An anthology of Chancery English

1454 C1/2/36/:53 Petition of John Frebarn of London, lighterman

Vnto the full noble and gracious lord. my lord the Erle of Salesbury Chaunceller of Engeland Mekely besecheth your
poure Oratour Iohn ffrebarn of london lighterman pitously complaynyng. how that the vije day of Septembre now last
passed in the xxxiije yer of the Regne of our souer ain lord the kyng that now is. as his servantȝ
called Iohn Scotte william Spencer Nicholas Essex Mathewe white Iohn Ducheman and Morice Argill were comyng
from seint Katerines by the Tour wharf hom(ewa)rdþoward the house of your seid besecher in Pety wales. ther cam vpon them
on the seid Tour wharf oon John Davy Squyer marchall of the Admiralte and Atte sute of partie. arrested the (seid)
seruantȝ of your seid besecher. aswell vpon accion of trespas. as of surete of peas. and thervpon had them
in to the Tour of London.

and there were in prison by iij dayes in grete duresse. And your seid besecher coude not haue them out
of prison there. but as he was fayn for to take them to baile vnder surete for to brynge them to their answer there atte Court
day whiche shall be on Monday next comyng / that is to sey. the xxje day of this present moneth of Octobre / And besides that. your
seid besecher paid for their fees xvij s. that is to wite . to the seid Iohn Davy x s. to the maister porter iij s iiij d. to the
vnder porter viij d. to the Iayler xvj d. to the Clerk of the Court þere xiiij d. and for continuaunce of the Court there in
to Monday next comyng vj d / And right gracious lord your seid besecher is enformed for certein. that neither the seid Iohn Davy
ner non other Officer ner minister of the Tour ner of the Admiralte. oweth not to entremet hym. ner hath no power auctorite ner Iuris diccion
for to arrest emprison ner vexe eny persone (in) to the Tour of london ner in eny other Court of the Admiralte.
for eny mater meved or don betwene partie and partie withynne the body of this Reaume. neither on water ner on
londe / As by diuerse statutȝ tervpon made by auctorite of parlementȝ in the tymes of the moost excellent Princes
kyng Richard the ijde and kyng harry the iiije. whos soules god (assoile) more plainly it appereth. These premi sses
tenderly considered / Please hit your noble lordship in asmoche as the day of apperaunce of the seid seruantȝ in
the seid Tour approcheth (nygh) for to sende for the seid Iohn Davy by a sergeant of armes. commaundyng the same Iohn
to appere before you at suche tyme on this half the seid day. as may like vnto your good lordship. And to charge hym for to
deliuer the seid seruantȝ clerely out of the seid Tour. as for eny maters dependyng there ageyns them
by reson of the accions aforesaid. and also . . . discharge and dismisse out of the Court there. the suretees that haue taken
them to baille for to brynge them to answer. and also to restore ageyn vnto your (seid besecher the seid xvij s)þhat he was con strayned
wrongefully for to pay for the fees of the seid seru antȝ Vpon the peyne comprised in the seid Statutȝ. atte reverence . . . and for charite

[ [ Printed PC I.xxxvi-vii.] [torn] [rubbed]]