CXX.
Cantus proprius multos decipit qui credunt bene
cantare et pessime ac vilissime cantant.
Jacobus de Vetriaco tellis how þat þer was a preste þat trowid̛ he was a passand̛ gude synger, not-with-stondyng he was not so. So on̛ a day þer was a gentyl-womman̛ þat satt behynd̛ hym̛ & hard̛ hym̛ syng, & sho began̛ to wepe; and he, trowyng þat sho wepid̛ for swettnes of his voyse, began̛ to syng lowder þan̛ he did̛ tofor̛; & ay þe hyer sho hard hym̛ syng, þe faster wepud sho. Than̛ þis preste askid̛ hur whi sho wepud̛ so as sho did̛, and sho ansswerd̛ hym̛ agayn̛ & sayd̛; "Sur, I am̛ a pure gentiƚƚwomman̛, & þe laste day I had no calfe bod one; & þe wulfe come & had it away fro me; and evur when̛ þat I here you syng, onone I remembre me how þat my calfe & ye cried like." And when̛ þe preste hard̛ þis, onone he thoght shame, & remembred hym̛ þat þat þing at he thoght was grete lovyng vnto God̛, was vnto Hym̛ grete shame and velany; & fro thens furtℏ he sang nevur so lowde. et c̛