Of Seynt Edward þe Confessoure, þat was Aluredes broþer; How he was Kyng of Engelande. ¶ Capitulo ¶ Centesimo ¶ xxvto.
ANd when þis was done, alle þe Barons of Enge[land] senten anoþer tyme into Normandye, for þat Edward shulde come into Engeland with michel honour. And þis Edward in his childehode louede al-myghty God, & him drade, & in honeste and clennesse leued his lif, and hatede synne as deþ. ¶ And when he was cronede and annoyntede wiþ real power, he forȝate nouȝt his gode maners & condicions & custumes þat he ferst vsede, for no maner honour, ne for no richesse, ne for no maner hyenesse, but euer more & more ȝaf him to godenesse, and wel louede God & al mekenesse, & louede God & holy cherche passyng al maner þing, & pore men also, & ham helde as þai hade bene his owen breþerne, & to ham ofte ȝaf grete almesse wiþ gode wille.