{inverted ⁂} 2
¶ Ailleurs qu'à toi nostre pensee,
Seigneur, ne s'est point adressée:
Hors le chemin qu'as ordonné
Nostre pied n'a point cheminé.
Parmi dragons envenimez,
Combien que ta main nous accable,
Et que nous ayes abysmez
D'ombre de mort époutantable.
¶ Si nous n'avions eu souvenance
De nostre Dieu & sa puissance:
Si nous avions tendu la main
A d'autre Dieu qu'au Souverain:
Dieu ne s'enquerroit-il point?
Lui, dis-je, qui connoit & sonde,
Voire jusques au dernier poinct,
Les plus fins coeurs de tout le monde?
¶ On nous meurtrit pour ta querelle,
On nous tient en estime telle
Que brebis qu'on nourrit expres,
Pour les massacrer puis apres.
Helas! Seigneur, pourquoi dors-tu?
Réveille toi en nos oppresses:
Réveille, dis-je, ta vertu,
Et pour jamais ne nous delaisses.