An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.

HENRY V. Of Kyng Harri the V, the sone of Kyng Harri the iiij aftir the Conquest. [folio 169a]

Anno primo. A.D.1413.

AFTIR the deth of king Harri the iiij^the, regned his sone king Harri the V, that was ybore at Monemouth in Walis, and crouned at Westmynstre on Passion Sunday.

And anon, the firste yeer of his regne, for the grete and tendre loue that he hadde to king Richard, he translatid his body fro Langley vnto Westmynstre, and buried him beside quene Anne his firste wiff, as his desire was.

And this same yeer were ytake certayn Lollardes and hereticks, that hadde purposid thorough their fals tresoun to haue slayn the kyng and the lordis spirituel and temporel, and destroid al the clergie of the reme: but the king, as God wolde, was warned of their fals purpos and ordenaunce, and took the feld that is callid Fikettis feld, and with him maister Thomas Arundel Archebisshoppe of Cauntirbury, and leet keep the weieȝ aboute Londoun. And meny of thaym were take, and drawe and hanged and brent on the galoweȝ in saint Gileȝ feld. And a knyȝt callid ser Roger of Acton was take for Lollardrie and for treson, and drawe and hanged and brent in saint Gileȝ feld.

Anno ij^o. A.D.1414.

The secunde yeer of regne, he held a parlement at Westmynstre, of alle the lordis of the reme, where it was tretid and spoke of his title that he hadde to Normandie, Gascoigne, and Guyenne, that [folio 169b] were his enheritaunce; the whiche the king of Fraunce witheld wrongfulli and vnrightfulli. And so be avise of his counsel, he

sente ambassiatours to the king of Fraunce and his counsel, requiryng thayme to yelde vp vnto him his said enheritaunce, or ellis he wolde it gete be the swerd with helpe of Jhesu. The dolfyn of Fraunce ansuerde to our ambassiatours, and saide that our kyng was ouer yong and to tendre of age to be a good warriour, and not lik to make such a conquest vpon thayme. Oure ambassiatours heryng this scornful ansuer, retourned in to Englond ayen, notifying vnto the kyng and his counsel the ansuer of the dolfyn and of the counsel of Fraunce.

Anno iij^o. A.D. 1415.

Thanne made the kyng redy his ordenaunce necessary forto the warre, commaundyng alle menne that sholde go with him to be redy att Suthamptoun, at Lammesse thanne next folowyng, the iij yeer of his regne. At whiche day, whan the king was redy to take his passage, it was there publisshid and openli knowe that iij lordis, that is to say, ser Richard erlle of Cambrigge brothir to the duke of York, the lord Scroope tresorer of Englond, and ser Thomas Grey, knyghte, hadde receyued an huge summe of money, that is to say, a milion of gold, forto betraie the king and his bretheryn to the Frenshemen; wherfore thair heddis were smyte of, withoute the [folio 170a] northgate at Suthamptoun.

Whanne this was don, the king sailled forth in to Normandie with xvC shippis, and landid at Kitcaux, in the vigily of Assumpcion of our Lady, and fro thenneȝ he wente to Harflieu, and it besegid be lond and be watir, and commaundyng him forto delyuer the toun, and he saide he wolde not. Wherfore the king commaundid his gon|ners to bete doun the wallis on euery side, and anon thay of the toune sente out to the king prayyng him of viij daieȝ respit in hope of rescu, and yf non wolde come, thay wolde delyver the toun: and so thay dede. And thanne the kyng made his vncle, the erl of Dorset, capteyn therof, and commaundid him to put out alle the Frensshe peple, man womman and child, and stuffe the toun with English peple.

Whanne this was don, the king wente toward Caleis be londe

forto have come in to Englond, but the Frensshemenne hadde broke alle the briggis when he sholde passe ouer, wherfore him moste nedis seche his way fer aboue, and so he wente ouer the watir of Swerdis, and cam doun in to Picardie to a place ycallid Agyncourt, where alle the power of Fraunce was redy gadrid to stoppe his way, and yeue him bataile.

The king seyng the grete multitude and noumbre of peple of his enemieȝ, praide Almyȝti God of helpe and socour, and confortid his peple, and praide euery man forto make him redy to bataille; and [folio 170b] with such peple as he hadde, not fulli viij M^l., he enbataillid him, and grauntid to the duke of York the vauntwarde, as his desir was. And thanne the duke commaundid every man to ordeyne him a stake of tre sharpid at bothe endis, that the stake myȝte be pighte in the erthe asloope before thaym, that the Frensshemen sholde not ouerride ham; for that was fulli thair purpoȝ. And alle nyȝt befor the bataille, the Frensshemenne made moche revelle and moche cryyng, and plaide atte dys for oure men, an archer for a blanc, as it was said.

On the morow, whanne alle was redy, the king axed what tyme it was of the day, and thay saide, "Prime." Thanne saide the kyng, "Now is good tyme, for alle Engelond praieth for vs, and therfore beth of good chiere, and lat vs go to our iourney." And anon euery Englishe manne knelid doun, and put a litille porcion of erthe in his mouth. And thanne saide the king with an highe vois, "In the name of Almyȝti God, and of Saint George, Avaunt baner! and Saint George this day thyn helpe!" Thanne the ij batailleȝ mette togedir and fouȝten sore and longe tyme, but Almyȝti God and saint George fouȝten that day for vs, and grauntid our kyng the victory: and this was on the Friday on saint Crispyne and Crispinianeȝ day, in the yeer of our Lord M^l.cccc.xv. in a feld callid Agyncourt in Picardi. And there were slayn that day of the [folio 171a] Frensshemen in the feld of Agyncourt xj. M^l. and mo: and there were noumbrid of thaym in the feld C.xx.M^l.

Thanne cam tidyngis to our kyng, that there was anothir ost of Frensshemenne ordeyned redy to fiȝte ayen with him; and anon he commaunded euery man to sle his prisoner, and whanne thay saw that, thay withdrow and wente thair way.

And ther were slayne in the feld on the Frensshe part, the duke of Barri, the duke of Launson, the duke of Brabanne, the erl of Narbonne, the chief constable of Fraunce, viij othir erlis, the arche|bisshoppe of Saunȝ, C barons and mo, and of othir worthi knyȝtis and cote armuris M^l. vC. And of Englishmen were ded that day, the duke of York, the erlle of Suffolk, and of othir not passing xxvj.

And there were take prisoners of the Frensshe part, the duke of Orliaunce, the duke of Burbonne, the erl of Vandom, the erlle of Ew, the erl of Richemund, ser Bursigaund marchalle of Fraunce, and othir worthi menne.

And aftir this, the king cam to Caleis, and so in to Englond, with alle his prisoners, and was receyued with moche ioie and worshippe.

[Anno iiij^to.] A.D. 1416-7.

This same yeer cam Sigismund, the emperour of Almayn, in to Englond forto speke with king Harri, to trete of certayn thyngiȝ touching the pees of Englond and of Fraunce: and also for the wel| fare and vnite of alle holi chirche. And the king and his lordis mette with him at saint Thomas wateryng, withoute Suthwerk, and [folio 171b] him receyued withe greet reuerence and worshippe, and brouȝte him in to Londoun, and fro thenneȝ to Westmynstre, and there he was loggid in the paleis atte kyngis cost: and that same tyme the king yaf him the liverey of the garter.

And sone aftir, cam the duke of Holond in to Englond, to speke with the emperour and with the kyng; and he was loggid in the bisshoppis yn of Ely, at kyngis cost.

And whilis this was in doyng in Englond, the Frenshemenne thouȝte to be vengid, and with a greet arme besegid the toun of Harfliew bothe be watir and be lond; and hadde goten and heerd grete carrakeȝ of Jene, and othir smale vessellis, to ly and kepe the movthe of the river of Sayne, that no vitaille ne othir helpe sholde come vppe unto the toune; of the whiche arme the erl of Armenak was chiefteyne.

Thanne the erl of Dorset, capteyn of Harfliew, sente messagers to the kyng notyfying vnto him alle this doynge, and what scarcite and penury of vitaille was withyn the toun: and anon the king sente his brothir Johan duke of Bedforde forto breke the sege be watir: and he cam with a notable power and faughte with the for|said grete carrakeȝ, and took iiij of thaym, and meny othir Frensshe vessellis. And on of the grettist carrakeȝ of alle scapid and fledde away; but she was so rent and bored in the sideȝ in the said [folio 172a] bataille, that sone aftir it was dround. And the noble erl of Dorset rescued the said toun be londe, and discomfitid and slow meny of the Frenshemenne, and hadde of thaym a gracious victory.

Whanne this was don, the said duke with his priseȝ and prisoners retourned into Engelond agayne: and forasmoche as this was don in the Vigilie of Assumpcioun of our Lady, the kyng commaunded that his chapeleyneȝ sholde say euery day whileȝ he livid, an anteem with the versicle and collect in remembraunce of our lady.

And whanne the emperour hadde be in this lond as longe as it likid him on the kyngis cost, he took his leve of the king; and the

king brouȝte him to Caleis, and taried there to haue ansuer fro the Frensshe party, of suche thyngis as the emperour and the king hadde sent to thaym for; and atte laste it cam, and plesid thaym right nouȝt; and thanne the emperour past forth his way, and the king cam in to Englond agayn.

And anon aftir, the king sente ambassiatours to the generalle counselle of Constaunce for the vnion and pees of alle holi chirche, and forto redresse and cece the scisme and strif that was thatt tyme in the chirche of Rome betuene iij popis.

And that same tyme, be assent of alle nacions it was ordeyned in this counsel, that Englond sholde be callid an nacion, and be counted on of the v nacions that owen obedience to the pope of [folio 172b] Rome, the whiche befor that tyme was vnder the nacion of Duche|land.

And this same yeer, the erl Douglas of Scotland cam in to Englond^*, and was swore to the king for to be his trew manne; but aftirward he brak his oth, and was slayn of Englishmenne atte bataille of Vernulle.

† Stowe places this in the 5th Henry V.

How kyng Harri wente the secunde tyme in to Normandie, and of thegetyng of Cane, and of the sege of Roon.

[Anno v^o.] A.D. 1417.

THE v yeer of his regne, he made redy his ordenaunce and his retenu forto saille in to Normandie agayne, and commanded alle menne that sholde go with him to be redy at Hamptoun, in the Wit|sunwike next folowyng. And thanne he made John his brothir, the duke of Bedforde, lieutenaunt of Englonde; and thanne he saillid

in to Normandie with a notable power and gret ordenaunce, and landid at Towk on Lammesse day; and there he made xlviij knyȝtis, at his landyng.

Thanne cam tidyngis to the king that ther was a gret naueie vpon the se of enemieȝ, that is to say, ix grete carrakis, hulkeȝ, galeieȝ and othir shippis forto destroie his naueie: and anon, he sente the erl of March with a suffisaunt power forto kepe the se, and he took meny of the said naueie, and put the remenaunt to fliȝt; and some were dround with tempest. And on of tho carrakis droof befor Hamptoun, and his mast was throw ouer the toun wallis: and this was on saint Bartilmeweȝ day. [folio 173a]

Tho sente the kyng to the capteyne off Towk commaundyng him to delyuer the toun, and so he dede. And the kyng made ser Johan Kighley capteyne thereof, and commaunded him to put out alle the Frensshe peple.

And thanne was Louers yoldenne to the erl marchal, and the kyng made him capteyn therof.

And thanne the kyng held forthe his way vnto Cane, and it besegid on euery side, and sente to the capteyn forto delyuer it, but he wolde not, wherfore thay assauted the toun; and the duke of Clarence bet doun the wallis with gonneȝ on his side, and first entrid in to the tounne, and cride, "a Clarence! a Clarence! a saint George!" and so was the toun gote. And the kyng entrid and commaunded the capteyn of the castelle to delyuer it vnto him; and he praide him of xiiij daieȝ respit in hope of rescu, and yf non cam, to delyuer him the castel. And vnder this composicion was the tounne and the castel of Baions with othir touneȝ, fortaliȝ, and villageȝ, to the nombre of xiiij. And atte xiiij daieȝ ende cam no rescu, wherfor the castel of Cane with the othir xiiij touneȝ were delyuerid vnto the king; and he made the duke of Clarence capteyn of the toun of Cane and of Baions and of the othir touneȝ

also: and there the kyng helde saint Georgeȝ feste, and made xv knyghtis of the Bathe.

Thanne the kyng gat Valeys Newelyn.

And this same tyme cam the duke of Britaigne vnto kyng Harri and becam his manne. [folio 173b]

And the kyng sente Humfrey his brothir duke of Gloucestre to Chierburghe, and Richard erl of Warwic to Dounfrount; the whiche sone aftirward were yolden vnto thayme.

In the mene tyme, the erlle of Marche, whom the kyng hadde sent to kepe the se, aftir meny stormeȝ and grete tempestis landid at Hoggis in Normandy, and so wente forth vnto the king.

Thanne gat the kyng Argenton, Cessy, Launson, Belham, Ver|nul in Perche, and alle the touneȝ and castellis and strengthis vnto Pountlarge, and fro thenneȝ vnto the cite of Roon.

And this same yeer, ser Johan Oldcastelle knyghte, lord Cobham, was arestid for lollardrie, and put in to the tour of Londoun; and anon aftir he brak out therof, and fledde into Walis and there kepte him longe tyme, and atte laste the lord Powis took him, but he made gret defens and was sore wounded er he myghte be take; and thanne he was brought in a horsliter to Westmynstre, and ther he was iuged to be drawe vnto saint Gilis feld, and there he was hanged and brent on the galoweȝ for his fals oppinions.

Anno vj. A.D. 1418-9.

The vj yeer of king Harri, he sente his vncle ser Thomas Beau|fort to the yates of Roon, and there he displaide the kyngis baner, and sente heroudis to the toun and bad thaym yelde it to the kyng of Englond, and thay saide shortli, thay wolde not. And thanne the said Beaufort took good auisement of the ground al aboute, [folio 174a] and retourned to the king to Pountlarge: and anone aftir, thay of Roon cast down thair subbarbis that stood about the cite, that the kyng sholde there haue no socour.

And the Sunday befor Lammesse day thanne next folowyng, the king with his ost besegid the cite of Roon round aboute; and dede make ouer the watir of Sayne, at Pountlarge, a strong and a myȝti

cheyne of yrenne, and put it thorough grete piles of tre faste ypight in the grounde, and that wente ouer the watir of Sayne that no vessel myȝte passe that way; and aboue that cheyne the king leet make a brigge ouer the river of Sayne that man and hors and alle othir cariage myȝte passe to and fro, whan nede were.

Thanne cam the erl of Warwic fro Dounfrount, and the king sente him to Caudebeek, and thay of the toun cam out and tretid with the erl to be vnder composicion and to do as Ron dede; and it was grauntid on this condicioun, that the kyngis naueie with his ordenaunce myȝte passe vpward saafli without eny let or desturbaunce; and to this composicion thay sette thair selis. And thanne cam vp C shippis and caste there thair ancriȝ, and thanne was Roon besegid both be watir and be land; and whanne this was ydo, the erl of Warwic wente ayen to the king to the sege of Roon; and the duke of Gloucestre cam thider also fro the getyng of Chierburghe.

Thanne cam tidyngis that the king of Fraunce, the dolfyne, the [folio 174b] duke of Burgoyne, and al the power off Fraunce wolde come doun forto rescue the cite of Roon, and breke the sege; but they came not.

And atte firste comyng of the kyng vnto Roon, ther were y noumbrid in the cite be heroudis, of men, wommenne, and childrynne, ccc.M^l; and this sege endurid xx wikis; and evir thay of the toune hopid to haue be rescued, but it wolde not be: and meny hundreddis deide for hunger, for thay hadde etyn alle thair cattis, hors, houndis, rattis, myse, and alle that myȝte be etynne: and ofte tymeȝ the men of armeȝ drivenne out the poer peple atte yatis of the cite for spendyng of vitaille, and anonne our menne drof thaym yn agayne; and yonge childrynne lay ded in the stretis, hangyng on the ded modris pappis, that pite was to se. And whanne the capteyn of the toune saw this grete myschief and hunger, he sente to the kyng, beseching him of his merci and grace, and brouȝte the keyeȝ, and delyuered him the toune, and alle the soudiers voided the toune with thair hors and harneys, and the comuneȝ of the toun abood stille

in the toun payyng yeerli to the king for alle maner custumeȝ, fefermeȝ, and quatrymeȝ, XX M^l. marc. Whanne the king hadde entrid the toune, and restid him in the castel til the toun were set in rewle and gouernaunce, thanne Cawdebeek and othir garisons there nyghe were yolden vndir the same appoyntement.

Thanne the dolfyneeȝ ambassiatours, as it was before acordid, [folio 175a] with ful power to do all thyng as he were there himself, cam to the king to Roon; and aftir meny treteeȝ had, thus it was appoynted, that at a certayn day set, the dolfyne sholde come to the toun of Dreux, and king Harri to Aueraunsshis; and there to cheȝe a mene place, be thair bothe assent, where thay myȝte pesibli trete of the peeȝ; to the whiche appoyntement trewli to be kept, the king and the said ambassiatours sette thair selis. Atte whiche day appoynted the king cam, but the dolfyn cam not; wherfore the peeȝ was broke at that tyme.

In the mene tyme Johan duke of Burgoyne, that hadde the rewle and gouernaunce of the kyng of Fraunce because of his seeknesse, be lettriȝ and ambassiatours souȝte king Harrieȝ grace. And the king sente ambassiatours ayen to king Charlis of Fraunce and to the said duke of Burgoyne to Prouynce, of the whiche ambas|siatours Richard erl of Warwic was chief; and in the way as he sholde go, lay a greet busshement of Frensshemenne to take him and lette his purpooȝ; but he slowȝ and took the more part of thaym, and went forth to Provynce, and purposid his ambassiat and message.

And there it was thus accorded and appoynted, that king Harri of Englond, and Charlis of Fraunce with the quene his wif and the duke off Burgoyne, sholde come to a mene place to trete of pees: and forto do this message the erl of saint Poulle and the sone and [folio 175b] heir of the duke of Burgoyne cam to our kyng as ambassiatours.

[Anno vij^o.] A.D. 1419-20.

Thanne kyng Harri knowyng alle the ground of the mater be relacion of ambassiatours of bothe parthieȝ, appointed with his enemieȝ in this wyse: that at a certayn day he wolde come to

Maunt, and Charlis of Fraunce and the duke of Burgoyne to Pount|toyse, to chese there a mene place forto trete of pees; the whiche mene place for this trete sholde be Melane vp on Sayne; to the whiche place novthir party sholde come with mo thanne M^l. M^l. v. C. men, and in the mene tyme treweȝ sholde be on bothe partieȝ. The whiche mene place was aftirward araid betuene ij villageȝ, and lymytid and markid betuene ij grete dicheȝ, wherynne no man sholde come but only suche as sholde trete of the peeȝ; and there the kyngis tentis were rially pighte and arerid, and the kyngis tentis of Fraunce also. And king Harri leet arere ij tentis betuene ij dicheȝ, wherynne bothe kyngis myȝte trete apart with thair secret counsel, and thastat of bothe kyngis obserued and kept; and a stake was pighte in the middil of a fair playne, to the whiche, and no ferthir, ech kyng sholde come to othir.

Atte day appoynted kyng Harri cam to Maunt, and kyng Charlis because of his accustumed seeknesse cam not, but the quene his wiff and the duke of Burgoyne withe othir noble princis of thair alliaunce [folio 176a] and withe M^l. M^l. v. C. men cam to Pountoyse, and aftirward to the mene place. Thanne kyng Harri first kiste the quene of Franuce, and thanne dame Kateryne hir doughtere, for that tyme he saw hir first; and thanne kyng Harri, the quene of Fraunce and hir douȝtir, the duke of Burgoyne, and othir, wente into a tente, to trete of the peeȝ, where thay were almost iij daieȝ; but it tok non ende at that tyme.

In the mene while, the dolfyn withe lettriȝ and ambassiatours stirid the duke of Burgoyne, that he ne non of his sholde assente to the peeȝ. And atte v. nonas of August, whanne the said kyngis sholde haue assemblid, the kyng of Fraunce, the quene, the duke of Bur|goyne, ne non of thaym cam; wherfore it was openli knowen that the Frensshe parte was cause that the peeȝ was not endid at that tyme.

Thanne wente the kyng to Pountoyse, and gat it; and sente his brothir the duke of Clarence with a notable power vnto Paris, and he gat it, and retourned ayen to the kyng; and thanne gat the kyng Bokende Villers.

A.D. 1419-20.

And whileȝ this was in doyng the duke of Burgoyne, that first hadde sought kyng Harrieȝ grace, wente vnder saaf conduct to the dolfyn to Motreaux; and there be the said dolfyn he was traitorly and vnmanli slayn, and cast in to a pit: and as sone as Philip his sone and his heir wiste of this, he becam kyng Harrieȝ manne.

The same tyme cam certayne ambassiatours of kyng Charlis, of [folio 176b] the duke of Burgoyne and of the citeȝeyneȝ of Paris, to kyng Harri to Maunt, forto trete of peeȝ, but because kyng Harri was bisili occupied in his warris and also he supposid that the Frensshemen were not fulli enclyned to the peeȝ as thanne, this trete took non ende at that tyme, but aftirward at Roon it was fulli endid.

[Anno viij^o.] A.D. 1420-1.

And aftirward whileȝ kyng Harri held his Cristemasse in Roon, the ambassiatours of kyng Charlis and of the dukes of Burgoyne cam thider vnto him, to whom king Harri sente agayn Richard erl of Warwic, with othir wise men and a notable power of men of armeȝ, with fulle power and commaundement to conclude the peeȝ. And aftir meny wise treteeȝ on bothe partieȝ peeȝ was concludid bi thaffinite and wedlok of king Harri and dame Katerine king Charlis douȝtir. But because certayne thyngis were necessary for the whiche the presence of bothe kyngis moste nedis be had, what for settyng to of thair selis, what for the mariage sewyng, and alsoo Charlis was so feblid with age and ofte tymeȝ vexid with his cus|tumable seeknesse; it was betuene thayme thus appoyntid, that king Harri sholde come at a day lymytid vnder treweȝ with such puys|saunce as him likid to Nogent vpon Sayne, to parfourme finally al thyng that to the peeȝ was nedefulle, and yf he cam not alle thyng sholde be had as for noughte. Aftir this appoyntement thus ymaad [folio 177a] the erl retourned to the kyng notifyng vnto him in writyng alle theffect of his ambassiat.

The king fro thenneȝ went to Nogent; and there mette with him the duke of Burgoyne with a gret companie of men of armeȝ. And aftir meny and dyvers treteeȝ, the xij kalendis of Juyne, the xl yere of king Charlis regne, in the cathedralle chirche of Nogent, kyng Harri

withe the duke of Clarence his brothir and othir princeȝ and noblis, and Ysabelle quene of Fraunce with the duke of Burgoyne, beyng there for kyng Charlis, thanne labouryng in his seeknesse forsaid, and in thair owen nameȝ also, and the iij statis of Fraunce, peeȝ be|tuene the ij remes of Englond and of Fraunce was maad, and with certayn condicions approued. And kyng Charlis charged alle his liegemenne on peyne of forfaiture of thair ligeaunceȝ to kepe the said peeȝ; and therto thay made thair othe, and plight thair troutheȝ in the handeȝ of kyng Harri. And anon quene Ysabelle of Fraunce, and Philippe duke of Burgoyne, in the name of kyng Charlis, swoor vpon the holy gospellis to kepe the said peeȝ so concludid for thaym and for thair heiris and successours withoute fraude and male engyne for euermore; and this same oth made quene Ysabel, and the duke of Burgoyne, and the iij statis of Fraunce to kyng Harri, to his heiris and successours. And atte ix kalendis of Juyne, befor quene Ysabel and kyng Charlis counsel, befor the parlement and the iij [folio 177b] statis of Fraunce, and othir English princeȝ and lordis, contract of matrimony be present wordis betuene kynge Harri and dame Kate|rine, kyng Charlis doughtir of Fraunce, was there maad and so|lemnyȝid.

And as sone as alle this was enactid in writyng as it was acordid, kyng Harri, kyng Charlis, the ij quenys Ysabelle and Kateryne, and the duke of Burgoyne wente vnto Senlis and gat it; and fro thenneȝ vnto Melon and besegid it, and that sege endurid fro Juylle vnto Nouembir in moche duresse; and atte laste for defaute of vitail, the toun was yoldenne. Thanne the ij kyngis, the ij quenys, and the duke of Burgoyne with thair ostis wente to Paris, and the citeȝeyneȝ of Paris mette with thaym in ful noble aray.

Anno viij. A.D. 1421.

And at January next kyng Harri and dame Kateryne wente in to Englond, and lefte at Paris Thomas duke of Excestre, gouernour, and Thomas his brothir duke of Clarence, regent of Normandie; the whiche duke of Clarence was slayn there with the Scottis on Estis evyn, whileȝ the kyng was in Englonde. And on the Sunday the

xiiij day of Feuerer, the viij yeer of kyng Harri, dame Kateryne was crouned at Westmynstre.

[Anno ix^o.] A.D. 1421.

At midsomer next aftir, the kyng lefte the quene in Englond, and wente ayen in to Fraunce, and took certayn garisons that were yit rebel; and besegid the toun of Meux, atte whiche sege tidyngis cam [folio 178a] to the kyng that the quene was delyuerid; and aftir her purifica|cioun she wente ayen in to Fraunce.

[Anno x^o.] A.D. 1422.

Whanne Meux was yoldenne, kyng Harri wente to Paris, makyng ordenaunce forto besege the tovn of Cone; and thanne a sore and a feruent maladie him assaillid, and fro day to day him greuousli vexid; til he deide in the castelle of Boys Vincent, the laste day of August, whanne he hadde regned ix yeer v monethis, iij wikis, and iij daieȝ, and is buried at Westmynstre: on whoȝ soule Almyghti God haue mercy. Amen.

Notes

• Ca^m. cxlvij.
• [Reign began March 21st.]
• [April 9th].
• Insurreccio Lol|lardorum.
• [January, A.D.1414.]
• [February 10th.]
• In isto parlia|mento, Rex fecit Johannem, fra|trem suum, ducem Bed|fordiæ; et Humfridum, alium fratrem suum, ducem Gloucestriæ.
• [August 14th.]
• [October 25th.]
• [November 16th.]
• Sigismundus, imperator, venit Angliam.
• [April.]
• After the 8th of the month. See Rymer, vol. ix. pp. 339, 340. Stowe says he landed at Dover, May 1st.
• Walsingham (p. 441) says that Sigismund was installed Knight of the Garter on the Feast of St. George, having told us that he arrived in London on May 7th. This may seem strange, as St. George's day was on April 23rd. Fabyan perhaps explains this apparent contradiction, by saying that the celebration of the feast had been deferred on account of the Emperor.
• "Ante festum Ascensionis." (Wals.) Ascension day this year, 1416, was May 28th.
• [June.]
• He sailed after 25th of July. See Rymer, vol. ix. p. 372. His commission is dated, Southampton, July 22nd, 1416. Id. p. 371.
• Nota capcionem carracarum.
• [August 14th.]
• [August.]
• After the 15th of the month; as the final treaty of mutual alliance was signed at Canterbury on that day, 1416. See Rymer, vol. ix. pp. 377-82.
• [October.]
• Anglia fit nacio.
• A.D. 1417.
• A.D. 1424.
• Ca^m. cxlviij.
• [August 1st.]
• [August 9th.]
• [August 18th.]
• [September.]
• The 4th of September or soon after. The castle of Caen held out till the 20th of that month. Stowe's Annals.
• Dux Britannie venit ad Regem.
• Cobham sus|pensus est, et combustus. [December.]
• [July 31st.]
• Rothomagus obsessa est.
• Rothomagus dedita est.
• [January 19th.]
• [February.]
• [March.]
• [April.]
• [May.]
• [May 29th.]
• Dux Burgundie proditorie inter|ficitur.
• [Sept. 10th.]
• [January.]
• [April.]
• [May 21st.]
• [May 24th.]
• [December.]
• So Stowe (Annals). The true date is 3rd Sunday in Lent, eve of St. Matthias' day, Feb. 23rd. See Rymer, vol. x. p. 63.
• [May.]
• Rex Henricus obit, decus olim, nunc dolor orbis!