Page 159, vol.8
Capitulum tricesimum primum.
THAT tyme oon Fulco, an holy preost in Gallia, cam to kyng Richard and seide, "Kyng, to þe I seie in þe name of God Almyȝti þat þou marie sone þy þre evel douȝtres, leste som worse hap by þe falle." "Þou lyest, ypocrite," quod þe kyng, "for douȝter have I none." "ȝis," quoþ he, "for þou hast pride, covetise, and leccherie." Þe kyng had lordes to gidres, and seide, "I ȝeve my pride to þe Templeres and Hospitalers, my covetise to white monkes, and my leccherie to prelates of holy cherches." Þey þat sey þis Fulco took and putte hym into bondes, but he myȝte nouȝt be i-bounde. Þis ȝere deide Ree prince of Wales; of hym oon seide in þis manere: "O blis of bataille, child of chivalrie, defens of contray, worschippe of armes, arme of strengþe, hond of largenes, yȝe of resoun, briȝtnes of honoste, Achilles his scharpnes, Nestor his soburnes, Tydeus his hardynesse, Sampson his strengþe, Ector his worþynesse, Eurialus his swiftnes, Parys his