¶ Capitulum liij
SOo on a daye la beale Isoud sayd vnto sir Tristram I merueyle me moche said she / that ye remembre not your self how ye be here in a straunge countrey and here be many peryllous knyghtes / and wel ye wote that kyng Marke is ful of treason / and that ye wylle ryde thus to chace and to to hunte vnarmed ye myghte be destroyed /
¶ My fayr lady and my loue I crye you mercy I wille no more doo soo Soo thenne sire Tristram rode dayly on huntynge armed and his men berynge his shelde and his spere / Soo on a day a lytyl afore the monethe of may syre Tristram chaced an hert passynge egerly / and soo the herte passed by a fayr welle / And thenne sir Tristram alyghte and putte of his helme to drynke of that burbley water / Ryght soo he herd and sawe the questynge beest come to the welle / whan syre Tristram sawe that beste / he putte on his helme for he demed he shold here of sir Palomydes / for that beste was his quest /
¶ Ryght so sir Tristram sawe where came a knyghte armed vpon a noble courser / and he salewed hym / and they spake of many thynges / and thys knyghtes name was Breuse saunce pyte / and ryght so with alle there came vnto them the noble knyghte sire Palomydes / and eyther salewed other / and spake fair to other