Page 152
CHAPTER IV
FADIR, y dar not argue ferther aȝens ȝoure doctrine bi eny doctouris writing, sithen ȝe han smyte so soore a strooke aȝens the bifore alleggid writyng of Gregorie. For weel y wote, what [folio 29a] ever doctouris writing y allegge, if it be aȝens ȝoure bifore maad doctrine, ȝe wolen answer that he, or sum man for him, prove his seiyng, going aȝens ȝoure doctrine, as cleerli and as evydentli as ȝe proven ȝoure doctrine, and that he assoile the evydencis whiche ȝe maken for ȝoure doctrine; and ellis ȝe ouȝten not to his writing, so aȝens ȝoure doctrine meting, forto assente. This y fele wel, that ȝe wolden seie bi it what ȝe seien ȝou have in The iust apprising of Holi Scripture, and in The iust apprising of doctouris. And therfore y wole not in waast, in thilke kinde of argumentis, ȝou attempte. Nevertheles, this lettith me not forto argue aȝens ȝoure doctrine bi the wordis of Crist, and bi the wordis of Seynt Poul; and therfore y bringe forth what Crist seid to Thomas, Jon. 20 cr. thus: For that thou hast seen me, O Thomas, thou hast