303. THOMAS BANKE TO SIR WILLIAM STONOR 16 JANUARY 
Pleasyd ȝour maistyrshyp to understond þat I hayff beyn with doctour Sutton, our commyssare, and I dyd shew to hym howe ȝoure maistyr|shyp boyth was and ys dysposyd to þe universite, as in fyndyng and relevyng off divers scolars to þe same and also by relevyng off many oþer suche as cummys to ȝour maistyrshyp at divers tymes in þe ȝere, lyke as Mr. Eadmunde, Mr. Flynte, Mr. Kyckall, and I with oþer moye dyd layte; off whome I desyryd þe commyssare to inquire ȝour worshypfull and gentyll behaveȝour to tham and to iche on off tham, because I wolde he sulde gyff more credens to myn informacyon. Also, syr, I was with my lord Edwarde and maistyr Stanley, and informyd tham in lyke wyse, and dyd shew boyth to my lorde Edwarde, to maistyr Stanley, and to maistyr commyssare, þe delyng and þe behaveȝour off certan Page 138, vol. 2 scolars aȝanes ȝour maistyrshyp and ȝour servands, specyaly when þai cume to þe universite for suche necessytes as ȝe hayff to doo þer: and þen my lord Edwarde and Mr. Stanley desyryd þe commyssare at þer instanse to see an remedy, suche as ȝour servandes myght boyth cume and goo to or from þe universite in sayffe garde off þer bodes: and þe commyssare seyd he wolde doo as myche as he myght by þe vertu off hys offece to provyde an remedy: nott withstondyng all thys, me semys þe moste suerte ys ȝour awn wey to send for tham by privey selys. Cadwey ys benefysyd in Oxfurte: he may nott flee. Syr, I sayd to þe comyssare þat ȝe wold send for tham by privey seles, bod yff þe univer|site dyd see an remedy: and þe commyssare sayd, yff ȝe dyd so he culd nott blame ȝe, in so myche as þei wylnot be reulyd. No more, save I besyche Jhesu preseryff ȝo and ȝores evermore, Amen. Frome Oxfurth þe xvj day off Januer.
ȝour servand and bedman Thomas Banke.
Syr, Maistyr Stanley, eftyr all þe comunycacyon before rehersyd, dyd send for Cadwey to cume to hym: for Cadwey is grete with hym: and þer maystyr Stanley declaryd howe ney off kyn my laydy ȝour wyff and he stande, and desyryd hym as he wolde hayffe hys gude Maistyrshyp to owe hys luffe and favour to ȝour servandes in Oxfurth or owte off Oxfurth wharsoever þei dyd mete: for Maistyr Stanley sayd þat he moste nedes take ȝour parte in all ryght: and so sayd my lorde Edwarde also, when we dyd comon firste off þe mater: and so Cadwey hays pro|mysyd to Maistyr Stanley þat he wyll neþer doo ne sey aȝanes ȝour servandes, bod raþer to helpe to convey tham yff anyman wolde doo or sey aȝanes tham: bod þis ys no suerte to ȝour servandes for oþer off hys cuntremen. Warfor, me semes ȝour awn wey ys beste, to send for tham, or to cause þe kyng to wryte to þe universite for an remedy as ȝe thynke beste &c.
To hys worshypfull Maistyr Syr Wylliam Stonor, knyght, be þis de|lyveryd.