A devout prayere at thy vprysyng. [fol. 276vo]
[i]N nomine patris & filii,
Et spiritus sancti, Amen,
Mercy, Iesu, and gramercy,
My body and soule I the beken. [ 4]
Now Iesu lord blessyd þou be
For all þys nyght þou hast me kept,
From the fende and hys postee,
Whether I wakyd or slept. [ 8]
In gret dissese, in dedly syn,
Many on thys nyght fallen hase,
That mysylf shuld haue fall in,
Had þou nat kept me of thy grace. [ 12]
Lord yeue me grace to þy worshyp
Thys day to spende in þy plesaunce,
And kepe me fro wykyd felyshyp
And from þe fendes encombraunce. [ 16]
Iesu, my tong þou rewle also
That I nat speke but hit be nede,
Hertyly to pray for frend or fo
And harme noman in worde ne dede. [ 20]
Cryste yeue me grace of mete and drynke
Thys day to take mesurably,
In dedely syn þat I nat synke
Thorough outrage of foule glotony. [ 24]
Iesu, my lord, Iesu, my loue,
On all þat I am boundyn to
Thy blessyng sende from heuyn aboue,
And yeue hem grace þy wyll to do. [ 28]
My good Angell, þat art to me sende
From god to be my gouernoure,
From euyll spyrytes thow me defende,
And in my desease be my socoure. [ 32]
Amen.
Explicit.