131. WILLIAM SWAN TO THOMAS STONOR [before 1474]
Ryght reverent and worshypfull mayster, I recommande me unto your mastershyp, hertyly desyryng to here of your welfare and of all yourys, the whiche y beseche God to continue: fforþermore y sent my man to Clyve yestyrday on an erande of myn, and þer hit was told him hov þat my lady of Cobham on Satyrday last sent hir men, and havyn fette awey my susterys corn and catell and stuff, all þat that she left in þe plase, and havyn broke up every dore and locke, and set hem wyde opyn for every thyng to go in, and also have fett aweye a cowe of herys, þat was with novyn: of oþer thyngs he herd noon. As y here I shall sende word. Also all þe tenauntes havyn left up here land, and wyll no lenger ocupye: of the whyche y shall do my part to helpe remedie hit after my power. Y wryte no more &c.: but y praye God kepe you and all yourys. Wrytyn at Southflete, on seint Simon daye and Jude in hast.
By your servaunt W. Swan.
Unto my worshypfull mayster, Thomas Stonore, be this bylle de|lyveryd.