An English chronicle of the reigns of Richard II, Henry IV, Henry V, and Henry VI written before the year 1471; with an appendix, containing the 18th and 19th years of Richard II and the Parliament at Bury St. Edmund's, 25th Henry VI and supplementary additions from the Cotton. ms. chronicle called "Eulogium." Edited by John Silvester Davies.
Davies, John Silvester, ed. 1829 or 30-1909,
Page  19

HENRY IV. Of kyng Harri of Bolyngbroke, duke of Lancastre and of Hereforde and erl of Derby; that was the iiij the Harri aftir the Conquest. [folio 154b] *. [Cam. cxlvj.]

A.D. 1399.

Whanne kyng Richard was deposid and putt out of his kyng|doum, the lordeȝ and the comuneȝ chosen ser Harri of Bolyng|broke,*. [[Reign began Sept. 30th.]] duke of Lancastre and of Hereforde and erlle of Derby, sone and heir to Johan of Gaunt duke of Lancastre, to be kyng of Engelonde; and he was crouned at Westmynstre on saint Edwardes day, of maister Thomas Arundelle, archebisshoppe of Cauntirbury,*. [[Monday, Oct. 13th.]] and was anoynted with the oyl of the egle before rehersid: and he was the firste that was anoynted therwith, as it was said.

Thanne continued he the parlement that king Richarde hadde be|gonne, and therynne adnullid and hadde for noughte alle the orde|naunceȝ and statutis that there were maad be king Richarde; and restorid the erlis sone of Arundelle to his landis, and made him erlle off Arundelle; and delyuerid the erlle of Warwic and the lord Cobham and othir out of prisoun; and brende openli at Londoun alle the blanc chartris that kyng Richard and his counselle hadde compellid men to sele; and disgradid alle the dukis that kyng Richarde hadde maad in his laste parlement, and restored ayenne maister Thomas Arundelle to his Archebisshopperiche of Cauntir|bury; and made ser Roger Waldenne, whom kyng Richard hadde [folio 155a] maad Archebisshoppe, bisshop of Londoun, that tyme beyng void; and made the said ser Roger forto restore alle that he hadde take of tharchebisshopriche of Cauntirbury vnto Arundelle: ffor the pope Boneface dampned and adnullid the iugement that king Richard Page  20 hadde yeue ayens the said Arundel be a bulle, and declarid be the same that the chirche of Cauntirbury was not void.

This kyng Harri made Harri his eldest sone and heir Prince of Walis, duke of Cornewaille, and erl of Chestre.

Anno primo. A.D. 1399-1400.

And this same yeer king Harri held his Cristemasse at Wynde|sore, and on xijthe evyn cam thider vnto him the duke of Aumarle, and tolde him how that he, and the duke of Surrey, the duke of Excestre, the erlle of Salisbury, the erl of Gloucestre, and othir mo of thair assent, were acordid to make a mommyng to the kyng on xijthe day at nyghte, and in that mommyng they purposid to sle him. The kyng was also warned therof in anothir maner. The Arche|bisshooppe of Cauntirbury, Arundelle, aftir new yeris day, re|meued fro Cauntirbury toward Wyndesore forto haue be withe the kyng on xij. day. And in the mene tyme a man of the kyngis hous lay alle nyghte with a comyne wommanne in Londoun, and in the morou she saide to him, "Farwelle frende," saide she, "for I shalle nevir se the more." "Whi so?" saide he. "Forsoth," saide she, "for the erlle of Huntyngdoun, the erl of Salesbury, the duke of [folio 155b] Surrey, and meny othir, lyen in waite aboute Kyngestoun, forto sle the kyng and the Archebisshoppe as thay come fro Wyndesore, pur|posing to restore king Richard ayenne to his kyngdoum." "How knowest thou this?" said he. "Forsoth," saide she, "on of thair men lay with me the lattir nyght, and told me this." And he anon in haste rood to the kyng, and tolde him as the wommanne hadde said; and the kyng warned tharchebisshoppe herof be a messager, and he retourned ayen in to the castelle of Reigate.

Whanne the kyng was thus warned of this tresoun, he rood in haste the same xij. nyght to Londoun, to gete him strengthe.

And on of tharchebisshoppis men rood bi Kyngestoun, and the erl of Kent loked out at a wyndow and saw him, and commaundid to brynge him befor him; and axed of him and saide: "Where is thi maister?" and he said, "In the castelle of Reygate." "And where is the kyng?" saide the erlle; and he saide, "At Londoun." "Yf I had met with thi maister," saide the erl, "I wolde hauee shave Page  21 his croune;" and commaundid to spoile the said man of his hors and of his money.

But as sone as the said lordeȝ wiste that thair counselle was dis|couerid and wraid, thay fledde euery man his way, and the duke of Surrey and the erl of Salisbury with thair mayne fledde vnto the toun of Circestre, and saide be the way that kyng Richard rood there, [folio 156a] and cam late in the euenyng to thair ynneȝ. The comuneȝ of the toune wolde haue arestid thaym, and thay made gret defens, but atte laste thay were discomfitid and take be the said comuneȝ, and thay smoot of the lordis heddis; and [they] were set on London brigge, and thair quartris were sent to dyuers touneȝ of Englond: and meny of thair men were there ytake, and put in to prisoun, because some of thayme put brondis of fire in to the rovis of diuers menneȝ houseȝ, wherfore aftirward meny of thaym were drawe and hanged.

At Oxenforde were take ser John Blount and ser Benet Sely, knyȝtis, and Thomas Wyntereshille squyer, and were beheddid and quartrid.

And the same yeer at Pritwelle in Essex, in a mille, ser John Holond duke of Excestre was take be the comuneȝ of the cuntre, and led vnto Plasshe where as king Richard arestid ser Thomas of Wodestoke, duke of Gloucestre; and there thay smoot of his hed, and yt was set on London brigge.

The same yeer at Bristowe was take the lord Spenser that was erlle of Gloucestre, and the comuneȝ of the toune smot of his hed in the market place, and it was set on London brigge.

Whanne kyng Richard herde alle this, he was utterli in despeire, and confessid that this was do be his counsel, and for sorou and*. [Rex Ricardus moritur.] hunger he deide in the castle of Pountfret.

And whanne that king Harri wiste verili that he was ded, he leet [folio 156b] close and sere him in lynne clothe alle saue the visage, and that was left openne that men myghte se and knowe his persone from alle othir, and so he was broughte to Londoun to Poulis, and there he had his Dirige and masse; and the same wise at Westmynstre, and thanne he was buried at Langley. Page  22

And aftirward this same yeer ser Bernard Brokas, ser Johan Shelleye, knyghtis, and ser Johan Maudeleyn, a parson of king Richardis chapelle, were beheddid, and thair heddis set on Londoun brigge: and meny othir were acused of tresoun, and broughte befor the justiceȝ, of whom none ascapid, saue onli ser Roger Waldenne.

And this same yeer, quene Ysabelle the secunde wiff of kyng Richard was put fro her dower and sente in to ffraunce with meny grete yiftis, and anon as she was come in to ffraunce, the Frenshe|menne breek the treweȝ maad betuene king Richard and thaym.

Anno ijo. A.D. 1400-1.

The secunde yeer of his regne, he wente in to Scotland, but the Scottis wolde not mete with him; and there the erl of Dunbar becam his manne, and the kyng yaf him the Counte of Richemunde.

This same yeer was holden a parlement at Westmynstre, and thider cam Oweyn off Glendore, a Walshman, that was sumtyme a squier of the erlis of Arundel; complaynyng how that the lord Gray [folio 157a] Ruthynne hadde take from him wrongfulli a part of his land; but he myȝte haue no remedy. And the Bisshoppe of Saint Assaphe of Walis counselid the lordis of the parlement that thay sholde not mystrete the said Oweyne, lest he made the Walshmen arise; and thay ansuerde and saide thay set nouȝt be him.

This same yeer cam the emperour of Constantinople in to Englonde, to axe helpe and socour of the kyng ayens the Turkis, and broughte with him a pardon fro the Pope, be the whiche he gadrid moche money, and was longe in this lond on the kyngis cost, and thanne the kyng yaf him iiij m l. li.; and so he wente hoom ayen.

This same yeer the Walshmenne began to rebelle ayens king*. [Insurreccio Walliæ.] Harri, and also a greet debaat began betuene the lord Gray Ruthyn and the forsaid Oweyne of Glendore: and the Walshmen destroide the kingeȝ touneȝ and lordshippis in Walis, and robbid and slow the kyngis peple bothe English and Walshe; and this enduris xij. yeer.

And the king wente in to Walis with a gret power, but he myȝte not take Oweyn that was chief capteyn of the Walshmenne, ne spede that he cam for; and retourned hoom ayenne. And the lord Gray Page  23 undertook forto kepe the cuntre, and sone aftir the said Oweyne took the said lord Gray prisoner; and he was raunsond for prisoners of [folio 157b] the Marche. And atte laste Oweyn made the said lord Gray wedde on of his doughtris, and kepte him there with his wiff, and sone aftir he deide.

This same yeer was so gret derthe of corn, and so gret scarcite, that a quarter of whete was sold for xvj. s.

And this same yeer ser Roger of Claryngdoun knyȝt, the Priour of Launde, and viij. frere menours, wherof some were maistris of diuinite, and other to the noumbre of xij. personeȝ, were drawe and hanged for treson at Tybourne.

Also a womman acusid a grey frere of Cambrigge, an old man, of certayn wordes that he sholde haue said ayens the kyng, and his iugement was that he sholde fiȝte with the womman, and his on hand bounde behynde him: but the Archebisshop of Cauntirbury was the freris frend and cesid the mater.

Anno iijo. A.D. 1401-2.

The iij. yeer of kyng Harri, anon aftir Cristemasse, was seen and apperid a sterre in the west, whooȝ flameȝ ascendid upward, that was callid "the blasyng sterre," and be clerckis it was callid, "stella*. [Stella comata.] comata."

And aboute this tyme the peple of this land began to grucche ayens kyng Harri, and beer him hevy, because he took thair good and paide not therfore; and desirid to haue ayeen king Richarde. Also lettriȝ cam to certayn frendis of kyng Richard, as thay hadde be sent from hymself, and saide that he was alive; wherof moche peple was glad and desirid to haue him kynge ayeen. [folio 158a]

And a frere menour of the couent of Aylesbury cam to the kyng, and acusid a frere of the same hous, a prest, and saide that he was glad of kyng Richardeȝ lif; and he was brouȝt to the king, and he saide to him:—"Thou hast herd that king Richard is alive, and art glad therof." The frere ansuerde and saide, "I am glad as a man is glad of the liff of his frende, for I am holden to him, and alle my kyn, for he was our furtherar and promoter." The king saide, Page  24 "Thou hast noised and told openli that he livithe, and so thou hast excitid and stirid the peple ayens me." The frere saide, "Nay." Than saide the king to him, "Telle me trouthe as it is in thi herte;—yf thou sawest king Richard and me in the feld fighting togedir, with whom woldest thou holde?" "Forsoth," saide the frere, "with him, for I am more beholde to him." Thanne saide the king, "thou woldest that I and alle the lordis of my reme were ded?" The frere saide, "Nay." "What woldest thou do with me," saide the king, "yf thou haddist the victory ouyr me?" The frere saide, "I wolde make you duke of Lancastre." "Thou art not my frend," saide the kyng, "and therfor thou shalt lese thin hed." And thanne he was dampned befor the justice, and drawe and hanged and beheddid.

Aftir this cam anothir frere menour to the kyng, that owde no good wille to a brothir of his, axyng mercy and grace, and saide that vc men of seculers and religious were acorded to mete togedir [folio 158b] vpon the playn of Oxenforde on Midsomer eve, and go fro thennes to seche king Richard, "and Y and x. of my feloweȝ of the couent of Leycestre araide vs for to go with thaym: and ther is in that couent a maister of diuinite, an old manne, that spekith eville of you, and saith that king Richard shalle fiȝte ayens you, and so it is pro|phecied, as he saith." The viij freris and the maister of diuinite were brought bounde vnto Londoun, and the othir ij. that were acusid myȝt not be founde.

And the forsaid frere acusid meny othir freris of diuers couentis, but thay fledde away.

The king callid the archebisshop and othir lordis, and the freris were brouȝt befor thaym; and some of thaym were yong, and some olde and sympilly lettrid: and thair acuser stood by and stedfastly acusid thayme, and thay ansuerde vnwarly. Thanne saide the king to the maister, "Thise bith lewde men, and not vnderstondyng; thou sholdist be a wise man, saist thou that king Richard livith?" The maister ansuerde, "I say not that he Page  25 livith, but I say yf he live, he is veray king of Engelonde." The king saide, "He resigned." The maister ansuerde, "He resigned ayens his wil in prison, the whiche is nought in the lawe." The kyng ansuerde, "He resigned with his good wille." "He wolde not haue resigned," saide the maister, "yf he hadde be at his fredoum; [folio 159a] and a resignacion maad in prison is not fre." Thanne saide the kyng, "He was deposid." The maister ansuerde, "Whanne he was kyng he was take be force, and put into prisoun, and spoyled of his reme, and ye haue vsurpid the croune." The kyng saide, "I haue not vsurpid the croune, but I was chosen therto be eleccioun." The maister ansuerde, "The eleccion is noughte, livyng the trewe and lawful possessour; and yf he be ded, he is ded be you, and yf he be ded be you, ye haue loste alle the righte and title that ye myȝte haue to the croune." Thanne saide the kyng to him, "Be myn hed thou shalt lese thyne hed." The maister saide to the king, "Ye loued nevir the chirche, but alwey desclaundrid it er ye were kyng, and now ye shall destroie it." "Thou liest," saide the king; and bad him voide, and he and his feloweȝ were lad ayen vnto the tour.

Thanne axed the kyng counsel, what he sholde do with thaym; and a knyȝt that loued nevir the chirche saide, "We shal nevir cece this clamour of kyng Richard til thise freris be destroid."

The minister of the freris wente to the kyng, and saide that he hadde commaunded alle his bretheryne that thay sholde no thing saw, say ne speke, in preiudice and offens of his persone, and axed grace for thayme. The kyng saide to him, "Thay wille not be chastiȝid be the, and therfor thay shalle be chastizid be me." [folio 159b]

Thanne were thay brouȝt to Westmynstre befor the justiceȝ, and the justice saide unto thaym, "Ye bith enditid that ye in ipocrisie and flateryng and fals lif, haue prechid fals sermons; wherynne ye saide falsli that king Richard livith, and haue excited the peple to seche him in Scotland—Also, ye in your ypocrisie and fals lif, haue herd fals confessions, wherynne ye haue enioyned to the peple in Page  26 wey of penaunce, to seche king Richard in Walis—Also, ye with your fals flateryng and ypocrisie, haue gadrid a gret summe of money with begging, and sent it to Oweyne of Glendore, a traitour, that he sholde come and destroy Englond—Also, ye haue sent in to Scotland for vc. men to be redy upon the playn of Oxenford on midsomer eve to seche kyng Richard. How wille ye excuse you? I counsel you to put you in the kyngis grace." The freris ansuerde, "We put vs vpon the cuntre."

And neither men of London ne of Holborne wolde dampne thaym; and thanne thay hadde an enquest of Yseldon, and thay saide "Gilti."

Thanne the justice yaf jugement and saide, "Ye shul be drawe fro the tour of Londoun vnto Tiburne, and there ye shalle be hanged, and hange an hool day, and aftirward be take doun, and your heddis smyte of and set on London brigge." And so it was don.

And the maister at Tiburne made a deuout sermon with this theme, "In manus Tuas Domine;" and swoor be his soule that he [folio 160a] trespast not ayens king Harri, and forgaf thaym that were cause of his deth.

And another frere whanne he sholde die saide, "Yt was not our entent, as our enemieȝ say, to sle the king and his soneȝ, but forto make him duke of Lancastre, as he sholde be."

On the morou aboute evesong tyme, on cam to the wardeyn of the freris, and saide he myȝte fette away the bodieȝ and burye thaym; and whanne thay came thay founden thaym caste in to dichis and heggis, and the heddis smyten of, and thay baar thaym hoom to thair couent with gret lamentacioun.

And aftirward, men of thenquest that dampned thayme, cam to the freris prayying thayme of foryifnesse, and saide, "but yf thay hadde said that the freris were gilti thay sholde haue be slayne."

And this same yeer, Oweyn of Glendore took ser Edmund Mortymer in Walis, and because he myȝte not paie his raunson he wolde nevir be vnder kyng Harri, but wedded on of Oweyneȝ douȝtris.

In the birthe of this Edmund fille meny wonder tokeneȝ; for out Page  27 of the floor of his fader stable cam out blood, and wellid vp so hie that it couerid the hors feet; and alle the shethis of swerdis and of*. [Nota mirabilia portenta.] the daggaris in the hous were ful of blood, and all the axes with reed of blood; And whanne the said Edmund lay in his cradille he myȝt not slepe, ne cece of cryynge, til he saw a swerd: and whanne he sat in his norsis lappe he wolde not be stille til he hadde sum [folio 160b] instrument of warre to pleie with.

[Anno iiijto] A.D. 1403.

And this same yeer was the bataille of Shrewesbury on Mari Maudeleyn eve, betuene king Harri and ser Henri Percy, the erlis*. [[July 21st]] sone of Northumbirlond: of the whiche bataille the cause and occa|sioun was this.

The erl of Northumbirlond praide the kyng to paie him his*. [Nota causam belli Salopiæ] moneie due vnto him for keping of the marchis of Scotland, and saide, "My sone and I haue spendid our good in keping of the said marchis." The king ansuerde, "I haue no moneie, ne non thou shalt haue." The erle saide, "Whanne ye cam in to this land ye made promys forto be rewlid be our counsel, and ye take yeerli moche good of the reme and paie nouȝt, and so ye wrathe your comuneȝ: good [God?] sende you good counsel."

Thanne cam the erlis sone ser Harri Percy, that hadde weddid the forsaid Edmundeȝ sustir that was prisoner in Walis, prayyng the kyng that he wolde suffre that the said Edmundeȝ raunsoun myȝte be paid of his owene. The kyng saide, that with the money of his reme he would not fortifie his enemieȝ ayens himme. Ser Henri Perci saide, "Shalle a man spende his good, and put him self in perille for you and your reme, and ye wil not helpe him in his*. [Nota ista verba inter Regem et Henr. Percy.] nede?" The king was wroth and saide to him, "Thou art a traitour! wilt thou that I sholde socoure myn enemieȝ, and enemieȝ of the [folio 161a] reme?" Sir Henri Percy saide, "Traitor am I none, but a trew man, and as a trew man I speke." The king drow to him his daggar: and ser Henri Perci saide to the kyng, "Not here, but in the feld." And so he wente his way.

And he and his vncle ser Thomas Percy, whom king Richard Page  28 hadde maad erlle of Worcestre, gadrid a greet ost in the north|cuntre, and saide thay moste fiȝte ayens the Scottis; and wente in to Chestreshire, and took with thaym meny Chesshire men, and sente to Oweyn of Glendore forto come and help him, but Oweyne was aferd of treson and cam not; but meny of the Walshmen cam to thaym: and so they cam to Lichfeld. And the said ser Henri Percy and alle his men wered and were araid in the liverey of the hertis, the whiche was king Richardis liverey.

And there the said ser Henri leet crie openli, and saide that he was on of the chief causers that king Richard was deposid, and most helper to brynge yn kyng Harri, wenyng that he wolde have amendid the rewle of the reame; and now kyng Harri rewlith and gouerned worse the land than dede king Richard; wherfor, he saide, he wolde amende it yf he myȝte.

The kyng also gadrid anothir ost and mette with him beside Shrowesbury, and axed of him the cause of his comyng; to whom Percy ansuerde and saide:—"We brouȝte the yn ayens king Richard, and now thou rewlist worse than dede he. Thou spoilist [folio 161b] yeerly the reme with taxes and talageȝ, thou paest no man, thou holdist no hous, thou art not heir of the reme; and therfore, as I haue hurt the reme be bryngyng yn of the, I wille helpe to refourme it." The king ansuerde and saide, "I take talageȝ for nedis of the reme, and I am chosen kyng be comune assent of the reme, wherfor I counsel the to put the in my grace." Percy ansuerde and saide, "I trust not thi grace." "Now I pray God," saide the kyng, "that thou most ansuer for alle the blood that here shalle be shed this day and not I." And thanne saide the kyng, "Avant baner."

Thenne was there a strong and an hard bataille, and meny were*. [Belium Salopie.] slayn on bothe sideȝ: and whanne ser Henri Percy saw his men faste slayn he pressid in to the bataille with xxx men, and made a lane in the myddille of the ost til he cam to the kyngis baner, and there he slow the erl of Stafforde and ser Thomas Blount and othir; and atte laste he was beset aboute and slayne, and anon his ost was dis|parblid Page  29 and fledde. And ser Henri Percieȝ hed was smyte of and set vp at York, lest his men wolde haue saide that he hadde be alive. And ser Thomas Percy his vncle was take and beheddid at Shrowesbury, and his hed set on London brigge.

And in this bataille the prince, kyng Harrieȝ sone, was hurt in the face with an arow.

And this bataille was do in the yeer of our Lord Ml. CCCC. ij.*. [The battle of Shrewsbury was fought in 1403, on Saturday, St. Mary Magd. eve (Hardyng. Ed. Ellis, p. 361), July 21st. See note.] [folio 162a]

After this bataille was ydo, the knyghtis and squiers of the north cuntre that had be with ser Henri Percy, wente hoom ayen in to Northumbirlond, and kepte thaymself in strong holdis and castellis and wolde not truste in the kyngis grace.

And aftirward the king sente for the erlle of Northumbirlond that was ser Henri Percieȝ fader; and he saide yf the kyng wolde swere that he sholde come and go saaf til he hadde excusid him in the Par|lement, he wolde gladli come; and so he cam to the parlement, and excusid him that he was not gilty of the bataille of Shrewesbury, and swoor vpon the cros of Cauntirbury befor the parlement, that he sholde evir be trew to king Harri.

To this parlement cam lettris as they hadde be sent from king Richard, semyng so euident and so trewe, that the king and all the parlement were therof astoned, and hadde gret marvaille; and callid him that was his keper, and axid of hym how he wolde ansuer to tho lettris; and he ansuerde and saide he wolde fiȝte with eny man that wolde say that he was alive.

Anno iiijto A.D. 1403.

The iiij yeer of king Harri, cam dame Johane the duchesse of Britayne into England and landed at Falemouth in Cornewail, and was weddid to king Harri in the abbey of saint Swithuneȝ of Wyn|*. [[February 7th]]chestre; and some aftir she was crouned at Westmynstre.*. [[February 26th]]

And this same yeer, dame Blaunche kyng Harrieȝ elder douȝtir [folio 162b] was sent vnto Coloyne with the erl of Somerset hir vncle, and maister Richard Clifford thanne bisshop of Londoun, and othir notable Page  30 personeȝ, and thenne she was weddid to the dukeȝ sone of Beyre; and aftir the solennite of the mariage our lordis cam in to Englond agayne.

Anno vo, A.D. 1404.

The v yeer of king Harri, the lord Thomas, his sone, wente to the se, and the erlle of Kent with him, and thay brende certain touneȝ in the yle of Cagent, and took ij grete carrakeȝ of Jene ladenne with*. [[April.]] diuers marchaundise, because thay wold not strike their saileȝ in the kyngiȝ name of Engelond, and brouȝte thaym in to the Camer beside Wynchilse, and there the godis were canted; and on of the carrakeȝ was sodenli brent; and so the lordis wente no ferthir at that tyme.

And this same yeer, Johan Serle, sumtyme yoman of kyng Richardeȝ robes, that was on of the principalle slears of the duke of Gloucestre, cam out of Scotland in to Englond, and saide to diuers personeȝ that king Richard was alive in Scotlande; wherfore he brouȝte moche peple in gret errour and grucchyng ayens king Harri, for the peple wende feithfulli it hadde be so. But atte laste he was take in the north cuntre, and was drawe thoroughe eueri cite and burghe toun in Englond, and thanne he was brought to Londoun, and there at Guyldehalle he was iuged to be drawe fro the tour [folio 163a] of Londoun thorouȝ Londoun vnto Tiburne; and there he was hanged and beheddid and quartrid, and his hed set on London brigge, and his quarters were sent to the iiij gode tovneȝ of Englond.*. [October 20th.]

This Serle confessid that whanne king Richard was take in Walis, he staalle his signet and fledde in to Scotland, and therwith he selid meny lettris, and sente thaym to such men as were kyng Richardeȝ frendis, and saide he was alive; and so he was cause of meny menneȝ dethe: and he saide also that there was a man in Scotland moche lik to king Richard, but it was not he.

Anno vjo A.D. 1405.

The vj yeer of king Harri, the erl of Marre of Scotland vnder saaf conduct cam in to Englond, forto chalange ser Edmund the erlle of Kent of certain cours of warre on horsbak, and his chalange*. [[January.]]Page  31 was acceptid and grauntid, and the place take in Smythfeld; and there they riden togedir with sharp speris dyuers cours, but the erl of Kent hadde the feld with moche worshippe.

And this same year, maister Richard Scroop archebishoppe of*. [Insurreccio Ri|cardi Scroope Archiepiscopi Ebor.] York, and the lord Mowbray that was erl marchalle of Englond, and a knyght callid ser William Plymptoun, gadrid a strong*. [[May.]] power in the north contre ayens the king; and the kyng sente thider his power and took thayme, and thay were beheddid at York: and sone aftirward Almyȝty God shewde for the said archebisshoppe [folio 163b] meny grete miracleȝ.

And the cause of the said risyng was this:—The erlis sone of Notyngham and his heir the lord Moubray compleyned to the archebisshoppe of York, and saide that his auncestris were evir wont of righte to be marchallis of Englond, and be that thay held thair lond; and notwithstonding that, the king hadde yeue the said lond with the office to the erl of Westmerlond. Tharchebisshoppe comynd of this with wise men of counsel, and aftirward he made a sermon in the chirche of York, and exhortid and stirid the peple to be assistent and helpyng to to the correccioun and amendement of the myschiefs and mysgouernaunceȝ of the reme, hauyng in consi|deracioun the grete pouerte of the marchauntis in whom was wont to be the substaunce of the richeȝ of alle the land: and also the grete reisynges of taxeȝ, tallages and custumeȝ vnder colour of borowyng: and also, that due paiement be maad for the kingeȝ vitailleȝ: and that the clergie and the comune peple were not vexid ne charged with importable chargis of taxis and talagis as thay hadde longe tyme be: and that the heiris of noble men and of lordis of the lond myȝte be restorid to their enheritaunce hoolli, euery man aftir his degre and birthe: and also that suche covetous men as were of the kyngis counsel, that took away and turned to thair owen vse suche godis as were ordeyned to the comune help of the lond, and make [folio 164a] thaym self riche withalle, be remeued and put away fro the king.

Thise articles and meney othir the archebisshoppe made be writen Page  32 in English, and were set on the yatis of the cite, and sent to curatis of the tovneȝ aboute, forto be prechid openli.

And the said archebishoppe and the lord Mowbray gadrid a greet ost, and wente toward the erlle of Westmerland; and the erlle cam agayns thaym with anothir ost sent fro the kyng to take thaym; and whanne they were nyghe togedir, the erl praide tharchebishoppe and the lord Mowbray, that thay myȝte speke togedir and trete of peeȝ; and thay wente to the erlle, and the erl hadde there botellis with wyne, and made thaym drynke; and whileȝ the said erlle fayned himself to trete, a knyȝt of his rood to the archbisshoppis ost, and saide that the lordis were acordid, and in token thereof they drank togedir, "and therfore tharchebishoppe comaundeth every man forto go hoom agayne, for he shall this nyȝt sowpe with the erlle."

The archbisshoppis men were aferd, for ther was a litille hill betuene tharchebisshop and thaym, so that thay myȝte nowthir se him ne the erl; notheleȝ, thay wende it hadde be trewe that the knyȝt saide, and wente tharr way and were disparblid; and the knyȝt retourned agayn to his companie: and anon the erl and he,*. [Archiepiscopus capitur.] with thair ost, fille vpon tharchebisshoppe and lord Mowbray, and [folio 164b] took thaym, and ladde thaym to the kyng to Pountfret.

Aftir this the king cam to York, and the citiȝeynes of the cite cam out barefoot and ungirt, with haltris aboute thair neckis, and fil doun before the kyng axyng mercy and grace, because they arooȝ with tharchebisshoppe.

The archebisshoppe of Cauntirbury, Arundelle, heryng alle this, cam in haste to the kyng and to him saide, "Sire, I am your gostly fader and the secunde persone of the reme, and ye sholde accept no manneȝ counsel souner than myn, yf it be good: I counsel you that if tharchebisshoppe of Yorke haue trespast so moche ayens you as it is said, reserue him to the popis iugement, and he will so ordeyne that ye shal be plesid; and if ye wille not so, I counsel let him be reserued to the iugement of the parlement, and kepe your handis vndefoulid from his blood." The king saide, "I may Page  33 not for rumour of the peple." And tharchebisshoppe requirid a notari to make an instrument of the kyngis ansuer, that yf nede were it myghte be presentid vnto the pope.

Thanne were the archebisshoppe of York and the lord Mowbray dampned vnto deth, and ser William Plympton with thaym, and were beheddid withoute the cite of York.*. [[June 8th]]

And whenne the archebisshoppe sholde die, he saide, "Lo! I shalle die for the laweȝ and good rewle of Engelond." And thanne he [folio 165a] saide vnto thayme that sholde die with him, "Lat vs suffre deth mekely, for we shul this nyghte, be Goddis grace, be in paradis." Thanne saide tharchebisshoppe to him that sholde smyte of his hed, "For His loue that suffrid v woundes for alle mankynde, yeue*. [Nota ista verba Archepiscopi.] me v strokis, and I foryeve the my dethe." And so he dede: and thus thay deide.

And anon aftir, as it was said, the king was smyte withe a lepir: for the whiche archebisshoppe, Almyghti God sone aftirwarde wroughte meny grete miracles.

Whanne the Pope herde of the deth of the archebisshoppe of York, he cursid alle tho that slow him, and alle that were assentyng to his dethe or therto yaf counselle, and commaundid tharchebisshoppe of Cauntirbury that he sholde denounce alle thaym acursid: but tharchebisshoppe wolde not do it alone.

Thanne sente the king to the Pope, and saide that the sedicion of the people wolde not suffre him live, and sente also vnto him the habergeon that tharchebisshoppe was armed ynne with thise wordis: "Pater, vide si tunica hec sit filij tui an non." And the pope ansuerde agayn in this wise, as it was said: "Sive hec sit tunica Page  34 filij mei an non, scio quia fera pessima devoravit filium meum:"— and so be prive meneȝ of money the mater was cesid.

Anno vij. A.D. 1406.

The vij yeer of king Harri, dame Luce the dukis sustir of Melane, cam in to Englond and was weddid to ser Edmund erl of Kent, in [folio 165b] the priorie of saint Marieȝ in Suthwerc.*. [[January 24th]]

And this same yeer deide that worthi knyȝt ser Robert Knollis,*. [Ricardus Knol|lis moritur.] and is buried atte White Freris in Fletstrete in Londoun.*. [[August.]]

And this yeer ser Thomas Rempstoun, knyghte, lieutenaunt of the*. [Thomas Remp|ston submergi|tur.] tour of Londoun, was dround in the Thamise at Londoun brigge as he cam fro Westmynstre.

And this same yeer, dame Philippe the yonger douȝtir of king*. [[May]] Harri was lad into Denmarc be ser Richard the dukes brothir of York and maister Edmund Courteneye bisshoppe of Norwich, and othir worthi men; aud there she was weddid to the king of Den|marc in a tovne callid Londoun; and aftir that our lordis cam hoom agayne.

Anno viij. A.D. 1406.

The viij yeer of king Harri ther was a manne callid the Walssh clerc, and he appelid a knyghte of treson that was callid ser Perci|*. [[November.]]valle Sowdan, and thay faughte togedir in Smythfeld, and the knyghte ouercam the clerk and made him yelde him gilty: and thanne he was spoilid of his armure and hanggid at Tiburne.

[Anno ix.] A.D. 1408.

And this same yeer, ser Henri erlle of Northumbirlond, and the lord Bardolf, that fledde in to Scotland for drede of king Harri, cam agayn in to Englond forto have destroid king Harri; and the Shireve of Yorkshire reisid peple and took thayme and smoot of thair heddis; and the hed of the erlle and a quarter of the lord were*. [[February 18.]] set on London briggee.

Anno ixo. [x.] A.D. 1408-9.

The ix yeer of king Harri, ser Edmund Holond, erl of Kent, was [folio 166a] maad Admiral of the se: and as he laide sege to the castell of Briac, in Britaigne, he was smyte in to the hed with a quarel, and so he deide.

And this same yeer, was a gret frost in Englond that endurid xv wekeȝ. Page  35

And this same yeer, maister Robert Halome bisshop of Salisbury, and othir, were sent to the general counsel to Constaunce.*. [To the Council of Pisa, not Constance, held in 1409—see note.]*. [Consilium Con|stanciense [Pi|sanum] ordina|tum est.]

Anno xo. A.D. 1409.

The x yeer of king Harry, the erl of Dunbar that was swore English, and whom king Harri hadde maad erl of Richemund, as befor is said, fledde ayen in to Scotland; and saide that he fayned himself an Englishmanne, forto help slee and destroie the erl of Northumbirlond and othir that were enemieȝ vnto Scotland.

And this yeer was seen blood boile out of wellis in diuers partieȝ*. [Sanguis emana|vit de fontibus, etc.] of Englond; and anon aftir, meny men deide on the blody mensoun &c.

And this same yeer the Seneschalle of Henaude, with othir worthi menne, cam in to Englond to gete worshippe in dedis of armes; and he chalanged the erl of Somerset, and he delyuerid him manfulli in alle his chalangeȝ, and put him to the worse, and hadde the feld in alle poyntis. The secunde day, cam in to the feld a man of the Sene|schallis part, and ayens him cam ser Richard of Arundelle, knyȝt; and the Henavder hadde the bettir of him in on poynt, for he brouȝte him on his kne. The iij day, cam yn anothir Henauder, and ayens [folio 166b] him cam ser Johan Cornewaille, knyghte, and manli quyt him, and hadde the bettir of his aduersarieȝ in alle poyntes. The iiij day, cam yn anothir Henauder, and ayens him cam ser Johan Cheyneȝ sone, and cast the Henauder in the feld, hors and manne; wherfore the king made him knyȝt. The v day, cam yn anothir Henauder, and to him cam John Stiward, squier, and hadde the bettir. The vj day, cam ynne anothir Henauder, and to him cam William Porter, squier, and hadde the bettir in the feld, and the king made him knyghte. The vij day, cam ynne anothir Henauder, and to him came Johan Standishe, squier, and hadde the bettir in the feld, wherfore the king made him knyghte. And that same day cam yn anothir Henauder, and to him cam a squier of Gascoigne, and hadde the bettir, and the king made him knyghte. The viij day, cam in ij men of armeȝ of Henaude, and to thaym cam ij Page  36 soudiers of Caleis that were bretherynne ycallid the Burghes, and quyt thaym wel and manli in the feld, and hadde the bettir, and thus endid the chalangeȝ in Smythfeld, with moche worshippe.

Anno xjo. A.D. 1409-10.

The xj yeer of kyng Harri, was a bataille do in Smythfeld betuene ij squiers, that on me [men] callid Gloucestre, that was appellaunt, and Artur, that was defendaunt; and they faught manli togedir longe tyme, and for thair manhood the king took thair quarel in to his [folio 167a] handis, and made thaym go out of the feld both at onys, and yaf thaym grace.

Anno xijo. A.D. 1410-1.

The xij yeer of kyng Harri, a squier of Walis called Ris ap Die, that was supporter of Oweyn of Glendore, that dede moche destruc|*. [[December 9th.]] cioun to the kingis peple in Walis, was take and brought to Londoun, and drawe and hanged and quartrid.

And this same yeer, anon aftir Michelmasse, the Thamise at Londoun flowed and ebbid iij tymeȝ in a day naturelle; and ther were take therynne meny grete and straunge fissheȝ of dyuers naturis, that betokened fallyng of newe thyngis.

Anno xiij. A.D. 1411-2.

And this same yeer, the duke of Orliaunce assemblid vnto him the duke of Barry, the duke of Burbon, the duke of Britaigne, the erl of Armynak, and othir grete men of south Fraunce; and with a gret power pursude the duke of Burgoyne, to be vengid on him for his fader dethe whom he slow traitourly in Paris.*. [[Nov.23,1407.]]

And the duke of Burgoyne with assistence and help of the king of Fraunce and of his sone, gadrid a gret ost of Fraunce, of Flaundris, of Almayne, of Scotland, and sente ambassiatouris to the Prince, king Harrieȝ sone, for help and socour of men of armeȝ and archiers, ayens the duke off Orliaunce. And the prince sente vnto himme the erlle of Arundelle, ser Gilbert Vmfrevile erlle of Kyme, ser Johan Oldcastelle lord Cobhame, and meny othir; and thay [folio 167b] mette with the duke of Orliaunce at Senclowe beside Paris; and*. [[November, A.D. 1411.]] there our men him discomfited, and slow meny of his menne, and the duke fledde; and thus our men hadde the victory, and cam hoom agayn with grete yiftis. Page  37

And anon folowynge, the duke of Orliaunce sente ambassiatours to king Harri, beseching him of helpe and socour ayens his dedly*. [[May.]] enemy the duke of Burgoyne; and thanne the king made Thomas, his sone, duke of Clarence; and his other sone John, duke of Bedforde; and ser Thomas Beaufort he made erl of Dorset; and the duke of Awmarle he made duke of York; and sente his sone Thomas, and the said erl of Dorset, and ser Johan Cornewaille, and meny othir notable men, in to Fraunce; and they landed at Hoggis in Normandie. And there mette with thayme at thair landyng, the lorde Hambe, with vij Ml. men of armeȝ of Frensshe|menne, and all were put to fliȝt, and vij C of thaym were take, and iiij C hors, withoute tho that were slayne in the feld; and so our lordis riden forth to Burdeux thorouȝ Fraunce, for the lordis were acordid er thay cam, and token meny prisoners be the weye; and aftirward thay cam in to Englond agayn with the vyntage.*. [Sir John Bew|ford.]

This same yeer, deide ser Johan Beaufort before said erl of Dorset, and capteyn of Caleys, and ys buried in the Abbeye of the tour hille. [folio 168a]

And this same yeer, pope Johan the xxiij sent a frere menour in to this land, the generalle of the ordre, desiryng of the king, that he sholde sende his sone Thomas vnto Rome, forto be the popis Cap|teyne and rewler of his ost, ayens the king of Naplis and the Antipope*. [Nota hic erat scisma.] Gregore. And the same tyme the pope dispensid with the said lord Thomas duke of Clarence, forto wedde the countesse of Somerset, his vncleȝ wiff.

Anno xiiijo. A.D. 1412-3.

The xiiij of his regne he leet make galeyeȝ of warre purposing forto haue gone to Jerusalem, and there have endid his lif.

And this same yeer it was acorded betuene the Prince, king Harrieȝ sone, and Harri bisshoppe of Wynchestre, and many othir lordis of this lond, that certayn of thaym sholde speke to the king, and entrete him to resigne the croune to the said Prince Harri, his sone, because he was so gretli vexid and smyte with the seeknesse of lepre; but he wolde in no wise. Page  38

And sone aftir he deide in the Abbeie of Westmynstre in a chambir callid Jerusaleme, aboute the feste of saint Cutbert,*. [Rex Henricus moritur.] whanne he hadde regned xiij yeer and a half; and is yburied in*. [[Monday, March 20th.] A.D. 1413.] Crichirche of Cauntirbury.