DCCXCII.
Vsurarij nomen est confusibile.
Iacobus de Vetriaco tellis how som tyme þer was [a] prechur þat in his sermond̛ told̛ of þe myschevus crafte of vsurie, and when̛ he had done his sermond̛, he bad at aƚƚ men̛ suld̛ rise to his absolucion̛ in ordur as he callid̛ þaim be þer offes. And furste he bad smythis ryse, and so þai did & he asoyled [þaim], and þai went þer ways. Than̛ he bad ryse baxsters, and so dyd þai, and þus he callid̛ vp ilk crafte after other. & at þe laste he bad ryse vsuraris, and þuff aƚƚ þer was ma in þe kurk þan̛ þer was of any oþer crafte, yit þer wolde none ryse, bod for shame þai hid þaim. And oþer folke lugℏe & skornyd̛ þaim, & aƚƚ þies vsuraries rase and went oute confusid̛.