Of Kyng Alurede; & how þe Danoys in his tyme praiede him of mercy, þat þai moste gone out of þe lande. Capitulo Centesimo vijo.
After þe deth of þis Eldrede, regnede his broþer Alurede, þat Dolfynes was callede. þo went þe Danois, & assemblede ham, and went forto seche Alurede, þat þo was þe new kyng of Southsex. and þere þai fonde him at Wilton, wiþ a litel peple; & noþeles he fauȝt with ham; but at the laste he fledde þens fram þe felde, and went vnto Westsex, and ordeynede so miche peple of his owen reaume & also of oþere, so til þat he hade a stronge host, so þat þe Danois hade non power aȝeynes him to stande. and he come to London wiþ his host, þere as þe Danois soiournede; and þere wolde he haue fouȝten wiþ ham, but þe Danois derste nouȝt wiþ him feiȝt, but praiede him of pees, & þat þai most gone aȝeyne into her owen contre, & neuermore into Engeland forto come aȝeyne, eny harme forto done, and oppon þis couenant þai shulde ȝeue him to plegge, gode hostages, & soche as þe Englisshe men wolde axen.