PSEAUME XCIX.
Pseaume de consolation. Dominus regnavit irascantur.
〈♫〉〈♫〉 OR est maintenant
〈♫〉〈♫〉 L'Eternel regnant,
〈♫〉〈♫〉 Peuples obstinez
〈♫〉〈♫〉 En soient estonnez:
〈♫〉〈♫〉 Cherubins sous lui
〈♫〉〈♫〉 Lui servent d'appui:
〈♫〉〈♫〉 Que la terre toute
〈♫〉〈♫〉 Tremblant le redoute.
¶ Grand est le Seigneur
Assis en honneur
Au mont de Sion:
Toute nation
Le voit haut monté:
Dont sera chanté
Son grand Nom terrible
Et sainct au possible.
¶ Ce grand Roi tant fort
N'aime rien si fort
Que droit jugement:
Droit gouvernement
Il a ordonné,
Et Jacob mené
Par son soin & cure
En toute droiture.
¶ Sus donc, en ce lieu
Loüez nostre Dieu,
Tous humiliez
Tombez à ses pieds,
Car sainct est son Nom.
Moyse & Aaron
Ont bien fait l'office
De son sacrifice.
{inverted ⁂}
¶ C'est celui auquel
Jadis Samuel
Addressoit sa voix,
Quand tout à la fois
Le peuple crioit,
Et son Dieu prioit,
Qui à leur semonce
Donnoit sa réponse.
¶ Des nuës des cieux
Il parloit à eux,
Montrant haut & clair
Sa colomne en l'air:
Eux aussi gardoient
Ses loix, & tenoient
Chere l'ordonnance
De son alliance.
¶ O Dieu de nous tous,
Tu leur fus si doux:
Que de les ouïr
Et faire jouïr
De grace & pardon:
Toutefois selon
Leurs grands malefices
Punissans leurs vices.
¶ Soit loüé tout haut
Nostre Dieu d'enhaut:
Soit à deux genoux
Adoré de vous,
Au mont qui lui plaist:
Car c'est lui qui est
Dieu rempli, sans seinte,
De gloire tres-saincte.