Nachträge zu den legenden / [ed. C. Horstmann].

4. Testamentum Christi. [So der Titel im Ms. Harl.; besser The Charter of Christ. Das vortreff∣liche Gedicht ist vielleicht vom Dichter des Ipotis und Robert of Sicily.]

a) Ms. Vernon, Fol. 317b.

"Jhesu, kyng of heuene and helle, [1 l. I, Jhesu.] Mon and wommon, I wol þe telle What loue I haue I-don to þe; Loke what þou hast don to me.— Of alle Joye þou weore out pult [ 5] Wiþ resoun and wiþ þin oune gult; Pore þou weore I-dryuen a-way, As a best þat goþ on-stray.

ffrom my kindome I com doun, Te seche þe from toun to toun, [ 10] Min heritage, þat is so fre, In þi mischef to ȝiue hit þe. And whon þat ȝifte I ȝiuen þe scholde, I dude as þe lawe wolde: To a Mayden I meked me, [ 15] ffor no chalange schulde be; wel dernely I kepte þe and me Til I my tyme wolde se, ffourti wokes and fourti dawes, To folfulle þe olde lawes; [ 20] þe Mayden was trewe, mylde & fre, heo receyued me for þe. þorw my monhede and my grace þus com sesyng furst on place. And whon þe sesyng was do so, [ 25] fful gret envye hedde þenne þi fo; þenne Belsebub and Sathanas hedde gret wonder whi hit was: þei fondede me wiþ felony, wiþ pride, couetyse and gloteny, [ 30] And wel þei wuste I was a mon; But synne in me founde þei non. harde þei þreted me in her þouȝt, þat ilke sesyng schulde be deore abouȝt; þei sende heore sergeauns wiþ may∣strie, [ 35] wiþ wo and serwe me to distruye, And wel þei founde hem geyned nouȝt. Anoþur help was in my þouȝt: More siker þe to make Aȝeyn þi foos, ful of wrake, [ 40] heuene and eorþe in present To make a chartre of feffement; In such amaner þen moste hit be þat I moste ȝiue my lyf for þe: ffor þou art ded, and I am lyf, [ 45] And I moste dye to ȝiue þe lyf.

Mony a wei haue I go In hongur and þurst, colde and wo þritti winter and more þen two, Or my dede weore al I-do. [ 50] Ne mihte I fynde no parchemyn ffor to laste wiþ-outen fyn; Bote, as good loue bad me do, Min oune skin I tok þer-to. To gete me frendes, I ȝaf good mede— [ 55] So doþ þe pore þat haþ gret nede: On a þoresday a soper I made, Boþe frend and fo to maken glade, wiþ mete and drynk to soulus fode, wiþ holi word my flesch and blode: [ 60] And þis I made for Monkynde, Mi loue-dedes to haue in muynde—

hoc facite in meam commemoracionem.

Or I fro þe bord a-ras, Of my frend bi-trayed I was; he fond me goande in þe way, [ 65] As þe Leoun goþ to his pray—

Susceperunt me sicut leo paratus ad predam.

A curtul I hedde and cloþus mo, And sone I hedde hem alle for-go—

So hedde I þis chartre writen, þo was I naked, wel may ȝe witen; [ 70] þei casten lot as wolde bi-falle, wheþer on schulde haue hem or parten alle. ffrend and fo þat wiþ me metten, In my neode alle me for-letten; And to a piler I was I-piht, [ 75] Togget and tauwed al þe niht And wasschen in myn owne blode, And strayte I-streynet on þe Rode, Streyned to druye on Rode-tre, As parchemyn oweþ for to be. [ 80] Here now and ȝe schul witen hou þis chartre was I-writen. vppon myn neb was mad þe ynke wiþ þe Jewes spittyng on me to stynke. þe penne þat þe lettre was wiþ writen, [ 85] weore scourges þat I was wiþ smiten. how mony lettres þeron beon, Red and þou miht wite and seon: ffif þousend foure hundred fyfti and ten woundus on me, boþe blak and wen. [ 90] To schewen ou alle my loue-dede, Mi-self I wole þis chartre rede. Ȝe Men þat gon bi þis weye, A-bydeþ a luytel, I ow preye, And redeþ alle on þis parchemyn, [ 95] ȝif eny serwe beo lyk to myn—

O uos omnes qui transitis per uiam;

Stondeþ and hereþ þis chartre red, whi I am woundet and al for-bled.

'Sciant presentes et futuri,

wite ȝe þat are and schal be-tyde, þat Jhesu crist wiþ blodi syde, [ 100] þat was boren in Bedleem And offred in to Jerusalem,

þe kynges sone of heuene aboue, wiþ mi ffadres wille and loue Made a sesyng whon I was born, [ 105] To þe, Monkynde, þat was forlorn. wiþ my cha(r)tre here present I make nou a confirmament: þat I haue graunted and ȝiuen To þe, Monkynde, wiþ me to liuen [ 110] In my Rewme of heuene-blis, To haue and to holden wiþ-outen mis, In a condicion, ȝif þou be kynde And my loue-dedes haue in Mynde, ffre to haue and fre to holde, [ 115] wiþ al þe purtynaunce to wolde, Myn heritage þat is so fre. ffor homage ne for feute No more wol I aske of þe, But a foure-leued gras ȝeld þou me: [ 120] O lef is soþfast schrifte, þe toþur is for synne herte-smerte, þe þridde is "I wol no more do so", þe feorþe is "drede god euermo"; whon þeose four leues to-geder ben set, A "trewe loue" men clepen hit. Of þis Rente beo nouȝt be-hynde, ffor þorw þe ȝer þou may hit fynde; Elles mai þou not fynde hit in my wounde, ffor þer mai "trewe loue" wel be founde. [ 130] And þif þou falle and gretly mis-take, Mi dede I wole neuer forsake; And þif þou amende þe and Merci craue, þin heritage ȝut schalt þou haue.' Þe seles þat hit was seled wiþ, [ 135] þei were grauen vp-on a stiþ; Of gold nor seluer weore þei nouȝt, Of stel and Iren were þei wrouȝt: wiþ þe spere of stel myn herte þei stongen þorw myn herte and þorw my longen; Iren nayles þurleden me þorw feet and hondes to þe tre. Þe selyng-wax was deore abouȝt, Ate myn herte rote hit was souȝt, And tempred al wiþ vermilioun [ 145] Of my rede blod þat ran doun—

Factum est cor meum tanquam cera liquescens. in medio ventris mei.

ffyue seles weore I-set þeron: ffader and sone, god and mon, þe fyfþe is for to leeue most, þat i-comen of þe holygost. [ 150] [150 l. i com?] In pleyn pouwer þi stat to make, A croune on myn hed (I gon) to take [152 I gon (con?) fehlt.] Of þornus, in toknyng þat I am kyng And freoly may ȝiue þe þi þing— þis witnesseþ þis Jewes alle, [ 155] On kneos þei gonne to me falle And seiden loude on heore scornyng "heil be þou, lord and Jewes kyng." Bi-twene two men þis (chartre) was seeled, þei boþe weore seke, þat on I heled, [ 160] Bi-twene two þeues on hih I-piht, In toknyng þat I am mon of miht, þat Norþ and West on heiȝ hille þat I may deme boþe gode and ille—

Quia neque ab oriente neque ab occi∣dente.

A-þhurst I was ful sore I-swonken, þe beuerege moste nede be dronken: A loue-drynke I asked of þe, Eysel and galle þou ȝaf to me— þis witnesseþ Matheu and Jon, Luk and Mark and monyon, [ 170] And nomeliche my moder swete: ffor heo lafte neuere teres to lete; Ar þis chartre writen was, fful ofte heo seide allas allas! So bare I was of worldes gode, [ 175]

whon I schulde dye on þe Rode, þat I hedde nouȝt wher-of to take, Mi testament wher-of to make, But of my leoue moder dere— heo stod bi me wiþ serwful chere; [ 180] And whon I my cosyn hire bitoke, heo caste me mony a serwful loke. In knowleching I made a cri "Pater pater, lamaȝabatani." Bi-hold þou, mon, wiþ herte and eȝe, [ 185] ffor þi loue hou I schal dye:

Consummatum est, þis chartre is doon. Mon, þou hast ouercome þi foon! To helle I wente þis chartre to schewe Bi-fore þi fo, Sathanas þe schrewe; [ 190] þo he was schent and brouht to grounde, wiþ nayles bored and speres wounde, [191 u. 192 umzustellen.] A strayt couenaunt I-mad þer was Bi-twene me and Sathanas: Al my catel to haue away [ 195] þat he me refte wiþ false pray. Aȝein I com and made a feste AMong þe leste and þe meste— A parti þo gunne knowe me, þat I was mon of gret pouste. [ 200] þe feeste laste fourti dawes, To do men knowe my newe lawes; þat feeste was al of ioye and blis, þat Esterday ȝit cleped is. On endenture I lafte wiþ þe, [ 205] þat euer þou schuldest siker be: In preostes hondes my flesch and blode, þat for þe dyede on þe Rode. A by-keye I tok þe also: þe token þat I was on I-do, [ 210] To bere wiþ þe wher þat þou go; þenne þar þe not drede of þi fo. To my fader I moste gon, ffor al his wille haue I don. A cote-armour I bar wiþ me, [ 215] ffor þat I tok of þy liuere; þe cloþ was riche and ful fyn, þe chaumpe hit was of red camelyn.

A ful feir mayden to me hit wrouȝt, Oute of hire boure I hit brouȝt; [ 220] Poudret wiþ fyue roses rede, ffyf woundes þat I þoled dede. whon I come eft aȝeyn to þe, þer-bi þou maiȝt knowe me. Þeose þat beoþ of rente be-hynde [ 225] And þeose dedes haue not in mynde, fful sore may þei ben a-dred whon þis cha(r)tre schal be red: Alle þeose schul go to helle-pyne; And wiþ me to blisse schul go alle myne. [ 230] Pay þi rente, keep þe from gylt, Cum and cleyme whon þat þou wilt, þe blisse þat loste oure frende." to þe whuche blisce crist vs bringe wiþouten ende.

A. M. E. N. Amen.

b) Ms. Harl. 2382.

Wo-so wil ouer-rede this boke and with gostly eyen ther-on loke, to other scole dare he not wende, to saue his soule fro þe fende, Then for to do as this boke tellith; [ 5] for holi wryt for-sothe it spellith. ther-for y pray yow for charite that this boke shal rede or se, that your herte & al your mynde kep derworthly that ye here fynde; [ 10] and ful-filleth it in dede that ye shal in this boke rede.— Now ye shal here anon-righte your sauyour speke to yow as-tyte wordes of a chartour þat he hath wroght, [ 15] that ye may knowe in al your thoght. and who this boke can vnderstonde, teche it forth thurghe al the londe vntil other þat this hath not sene, to saue here soules right as here owne; els ye shal not with-outen strif fro this world passe to þe lond of lyf. Now y wil be-gynne to rede þeron, his pes he yeue vs euery-chone.— "Jhesu, lord of heuene and helle, [ 25] man & womman, y wol yow telle, loke what loue y do to the, and loke what thu has do to me. ffro paradise thu were out pilt, with care & sorwe þ^u were out spilt, [ 30] forth thu were drawe a-way, [31 l. driue.] as a beste that goth astray.

ffro my right y cam a-doune, to seke the fro toune to toune, to helpe the in thy myschef— [ 35] Derworth soule þ^u art me lef— myn heritage, that is so fre, in thi myschef to yef it the. And when this sesyng y yeue shulde, y dud as the Jewys wolde: [ 40] Til a mayde y be-toke me, when þat y conceuyd shuld be; the mayde was trewe, mylde & fre, she me receuyd for þe loue of the. nyne mo(n)thes with here y was, [ 45] to make a-mendys for thi trespas, er y in to this world was borne to saue man-kynde þat was forlorne. thurgh my vertu & my grace thus cam the sesyng first in place. [ 50] Virgyn Marie, mayden mylde, with me went thus gret with childe. and when this sesyng was al ydo, fful grete envy had thy foo, that cursed fende Sathanas, [ 55] had gret wonder whi it was, whi y loued so moche the, that so vnkynde has ben to me; wroth he was—it helped hym noght, the to helpe was al my thoght. [ 60] he tempted me in so gret foly, pride, couetise and glotony, and welle he wist y was a man; but synne in me found he nan. for-sothe, right hard he thretid me [ 65] that y shold dere abye for the, to destroye me thurgh his myght and put the for euer out of my sight. Now, derworth soule, herken to me and a new ioye shal y telle the: [ 70] to make a charter of feffement, heuene & erthe shal be present; but in soche a maner it most be þat y shal yelde my lyf for the— and when y am ded, man, be þ^u kynde, [ 75] and haue this charter in þⁱ mynde. for an enmy that hath the soght; but yet shal y the lese noght, [78 l. lefe.] for y wol dye for thy foly and bryng þe in to my company. [ 80] I am a-lyue and thu art ded, y wol yeue my lyf ayenst þe qued, for to helpe the y am redy, to saue the euer fro thyn enmy.

for many a way haue y go, [ 85] in hunger, thurste, colde & wo, xxx^ti wynter and thre þerto, or my disese were al y-do. [88 Ms. welle st. were.] parchement to fynde wyst y none, to make a charter ayenst þⁱ fone [ 90] that wil leste with-oute ende. herken now to my word hende! But, as trewe loue bade me do, myn owne skynne y toke þerto. and when y had so y-do, [ 95] wel fewe frendus had y tho; to gete me frendis y yeaf gret mede, as doth þe pore þat hath gret nede. but to yeue the y had no more, for þⁱ soule that was for-lore, [ 100] then my soule to yeue for the, that for the dyed apon a tre. apon a thursday a soper y made, to frend & foo, to make hem glade, of bred & wyne the sacrament, [ 105] for euer to be my Testament, which is my fleshe & my blode, to tho that lyuen in mylde mode, and to þ^o that dyen out of charite their dampnacion euer to be. [ 110] here wol y foure wordes yow teche— and to þe peple loke ye hem preche:

hoc facite in meam commemoracionem;

that they haue hem euer in mynde; here mede in heuene shal they fynde. thes wordes twocheth þe sacrament [ 115] that men receueth, verrament. It semeth many & is but one, it semeth bred & it is none, it is quyk & semeth ded: it is my body in fourme of bred. [ 120] This made y only for mankynde, my wonderful dedis to haue in mynde— who-so receueth it in clennes, saued shal be & com to blys— and to haue in mynde my passion, [ 125] that shal be thi saluacion.— Or y fro the borde aros, of my disciple be-trayed y was. when y had soped, he ros anone, to grete maistris he gan gone [ 130] and broght them with hym in þe way, as a lyon þat goth a-boute his pray—

Susceperunt (me) sicut leo paratus ad predam.

Anone they be-gunne to spoile me, and seid y shuld dye on a tre. my mantylle and other clothes mo [ 135] alle y had them sone for-go,

they cast lot emonges them alle wheþer one shuld haue them or parte hem alle. but alle my clothes fro me thei token; and alle my frendis sone me for-sokene; naked y stod emong my fone— for other socoure had y none; redy they were me to despise, but none þer were me for to plese. They made scourges hard & grete, [ 145] ther-with my body shuld be bete; and thogh y wold haue pleyned me, ther shuld to me no socur haue be. ful sore a-ferd for-sothe y was, when they led me so gret a pas! [ 150] To a piler y was bound al þe nyght, togged & betyn til day-light, and wasshen with myn owne blode, that al the erthe aboute cold stode. and so y stod bounden al the nyght [ 155] til on the morwe þat it was bright they strayned me hard apon a tre, as parchement auȝhte to be.— [158 Ms. auxhte.] hereth now & ye shal wetyne how this charter was y-writene. [ 160] ouer al my face felle the enke, thornes in my hed gan to synke. the pennys that þe lettris writene, were scourges þat y was with smytene. how many lettris that ther-on bene, [ 165] rede and thu may wete & sene: v thousant v.cl & x then [167 a. R. nota de vulneribus.] wondes on my body, boþe red & wan. ffor to shewe the of my loue-dede, my-self y wol here þe charter rede. [ 170]

O vos omnes qui transitis per viam, attendite & videte si est dolor sicut dolor meus—

Ye men that goth forth bi þe way, be-holde & se bothe nyght & day and redith apon this parchemyn, yf any sorowe be as gret as myn. [Carta xpi.] Stondeth & herkeneth þe charter red, why y am wonded & al for-bled.

'Sciant presentes & futuri,

Wetyn þ^o here & tho þat be to come that Jhesus of naȝareth, god is sone, vnderstondeth wel & þ^o þat wol abide that Jesus hath a blody syde, [ 180] that born was in Bethelem and ouer-more offred in to Jerusalem,

the kyngis sone of heuene aboue, a mercyful fader that wel y loue. I made a seisyng when y was borne, [ 185] to saue man-kynde that was forlorne. But with my charter here in present y make to mannys soule a feffement: that y haue y-graunted & yeue to mankynde, with me to lyue [ 190] In my kyngdom of heuene-blys, to haue & holde with-outen mys, with this condicion þat thu be kynde and my workes to haue in mynde, frely to haue and frely holde, [ 195] with al the purtenaunce to be-holde, and in my blisse euer to dwelle for the rente þat y shal the telle, [[1146]] Myn heritage that is so fre. for homage or els for fewte [ 200] no more wol y aske of the, but a iiij-levid gras yeld þ^u me: that one lef is verry shrifte, þat other is for þⁱ synne þe smerte, the thirde is wille no more do so, [ 205] the fourthe þⁱ penance mekely do; when thes levis to-geder ben set, a "trew-loue" men callen hit. Of this rent be not be-hynde: the way to heuene then may þ^u fynde; yf þ^u this rente truly pay me, my gret mercy I shal shewe to the. for if thu falle in gret mystake, my charter wol I þe not forsake; yf thu amende and mercy craue, [ 215] thyn heritage then shalt þ^u haue.'— Thes selys that it is selyd with, they were made alle at a smyth; of golde ne siluer were thei noght, of stile and yren were they wroght: [ 220] with a spere of stile myn hert was stonge thurf my syde & thurf my lunge, apon my side they made a wonde, myn herte-blode ran doune to grounde; with yren nayles they smyten me [ 225] thurghe fete & handes on þe rode-tre. The selyng-wax was dere y-boght, at myn herte rote it was sought, al tempred with fyne vermylon of my red blode that ran adoune—

Factum est cor meum tanquam cera in liquessens. in medio ventris mei.

My sealis bene y-set ther-one: fader & sone, god and man, the firste, that is be-leve most, [233 l. fifte.] that y cam of the holy gost. ther-for here may thu now se [ 235] þat y am a kyng of gret poste; in playn power thi state to make, a crowne of thornes on my hed y take: This croune be-tokeneth y am a kyng and frely may yeue thyn owne thyng— [ 240] this wittenesseth wel þe Jewys alle, on kneys they gonne be-fore me falle and lowde seyd in here scornyng "al haylle thu lord, of Jewys kyng." Be-twene ij thevis þe charter was selyd, [ 245] bothe were syke, þat one was helyd, be-twene ij thevis high y-pight, [247 Ms. plight.] in token that I was lord of myght; this be-tokeneth bothe good & ille, atte day of dome to saue or spille. [ 250] fful dry y was & thursted sore; but of soche drynke y myght no more: for aysel & galle they yeaf to me. but one drynke aske y of the: that þ^u be louyng to-ward þⁱ foone— other drynke of þe aske y none; yf thu me loue, haue this in mynde: to þⁱ enmyes thu be right kynde. ensample þ^u mayst take here of me: for loue of the y hong on a tre, [ 260] But (seid) "my fader, y pray now the, [261 seid fehlt.] apon myn enmyes thu haue pite"— And as y do, do thu to thyne, and saued shalt þ^u be fro helle-pyne. here (of) be wittenesse mo then on: [ 265] Mark, Mathew, Luke and John̄, and namely my moder swete, that for me blody terys gan lete. for there she stode vnder the rode, she sawe my body al on blode, [ 270] that fro my fete vnto my hede y was not els but al blode-rede; No word to me þer myght she speke, it semed ny here herte wold breke; no wonder was thogh she were woo [ 275] when she sawe me on þe crosse y-do. ffor sorwe of here y made a cry and seid ful lowde "heli lamaȝaba∣thany."

anone she felle doune in sownyng, [279 l. swounyng.] right be-fore me at myn endyng. [ 280] the peynes that y suffred were fulsore, but for my moder they were the more. when y layd my hed here & there, my moder chaunged al here chere; ful fayn she wold haue holpe me, [ 285] but for the Jewys it myght not be. my peynes were tho fulle smerte, the swerd of sorwe perced here herte; when to seynt John̄ y here be-toke, she cast on me a drewry loke, [ 290] as y had here alle forsake and to a nother sone y had here take; and or this charter writen was, ful ofte she sayd alas alas. Apon my shulder y leyd my hed [ 295] when y drow fast to my ded: for so bare was y of worly good, when y shold (dye) apon the rood, that y ne had where-of to take, rest of my hed where-of to make. [ 300] pore & riche, haue euer in mynde, when ye in this world no rest may fynde, what rest y had only for the, when y hong nayled apon a tre! wel may þ^u knowe þat y had none, [ 305] for þer y stode amonge my foone. when thu amonge thi foen art broght, be redy to suffre with alle thi thoght. to stande at barre it is wel harde, as ye be worthy to haue rewarde: [ 310] thu (þat) for me suffrest wrong, þ^u shal be sothely on my right hond; thu þat vengest the apon thi brother, thou standest not þer, but on þat other; and yf thu wilt the sothe knowe: [ 315] right as þ^u sowest so shalt þ^u mowe. I fele me now so ful of woo, that out of this world y most go; with peynes of deth hard am y bounde, my soule shal passe here in þis stounde. [ 320] be-hold now, man, with herte & eye, for thi loue how y shal dye. y hong on crosse for loue of the: forsake thi synne for loue of me, mercy aske and amende þe sone [ 325] and y foryeue þe that is mysdone; for ful of mercy y am, truly, to alle tho that cryen mercy. what shal it greue to repente the and in endeles ioye to dwelle with me? [ 330]

ffor tho that wil no mercy crye, they shal to helle when they dye. now when y haue one word spoke, myn eyen to-geder most y loke— thu synful man, haue pite on me, [ 335] for thyn owne sowle for charite! Thes wordes y most nedis speke, and then my herte shal to-breke: Consum(m)atum est, this charter is done. man, þ^u hast now ouer-come al þⁱ foone. [ 340] Anone y went to helle þat charter to shewe. be-fore Sathanas, þat olde shrewe; there y hym shent & broght to grounde thurgh my nayles pitous wounde. and after a cownant made þer was [ 345] be-twene me and Sathanas: alle my catelle to haue away that he be-rafte me with his pray. The thirde day y made a fest to the moste and to the lest: [ 350] the fest was of ioye & blys, that Ester-day called ys. one indente y left to the, where-of þ^u shalt euer syker be: In prestys handes my fleshe & blode, that for the was hanged on þe rode. who-so-euer be-leveth ther-on, endeles payn shal he fynde non; al-thogh y dyed, yet dyeth not he, for he shal rise & lyue with me. [ 360] A wel faire thyng y tok þe also: a token of the crosse y was on do, to bere with the so where thu go, to kepe the euer fro thy foo. to my fader y most gone, [ 365] for al his wille haue y done: I take my lef, ye haue me seyne; atte day of dome y come ageyne, man to deme after his wirke— this is the wille of al-holi kyrke— [ 370] and euer after in ioye to dwelle, saue to be fro the peyn of helle. A cote-armur I bere here with me, the which y toke of thy lyuere; this cote is riche & wel fyne, [ 375] the cherupe is now of red satyne;

a wel faire mayde me it be-tought and out of here boure I it broght; poudred it is with v. roses red, wondes y-suffred with peynes of ded. And when y come ageyn to the, bi this clothyng thu may know me. tho þat ben of this rent be-hynde and my wondes wilnot haue in mynde, wel sore shal they bene a-dred [ 385] when this charter shal be red; of the hy Justice be they ful ware, for-sothe thene shal he none spare, for alle þe synnes þat thu has wroght fram þⁱ youthe, shalle be soght. [ 390] for power of my fader y haue to saue alle thoo þat mercy craue, Now pay thi rent, while þ^u has space, yf thu wilt of me haue grace; and yf thu dye ful sodenly, [ 395] apon þⁱ soule y shal haue mercy. A cownant is made betwene vs two: as I haue done, so most thu do. loke what þⁱ pater noster seith to the: "right as y foryeue, foryef þ^u me", [ 400] and do ther-after, yf thu wilt, so that thi soule be not spilt. Apon al-holi writ y may put me where y be curteyse or no to the; be thu lerid or be thu lewde, [ 405] the way to heuene y haue þe shewde by the texte of holy writ, in what place þ^u wilt seke it. therfor y byd the pay thy rent, that with the fend þ^u be not shent; [ 410] with me to blisse then shalt þ^u come, and in my blisse þ^u shalt wone. To that blisse y may the bryng that of myght made al thyng."

Explicit Testamentum xpi. [Dann folgt The child of Brystow, Te∣stamentum Lydgate, Prophecia Merlonis.]