The Stonor letters and papers, 1290-1483; ed. for the Royal historical society, from the origial documents in the Public record office, by Charles Lethbridge Kingsford.

304. HENRY MAKNEY TO SIR WILLIAM STONOR [? 29 JAN. 1482]

From the mention of Clerk of Nurselyng and of the troubles of Stonor's servants at Oxford (see Nos. 303 and 305) it seems probable that the year

is 1482. "Your children" must in that case mean some wards of Stonor's. Since Stonor is a knight the date cannot be earlier than 1478; but neither that year, when 2nd Feb. was on a Monday, nor 1479, when it was on a Tuesday, are likely. In those years "your children" might have meant Eliza|beth Stonor's daughters, but in any later year can only mean dependent wards. From A.C., xlvi, 178.

My ryghte worshipful Maistire, y recomand me to youe &c. Syr, the prioure of Frideswide of Oxford is collector of the dymys, he hathe sen to Pirton and hathe suspendide þe cherche for the dymys, and also he suspendide olde Bayly, whiche hath parcelle of þe tythis in Pirton undire youe. Wherfor ye moste se a remedy that þe parishens may be servyde and the dymys payde. Y hire þat the dymys ben more þen xl. s., whiche is unpayd. Also here is on Willm. Clerke of Nustelynge, whiche is grevously vexide and trowblide by Thomas Hardgrave for suche servise as he dide to Edmunde Ramsey in youre behalfe, wen þe furste possession was take þer; and also when ye were þer ye made hyme brynge the tenantis to Rumsey to speke with youe; for whiche causis he dare not abide in his house for drede of arestinge by write or for suerte of the pease: wherfore the seid Clerke besechithe your gode Maistershippe to lete make a cerche if þer be any accion conceveide ayenste hyme by Hardgrave, and þat he myȝte have a supersedeas fro the Chancery, whiche shulde cause odire men to be glade to do youe servise in þat contre, if ye kepe this man harmeles &c. Item youre husbondrie is note welle gydide: ye have iiij or v hynys and but on plowe goynge, where as ȝe myȝte have ij plows. Y have spoke to þe bayly to have fewere servantes or a nodire plowe goynge: but he wulde note be rewlide by me, but take his owne wey, whiche wulnote be moste for your profite, as y trowe. Item your childern be note at Oxford by cause of horse, money and men: for your servantes dare note come in Oxford. At Stonore, the Tuysday nexte afore Candelmasday,

Your servant H. Makney.

To my Ryghte reverente Maister, Syr Willm. Stonor.