Page [unnumbered]
Ad Authorem Historiae Naturalis Comitatus Staffordiae.
Haeserunt alii tenui sub cortice Mundi,
Vix strinxit summas sterilis Geometria glebas;
Intima scrutaris Matris penetralia Terrae,
Ignotosque aperis, Populo mirante, recessus.
Infans Caesareo partu producitur aurum,
Lucinam supplente Stylo; Ferrumque ligonum
Impatiens, paret Calamo; Pennamque sequutum,
Non magis ire lubens, quamvis Magnete procante
Gestit in amplexus; vel si quando evocat ardens
Mulciber ad Fulmen Siculi fornacibus antri.
Ipsum etiam Fulmen sub Te Vibrante, priori
Exaitur Flamma: Sic mittit tela secundo
Jupiter augurio; liquidum sic Aethera inaurat
Dum castigato Semelen Uxorius igne
Quaerit, & innocuos Baccho inspirare calores.
Caetera, quae volitant super Aera corpora, nobis
Naturam absolvens, plenè Tua Pagina miscet.
Roscida Virgilii non sic depingitur Iris,
Quando aversa comam resecat morientis Elisae,
Quamvis Mille trahens varios à sole colores.
Hoc coelo nitidus majore Parhelius orbe
Splendet, nec solum demonstrat Apollinis ora,
Te quoque reflectit, geminata luce superbus,
Quam bene sic junctos ostendit in Aethere vultus.
Sed quae Te dignè celebrabit Musa, relinquat
Parnassi exhaustos latices, siccumque Helicona.
Aeternas aperis Lymphas, hoc Fonte Camoena
Non Labra, at Vestra se totam proluat Urna.
Oblitusque maris, veterisque oblitus Amoris,
Phaebus in hoc aliam venetur Tethya Ponto.
Hic Pater Oceanus vastas dispensat aquarum
Justus opes, Nymphis ferri sua dona per orbem
Hinc jubet; huc iterum desertis Naiades antris
Cum redeunt, liquidae referunt dispendia Gazae;
Humoris quantum cogit frondescere Plantas;
Quanto Flora sui variavit sidera coeli;
Quicquid & in solidas jussit lapidescere quercus.
Quod superest, nec plus Cybele satiata requirit,
Per plures Rivos, per Flumina mille revertens,
Maternos repetit blando cum murmure Fluctus.
Quam sibi Scriptorem Foelix Staffordia plaudit
Adjecta Oxonio! quid plus vel vota rogabunt,
Ni postquam Vestra lustrata Britannia curâ est,
Mens Majora sonans, totum percurreret Orbem,
Quaque patet Natura, extenderet impigra Regnum.
S. WELSTED.