PSALM LII. [ [verse 1] In to the ende, the vnderstonding of Dauid for Amalech.]
The vnwise man seide in his herte; Ther is not God. [verse 2] Thei ben corupt, and thei ben made abhominable in ther wick|idnessis; ther is not that do good. [verse 3] God fro heuene beheeld vp on the sones of men; that he see, if ther is vnderstond|ende, or aȝeen sechende God. [verse 4] Alle bow|eden doun togidere, thei ben maad vn|profitable; ther is not that do good, ther is not vnto oon. [verse 5] Whether not alle shuln knowen, that werken wickidnesse; that deuouren my puple as mete of bred? [verse 6] God thei inwardli clepeden not; there thei trembliden bi drede, where was not drede. For God scaterede the bones of hem, that plesen to men; thei ben con|foundid, for God dispiside them. [verse 7] Who shal ȝiue fro Sion the helthe ȝiuere to Irael? whan the Lord shal holli turne the caitifte of his folc, Jacob shal ful out ioȝen, and Irael shal gladen.
