Seinte Scholace, his soster : blac Nonne he let hire make,
And teiȝte hire penaunce forto don : to faste and to wake.
Line 8
Þeos tweiȝe holie creatures : eche ȝere hadden ane wone
to comen to-gadere some Tyme : and tellen of godes sone;
Ake heore noþer in oþeres Abbeye : bi-leue come ne miȝte
Ne duelle for none þinge : oute of heore celle bi Niȝte.
Line 12
¶ Þo þis guode holi mayde : i-brouȝt was in grete Elde,
hire longuede with hire broþer to speke : feble heo hire felde.
Þo heo hadde to him i-sent : and to-gadere heo weren i-come,
Al dai heo tolden of godes priuetez : seinte Marie sone,
Line 16
Of þe Ioye of heuene : hou holi men heore [lif] ladden;
Þare-of al heore Ioye was : þat heo to-gadere hadden.
Sorie weren þis holie þingus boþe : for it was sumdel neiȝ Eue.
Seint Beneit to is soster seide : þat he ne miȝte no leng bi-leue.
Line 20
Seinte scholace sori was. : "broþur," heo seide, "þin ore,
Þis holie wordus so murie beoth : ȝeot we moten telle more;
Ȝwane we In godes seruise beoth : we ne doz nouȝt ore ordre breke.
Ich am so feble þat ich ne wene : neuer-eft more with þe speke;
Line 24
bi-leue we þis one Niȝt to-gadere : for his loue þat deore us bouȝte,
Ich wot þat he it wole us for-ȝiue : ȝwane we it doth in guode þouȝte."
"beo stille," seide seint beneit : "loke ȝwat þou dest telle,
Wel þov wost þat ine mai beo : bi niȝte fram mine celle."
Line 28
Þo scholace i-saiȝ þat it ne heold : to bidde hire broþur more,
hire heued he hangede a-doun : and bi-gan to wepe sore.
"Louerd," heo seide, "þat þov art : ful of milce and ore,
Lat me, louerd, ȝif þi wille it beo : i-heore more of þi lore;
Line 32
¶ Ne lat nouȝt mi broþur to-Niȝt : fram me, louerd, wende,
Ake soffre us with tales of þe : bringe þis niȝt to ende."
Ase þis Maide loke [r. lokede] opward : þo heo hadde i-don hire bone,
Þat weder þat was so cler and fair : bi-gan to chaungie sone;
Line 36
hit bi-gan to þondri and hauli : leiȝten and eke rine,
Þat feor with-Inne Niȝte it was : er þat weder wolde a-fine.
¶ Þo ne miȝte seint beneit : for þe wedere þannes i-wende. [folio 96b]
"Soster," he seide, "ȝwat hastþov i-don? : þou fondest me to schende;
Ȝif it nere ore louerdes wille : wel ne dost þov nouȝt,
Þat i-schal mine ordre breke : so nadde ich neuere i-þouȝt."
Line 42
