren þat he him wolde. Line 1975 beon him for hold cniht; ba bi dæie and bi niht. Line 1976 Þe king wes gled for his kime; & for þen cnihtes þet come mid hine. Line 1977 & heold hine on erde; & hæhliche hine clepede. Line 1978 Ful soue ȝere; mid þon kinge he wunede þere. Line 1979 þat king he hauede iquemed; & al-swa þere quene. Line 1980 Þa seoue ȝer weoren aliðene; þa bad he leue. Line 1981 fær%ren þat he wolde; into þisse lond. Line 1982 Þe king him lende ane ferd; of his kennest folke; Line 1983 him-seolf he sende sonde. wide ȝen þat londe; Line 1984 after alle þen cnihten. þe he bi-ȝete mihte; Line 1985 and he to-clipede. muchelen his ferde; Line 1986 & al mid isunde. come to þisse londe; Line 1987 A-nan heo bigunne fuhte. & falde þas leoden; Line 1988

Line 1988 & is broðer [Po]reus. ferde him to-ȝenes. Line 1989 mid þon stronge fæhte [Fe]reus he felden. Line 1990 and alle his ferde; he leiden to folde. Line 1991 Iudon hæhte here moder; þe riche was and on-mære. Line 1992 swiðe heo was sari; for sorehfulle þan slehte. Line 1993 þat heore sune ȝeo[n]gere; sloh þene eldere. Line 1994 Þe deæde heore wæs leouere; þe quike here wes leoðere. Line 1995 Þe quike hire wes swa swiþe leoð; þat bi-nimen heo him þohte his lif. Line 1996 Poreus lai on bure; þer him muchel plihte ilomp. Line 1997 þer he læi softe; & he siker slepte. Line 1998 Com is moder liðen; mid leoð-lichen creæften. Line 1999 mid oþer s[ix] wiuen; mid six longe cniuen. Line 2000