The Holy Bible, containing the Old and New Testaments, with the Apocryphal books,

PSALM LIV. [ [verse 1] In to the ende, in ditees or ympnes, the vndirstonding of Dauid.]

[verse 2] Here thou, God, myn orisoun, and de|spise [verse 3] thou not my lowe preȝeere; tac heede to me, and ful out here me. I am maad al sory in myn enhaunting; and I [verse 4] am al disturbid fro the vois of the enemy, and fro tribulacioun of the synnere. For thei bowiden doun in me wickidnessis; and in wrathe thei weren heuy to me. [verse 5] Myn herte is al disturbid in me; and ferd [dreed A.] of deth fel vp on me. [verse 6] Drede and trembling camen vp on me; and al couer|eden me dercnesses. [verse 7] And I seide, Who shal ȝiue to me federes as of a culuer; and I shal flee, and aȝeen resten? [verse 8] Lo! I droȝ out me along fleende; and I duelte in wildernesse. [verse 9] I abod hym [hem C pr. m.] , that made

me saf; fro to litil coraiouste of spirit, and fro tempest. [verse 10] Lord, put doun, and deuyde the tungis of hem; for I saȝ wick|idnesse and contradiccioun in the cite. [verse 11] Dai and nyȝt wickidnesse shal enuyroune it vpon the wallis of it; and trauaile in [verse 12] the myddes of it, and vnriȝtwisnesse. And ther failede not fro the stretis of it; vsure and treccherie. [verse 13] For if myn enemy hadde cursid to me; I shulde also han suffrid. And if he, that hadde hatid me, ouer me grete thingis hadde spoken; I shulde han hid me perauenture fro hym. [verse 14] Thou forsothe a man of oon inwit; my ledere, and my knowen. [verse 15] The whiche togidere with me swete metis thou toke; in [and in AH.] the hous of God wee wente with consent. [verse 16] Deth come vp on hem; and go they doun in to helle lyuende. For shreudenessys in the dwelling placis of hem; in the myddel of hem. [verse 17] I forsothe to the Lord criede; and the Lord shal saue me. [verse 18] The euentid and the moru, and at myddai, I shal seyn, and befor telle; and he shal ful out here my voys. [verse 19] He shal aȝeen bie my soule in pes fro them, that neȝhen to me; for among manye thei weren with me. [verse 20] God shal ful out heren, and meke them; that is befor worldis. Ther is not forsothe to them al hol chaunging, and thei dredde [verse 21] not God; he straȝte out his hond in aȝeen ȝelding. Thei defouleden the testa|ment [verse 22] of hym, thei ben deuydid fro the wrathe of his chere; and the herte of hym neȝhede to. Softid ben the woordis of hym vp on oile; and thei ben speris. [verse 23] Throȝ vp on the Lord thi bisynesse, and he shal nurshe thee out; and he shal not ȝiue in to with oute ende flotering to the riȝtwise. [verse 24] Thou forsothe, God, shalt bringe them doun; in to the pit of deth. Men of blodis and treccherous shul not haluen ther daȝes; I forsothe shal hope in thee, Lord.